Apostolengiri Butý 23 - Библия - Пэ Балтитко Романи чиб (Романэс) 2019

¹ Па́вли дыкхця маму́й пэ манушэ́ндэ, савэ́ кэдынэпэ, и пхэндя́: “Мурша́лэ, пшала́лэ, дадолэ! Мэ лачхэ́ и чачунэ́ илэ́са дживдём пэ́скиро джиибэ́н анги́л Дэвлэ́стэ кэ/жы́ко ададывэсатуно дывэ́с.”

² Нэ раша́нгиро барыдыро́ Анания припхэндя́ манушэ́нгэ, савэ́ сыс тэрдэ́ пашы́л Павлистэ тэ марэ́н лэс пир ушта́.

³ Тэды Па́вли пхэндя́ лэ́скэ: “Дэвэ́л явэ́ла тэ марэл тут, ва́нта подмакны ту сан! И бэшто́ ту сан одо́й, ваш дова́, соб (кай) тэ сэндякирэс ман пир Зако́но, а кокоро́ ту кэрэ́са на пир Зако́но, ко́ли припхэнэса тэ марэ́н ман?”

⁴ Одолэ́, кон сыс тэрдо́ пашы́л Павлистэ, пхэндлэ́ лэ́скэ: “Ту кошэса Дэвлэ́скирэ-раша́нгирэ барыдырэ́с.”

⁵ И Па́вли отпхэндя́: “Мэ на джиндём, пшала́лэ, со ёв исын раша́нгиро барыдыро́, пал-дова́ со дро Свэ́нто Чхиныбэ́н ракирэлапэ: ‘На кош манушэ́нгирэ барыдырэ́с.’”

⁶ Нэ Па́вли джиндя́, со екх паш лэ́ндыр сыс Садукеи, а яви́р паш Фарисе́и, палдава́ ёв лыя́ зоралэ́с тэ ракирэ́л Синедрионоскэ (сэндоскирэ скэдыибнаскэ): “Пшала́лэ мирэ́! Мэ сом Фарисеё, чхаво́ Фарисеёскиро; и сэндинэна ман пал миро лачхо́ ужакирибэ́н дро отджидыибэн мулэ́ндыр.”

⁷ Ке́ли ёв пхэндя́ дава́, машки́р Фарисеендэ и Садукеендэ выгия́ кошыбэ́н, и мануша́ Скэдыибнастыр розгинэпэ пэ дуй рига́.

⁸ Пал-дова́ со Садукеи ракирэ́на, со нанэ отджидыибэн мулэ́ндыр, ни Янголэн, ни ду́хо (фа́но); а Фарисе́и патя́на дрэ саро́ дава́.

⁹ И ґаздыя́пэ бари го́дла, и уштынэ́ лылвари́тка Фарисее́нгирэ рига́тыр и лынэ́ тэ ракирэ́н: “Амэ нисаво́ чорипэ́н на латхям дрэ адалэ́ манушэ́стэ; ко́ли ду́хо (фа́но) ци Янго́ло ракирдя́ лэ́скэ?”

¹⁰ Нэ адя́кэ, сыр кошыбэ́н яця́ барэды́р, тэды тысёнцэнгиро барыдыро́ страхадыя, соб (кай) ёнэ тэ на роскушэн Павли́с, и припхэндя́ халадэнгэ тэ джа́н и тэ лэн лэс одотхы́р зорья́са и тэ отлыджан дро штарибэ́н.

¹¹ Дрэ яви́р рат кэ ёв явдя́ Рай Дэвэ́л и пхэндя́: “Яв муршкано́; пал-дова́ со сыр ту са́нас Миро якхи́тко дро Ерусалимо, адя́кэ-паць ту явэ́са якхи́тко и дро Римо.”

Зракхибэ́н Проти Павли́скиро Джиибэ́н

¹² Ке́ли яця́ дывэ́с, Юды зракирдэпэ машкира́л пэ́стэ и дынэ́ совла́х, тэ на хан и тэ на пьен, пака ёнэ замарэна Павли́с.

¹³ Дро дава́ зракирибэ́н сыс буты́р, сыр штардэша́ мануша́;

¹⁴ и ёнэ явнэ́ кэ раша́нгирэ барыдыра́ и кэ годэпхурэ́ и пхэндлэ́: “Амэ дыям пэ́скэ совла́х тэ на хас нисо́, пака амэ замараса Павли́с.

¹⁵ Тумэ́ и сэндоскиро скэдыибэ́н мангэ́н тысёнцэнгиро барыдырэ́с, соб (кай) тэ янэ́н лэс кэ тумэ́, сы́рбы ваш дова́, соб (кай) фэдэды́р тэ роздыкхэс лэ́скиро рэ́ндо, а мэ ява́са тэ тэрдёвас пэ стрэ́га и да́са муло́ (мулякираса) лэс англэды́р, сыр ёв доджа́ла адари́к.”

¹⁶ Ке́ли пал дава́ зракирибэ́н шундя́ Павлискирэ – пхэнякиро чхаво́, ёв явдя́ дро штарибэ́н и роспхэндя́ лэ́скэ и пал дава́.

