Apostolengiri Butý 27 - Библия - Пэ Балтитко Романи чиб (Романэс) 2019

Па́вли Отплывинэ́ла кэ Ри́мо

¹ Ке́ли сыс прилыно тэ плывинас (дас пли́ма) дрэ Италия, тэды Павли́с и явирэ́н штарибнаскирэн здынэ тысенцэнгирэ-халадэ́нгирэ барыдырэ́скэ, савэ́с кхардэ́ Юлиё, ёв исын Аугустоскирэ полкостыр.

² Амэ бэсцям пэ Адрамитоскири па́рма (кораблё), савэ́скэ трэиндя́ тэ традэл пашы́л Азиякирэ штэ́ты и традыям, амэ́нца сыс Аристархо, Македонянино Фесалоникэндыр.

³ И пэ яви́р дывэ́с амэ притрадыям дро Сидоно. Юлиё отлыджаласпэ илэ́са кэ Па́вли, дэ́лас во́ля лэ́скэ тэ псирэ́л кэ дру́ги (мала́), соб (кай) ёнэ тэ дыкхэ́н пал лэ́стэ.

⁴ И традыи одотхы́р, амэ традыям пашы́л Кипро балвалякирэ рига́тыр, пал-дова́ со яця́ бари балва́л маму́й (прямэс) дрэ амари́ риг.

⁵ Ке́ли амэ пириплывиндям (дыям плима) мо́рё (дэрья́в) Киликиякирэ и Памфилиякирэ брэгостыр, амэ притрадыям дрэ Ликиякирэ Миры:

⁶ одо́й халадэ́нгиро барыдыро́, латхя́ Александриякири па́рма, сави́ традыя́ кэ Италия, и чхудя́ амэн пэ ла́тэ тэ традас.

⁷ Амэ бут дывэса́ и пэ на́бут плывинасас (дасас плима), и пир бари зор амэ догиям кэ Книдо адя́кэ, со пир бари балва́л амэ на могиндям тэ плывинас дурэды́р, и амэ подтрадыям кэ Крито Салмоноскирэ рига́тыр.

⁸ И барэ́ пхарипнаса амэ традасас пашы́л Кипроскиро брэ́го, и явдя́м кэ екх штэ́то, саво́ кхарэнас Лачхэ́ Пристани (Затоки), на́дур одотхы́р сыс фо́ро Ласея.

⁹ Нэ адя́кэ, сыр прогия́ древа́н бут часо, и тэ плывинэс сыс дарано, пал-дова́ со и посто прогия́, тэды Па́вли лыя́ тэ патякирэл лэн,

¹⁰ и ёв ракирдя́ лэ́нгэ: “Мурша́лэ! Мэ дыкха́ва, со дава́ плывиныбэн явэ́ла бидаса и барэ́ хасякирибнаса на екх ваш екх пхарипэн (грузо) и па́рма, нэ и ваш манушэ́нгиро джиибэ́н.”

¹¹ Нэ халадэ́нгиро барыдыро́ бутэды́р патяндыя манушэ́скэ, саво́ лыджалас па́рма и лэ́скирэ хула́скэ, а на Павлискирэ лавэнгэ.

¹² И пал-дова́ со, сыр кадава́ затоко на подджалас, соб (кай) одо́й тэ явас саро́/и́ ивант (зима), и бут мануша́ сыс пал дова́, соб (кай) тэ традас криг одотхы́р, и, ко́ли тэ явэ́л саштыпэн тэ докэдаспэ кэ Финика и одо́й тэ джива́с ивантэ (зимакиро), Финика сыс Критоскиро порто, карик могиндлэ́ тэ заджа́н па́рмы, и сыс зачхакирдо балвалятыр паш-дывэсытконэ́-западнонэнгирэ и паш-ратитконэ́-западнонэ ригэ́ндыр.

Што́рмо пэ Мо́рё (Дэрья́в)

¹³ И ке́ли яця́ набари балва́л паш-дывэсытконэ́ рига́тыр, ёнэ подуминдлэ, со ёнэ дорэснэ́ дова́, со лэ́нгэ трэй, ґаздынэ́ якорё тэ плывинэн (тэ дэн плима) на́дур брэгостыр пашы́л Крито.