¹⁷ Тэды Па́вли кхардя́ екхэ шэлэнгирэ барыдырэ́с и пхэндя́ лэ́скэ: “Лы́джа кадалэс тэрнэ́ манушэ́с кэ тысёнцэнгиро барыдыро́, пал-дова́ со ёв камэ́ла вари-со тэ пхэнэ́л лэ́скэ.”

¹⁸ Одова́ лыджия́ лэс кэ тысенцэнгиро барыдыро́ и ракирэ́ла: “Штарибнаскиро Па́вли, кхардя́ ман и мангдя́ тэ янав кэ ту кадалэ́ тэрнэ́ манушэ́с, саво́ камэ́ла вари-со тэ пхэнэ́л ту́кэ.”

¹⁹ Тысёнцэнгиро барыдыро́ лыя́ лэс пал васт, лыджия́ лэс дрэ риг и пхуця́: “Со ту дасаво камэ́са ма́нгэ тэ пхэнэ́с?”

²⁰ Ёв пхэндя́: “Юды скэдынэ́пэ тэ мангэ́н тут, соб (кай) атася́ ту тэ янэс Павли́с пэ скэдыибэ́н, сы́рбы ваш дова́, со ёнэ камэ́на фэдэды́р тэ роскэдэнпэ дрэ лэ́скиро рэ́ндо.

²¹ Нэ тумэ́ на патя́н лэ́нгэ, пал-дова́ со лэс подракхэна буты́р, сыр штардэша́ мануша́, савэ́ дынэ́ совла́х тэ на хан и тэ на пьен, пака ёнэ замарэна лэс; и ёнэ какана́ исын тэрдэ́ пэ стрэ́га и ужакирэ́на тыро́ упхэныбэ́н.”

²² Тысёнцэнгиро отмэкця́ тэрнэ́ манушэ́с, и припхэндя́ лэ́скэ: “Никонэ́скэ на ра́кир пал дава́, со ту роспхэндян ма́нгэ.”

Павли́с Бичхавэ́на кэ Балуни́тко Фе́ликсо

²³ И ке́ли ёв выкхардя дуе́н пэ́скирэ барыдырэ́н и припхэндя́ лэ́нгэ: “Кэдэн дуйшэла́ халадэ́н тэ джа́н кэ Кесария, охтодэша́ уклистэ́ пэ грэ́ндэ и дуйшэла́ халадэ́ лукэнца пир трин мардэ́ коригэды́р (позжэды́р) долэ́стыр, сыр калёла яври́ дрэ еня́ (биекхэ́скиро дэш) мардэ́ (часы).

²⁴ И дэн Павлискэ осло́с, соб (кай) ёв тэ бэшэ́л уклисто/э пэ лэ́стэ и тэ янэ́н джидэс лэс кэ балунитко (правителё) Феликсо,

²⁵ И ёв чхиндя́ адасаво́ лыл:

²⁶ “Клавдиёстыр Лисиёстыр Най Фэдыдырэскэ балунитконэскэ Феликсоскэ, лачхо́ дывэ́с!

²⁷ Кадалэ́ манушэ́с ухтылдэ́ Юды и кэдынэпэ тэ мулякирэ́н; мэ явдём халадэнца и зракхцём лэс, адя́кэ сыр мэ уджиндём, со ёв бия́ндыя дро Римо.

²⁸ Пал-дова́ со мэ закамдём тэ уджинав, дрэ со исын лэ́скири банг анги́л лэ́ндэ, мэ яндём лэс анги́л лэ́нгиро сэндоскиро скэдыибэ́н;

²⁹ и мэ ґалыём, со банг лэ́скири исын спхандлы лэ́нгирэ Законоса, и со нанэ дрэ лэ́стэ нисави́ банг, соб (кай) ёв тэ явэ́л мол мэрибна́скэ ци тэ чхувэ́с лэс дро штарибэ́н.

³⁰ А сыр мэ уджиндём, со Юды зракирдэпэ тэ мулякирэ́н адалэ́ манушэ́с, мэ дрэ дова́-паць часо бичхадём лэс кэ ту и припхэндём манушэ́нгэ, савэ́ бангякирэна лэс, тэ ракирэ́н проти лэ́стэ анги́л ту́тэ. Яв састо́.”

³¹ Палдава́ халадэ́ пир упхэныбэ́н, саво́ лэ́нгэ сыс дыно́, лынэ́ Павли́с и гинэ́ раты́ кхэтанэ́ лэ́са дрэ Анципатрида,

³² и пэ яви́р дывэ́с, ёнэ бичхадэ́ халадэ́н, савэ́ традынэ уклистэ́ пэ грэ́ндэ, тэ лыджа́н Павли́с, а кокорэ́ рисинэ́ дрэ казарма.

³³ И одолэ́, ке́ли явнэ́ дрэ Кесария, пиридынэ балунитконэскэ лыл и адя́кэ-паць чхудэ́ Павли́с анги́л лэ́стэ.

³⁴ Балунитко гиндя лыл и пхуця́ Павли́стыр, савэ́ ёв сыс штэто́стыр, и ке́ли ёв уджиндя́, со ёв сыс Киликиятыр, тэды пхэндя́:

³⁵ “Мэ вышунава тут пхэрдэ́с, ке́ли адари́к явэ́на мануша́, савэ́ бангякирэна тут.” И ёв припхэндя́ халадэнгэ тэ рикирэ́н лэс пэ Иродоскири грэ́да (дво́ро).