¹⁴ Нэ сыг ґаздыя́пэ пэ Крито баро́ штормо, саво́ кхарэ́лапэ Евроклидоно.

¹⁵ И пал-дова́, со амари́ па́рма подухтылдя балва́л, ёй на могиндя́ тэ плывинэл (тэ дэл плима) дурэды́р проти балва́л, амэ мэкцям па́рма тэ плывинэл (дэл пли́ма) балваляса и амэн чхурдэлас дрэ сарэ́ рига́.

¹⁶ А ке́ли амэ сы́рбы пириурняндыям маму́й набаро́ котэ́р пхув, саво́ кхарэ́на Клавда, одо́й амэ барэ́ пхарипнаса пиризорьякирдям (збердындям) тэ рикирас пармакири ба́рка (лодка),

¹⁷ савья́ ґаздынэ́ пэ па́рма, ке́ли протырдынэ шолэ трусця́л и тэл па́рма и обпхандлэ́ ла; ёнэ дара́ндынэ, соб (кай) тэ на явэ́н вычхурдынэ балваляса пэ пра́хо дрэ Сирто, палдава́ ёнэ змэкнэ балвалунэ́ (па́русы) и дурэды́р ёнэ адя́кэ традэнас.

¹⁸ Нэ пал баро́ штормо, саво́ зоралэ́с чхурдэлас амари́ па́рма дрэ сарэ́ рига́, пэ яви́р дывэ́с амэ лыям тэ вычхурдас пхарипэ́н (грузо) дро пани́,

¹⁹ а пэ три́то дывэ́с ёнэ пэ́скирэ вастэ́нца вычхурдынэ саро́ пармакиро миштыпэ́н (оснашчэниё) дро пани́.

²⁰ И сыр бут дывэса́ на сыс бицяло́ ни кхам, ни чэргэня́, и штормо на пириячэлас тэ штылёл; амэ хасякирдям кажно наде́я тэ зракхаспэ.

²¹ Палдава́ со древа́н ґара́ на ханэ́ нисо́, ёнэ хасякирдэ́ зор, то Па́вли тэрдия́ машкира́л лэ́ндэ, и пхэндя́: “Тумэ́нгэ трэиндя́ тэ кандэ́н ман: тэ на традас Критостыр, тэды амэ на пиридживасас дасави́ би́да и хасибэ́н.

²² Какана́ Мэ манга́ва тумэн, тэ на дарэ́н, пал-дова́ со ни екх ману́ш тумэ́ндыр на хасёла апри́ч па́рма.

²³ Палдова́ со дрэ дая́-паць рат Дэвлэ́скиро Янго́ло явдя́ кэ мэ, Конэ́скиро мэ сом и Конэ́скэ мэ дынаринава,

²⁴ и пхэндя́: “На андырша, Павле! Ту явэ́са тэ тэрдёс пэ сэ́ндо анги́л кхенинго́стэ (кесарёстэ); и, ґа́да, Дэвэ́л даринэла джиибэ́н сарэ́нгэ, кон плывинэла (дэла плима) ту́са.”

²⁵ Палдава́ на дарэ́н, пал-дова́ со мэ патя́ва Дэвлэ́скэ, со саро́ явэ́ла адя́кэ, сыр Ёв пхэндя́ ма́нгэ.

²⁶ Амэ сам бангэ́ тэ явас вычхурдынэ пэ вари-саво́ о́строво (джип).”

²⁷ Нэ ке́ли яця́ дэшуштарто рат, сыр амэн традэлас балва́л пир Адриатикоскиро (Адриатическо) мо́рё (дэрья́в), пашы́л пашрат мануша́ лынэ́ тэ ґалён, со сыг ёнэ джа́нас пашылэды́р кэ вари-сави́ пхув,

²⁸ ёнэ и лынэ́ тэ спробинэн, ци хор сыс пани́, и выгия́, со панескиро хорипэ́н сыс пашэ́ штардэша́ охто́ метры, тэды ёнэ на́дур змериндлэ и латхнэ́, со хорипэ́н сыс пашэ́ трия́нда метры;

²⁹ ёнэ дара́ндынэ, соб (кай) тэ на попэрэн пэ барунэ́ штэ́ты, и мэкнэ́ тэлэ́ парма́тыр штар якори, и ёнэ ужакирэнас, ке́ли ячэ́ла дывэ́с.

³⁰ Ке́ли матросы скэдынэ́пэ тэ нашэ́н парма́тыр и ёнэ мэкнэ́ тэлэ́ ба́рка пэ пани́, пэфроми, со ёнэ сы́рбы камэ́на тэ мэкэ́н тэлэ́ пармакирэ накхэстыр якорё,

³¹ нэ Па́вли пхэндя́ тысёнцэнгирэ барыдырэ́скэ и халадэнгэ: “Ко́ли адалэ́ мануша́ на ячэ́напэ пэ па́рма, тэды и тумэ́ на могинэ́на тэ зракхэнпэ.”

³² Тэды халадэ́ пиричингирдэ шэлэ, савэ́ рикирдэ ба́рка, и ёй пыя́ дро пани́.

³³ Анги́л са́мо дывэ́с, Па́вли лыя́ тэ кхарэл сарэ́н манушэ́н тэ хан и пхэндя́: “Ададывэ́с дэшуштарто дывэ́с, сыр тумэ́ ужакирэ́на, тумэ́ сарэ́са нисо́ на ха́на.

³⁴ Палдава́ мэ манга́ва тумэн тэ лэн тэ хан; дава́ трэй тумэ́нгэ ваш дова́, соб (кай) тумэ́ тэ явэ́н джидэ́; ни конэ́стэ тумэ́ндыр ни екх бал на хасёла тумарэ́ шэрэстыр.”

³⁵ Пхэни́ дава́, Па́вли лыя́ маро́, парикирдя пал лэ́стэ Дэвлэ́скэ анги́л сарэ́ндэ, роспхагирдя́ и яця́ тэ хал.

³⁶ Тэды сарэ́ мануша́ пириячнэ тэ дарэ́н и лынэ́ тэ хан.

³⁷ Сарэ́н амэн сыс пэ па́рма дуйшэла́ охтодэша́ шов мануша́.

³⁸ Ке́ли мануша́ ханэ́ чалэ́с, ёнэ лынэ́ тэ кэрэ́н локхэды́р па́рма, вычхурдыи гив дро мо́рё (дэрья́в).

Па́рма Пхадёла

³⁹ Нэ ке́ли яця́ дывэ́с, ёнэ на ґалынэ́ пхув, а дыкхнэ́ екх прахитко брэ́го, саво́ сыс зачхудо пане́са, кэ саво́ ёнэ и скэдынэ́пэ, ко́ли явэ́ла сашты́ (можно), тэ традэ́н пашылэды́р пармаса.

⁴⁰ И ёнэ ґаздынэ́ якори, мэкнэ́ тэлэ́ лэн дро пани́, дрэ дова́-паць часо ёнэ роспхандлэ шолэ рулендыр и, ке́ли ґаздынэ́ упратуно балвалуно (парусо) пир балва́л, ёнэ традынэ кэ брэ́го.

⁴¹ Па́рма попыя пэ прахитко штэ́то, ёнэ чхудэ́ лэс одо́й. Накх загия́ пхарэ́с дро пра́хо и па́рма тэрдия́, а корма пхадёлас валнэнгирэ зорья́тыр.

⁴² Халадэ́ кэдынэпэ тэ замарэ́н сарэ́н штарибнаскирэн, соб (кай) нико́н лэ́ндыр тэ на выплывинэл (тэ на дэл плима пэскэ криг) и тэ на нашэ́л.

⁴³ Нэ тысёнцэнгиро барыдыро́ камдя́ тэ зракхэ́л Павли́с и на домэкця лэн тэ кэрэ́н дава́ и припхэндя́ одолэ́нгэ, кон джинэ́ла тэ плывинэл, тэ ухтэн дро пани́ и тэ выджа́н пэ пхув,

⁴⁴ а кодолэ́нгэ, со ячнэ́пэ, тэ выкэдэнпэ кэ па́рма, конэ́скэ пэ пхаля, а конэ́скэ пэ дова́, со яця́пэ парма́тыр, и адя́кэ выгия́, со сарэ́ зракхнэпэ пане́стыр пэ пхув.