Apostolengiri Butý 21 - Библия - Пэ Балтитко Романи чиб (Романэс) 2019

Па́вли Традэ́ла кэ Ерусали́мо

¹ И ке́ли амэ розяцямпэ лэ́нца, тэды амэ отплывиндям (дыя́м пли́ма кри́г) и маму́й явдя́м дро Косо, и пэ яви́р дывэ́с амэ са́мас кэ Родосо, и одотхы́р дыямпэ кэ Патара.

² Одо́й амэ латхям па́рма (кораблё), сави́ гия́ дрэ Финикия, бэсцям пэ ла́тэ и традыям пэ ла́тэ дурэды́р.

³ Амэ протрадыям (накхця́м) Кипро, и ячкирдям ла пир зэ́рво (ле́во) риг, и дурэды́р традыям дрэ Сирия и дрэ Ти́ро подтрадыям кэ брэ́го, пал-дова́ со ада́й трэиндя́ тэ злэл парма́тыр пхарипэ́н (грузо).

⁴ И ке́ли одо́й амэ латхям сыкляибнытконэ́н, тэды яцямпэ лэ́нца охто́ (бидуе́нгиро дэш) дывэса́, а ёнэ, пир Духоскиро упхэныбэ́н, ракирдэ́ Павлискэ, соб (кай) ёв тэ на джал дро Ерусалимо.

⁵ Нэ ке́ли амарэ́ дывэса́ кончындлэпэ, амэ традыям дурэды́р, и сарэ́ сыкляибны́тка пэ́скирэ ромне́нца и чхавэ́нца лыджинэ́ амэн пал фо́ро. А пэ брэ́го амэ тэрдиям пэ чанга́ и мангдямпэ Дэвлэ́скэ.

⁶ Амэ розяцямпэ екх екхэ́са и бэсцям пэ па́рма, а ёнэ рисинэ́ кэ пэ кхэрэ́.

⁷ Тиростыр амэ явдя́м дрэ Птолемаида, одо́й амэ пхэндям “рама́нё” (миро) и дыкхцямпэ пшалэ́нца и са́мас лэ́ндэ екх дывэ́с.

⁸ Пэ яви́р дывэ́с амэ явдя́м дрэ Кесария, и загиям дрэ Филипоскирэ – евангелистоскиро кхэр, екхэ эфта́ дьяконэндыр, и яцямпэ лэ́стэ.

⁹ Лэ́стэ сыс напалоромитка патывалэ́ штар чхая́, савэ́ ангилпхэнэнас.

¹⁰ Амэ одо́й са́мас бут дывэса́, и дрэ дова́ часо Юдэя́тыр явдя́ проро́ко, савэ́с кхардэ́ Агаво,

¹¹ и ёв подги́я кэ амэ и лыя́ Павлискири кусты́к, пхандя пэ́скэ ґэра́ и васта́ и пхэндя́: “Адя́кэ ракирэ́ла Свэ́нто Ду́хо (Фа́но)”, – манушэ́с, конэ́скири исын дая́ кусты́к, адя́кэ пхандэна Юды лэс дро Ерусалимо и отдэна лэс дрэ васта́ Наюдэ́нгэ.”

¹² Ке́ли амэ шундя́м дава́, тэды амэ, и сарэ́ штэтытка, лыям тэ мангас Павли́с тэ на джал дро Ерусалимо.

¹³ Нэ Па́вли отпхэндя́: “Со тумэ́ кэрэ́на? Со́скэ тумэ́ ровэна и кушэна миро ило́? Мэ кама́м тэ явав на со пхандло, нэ и тэ мэрав дро Ерусалимо пал Дэвлэ́скирэ-Исусо́скиро лав.

¹⁴ Ке́ли амэ ґалыям, со на могинаса лэс тэ отракирас, амэ пирияцям лэс тэ отракирас и пхэндям: “Мэк дро саро́ тэ явэ́л Дэвлэ́скири во́ля.”

¹⁵ Пало́ дава́ часо, саво́ амэ са́мас лэ́ндэ, амэ кэдыямпэ и гиям дро Ерусалимо.

¹⁶ Амэ́нца гинэ́ вари-савэ́ сыкляибны́тка Кесариятыр, ёнэ яндлэ́ амэн дро кхэр кэ Мнасоно Кипрянино, ёв сыс екх ґаратунэ́ сыкляибнытконэндыр.

Па́вли Джа́ла тэ Дыкхэ́лпэ Яково́са

¹⁷ Ке́ли амэ явдя́м дрэ Ерусалимо, пша́ла прилынэ́ амэн радыма́са.

¹⁸ Пэ яви́р дывэ́с амэ Павлиса явдя́м кэ Яково, одо́й скэдынэ́пэ сарэ́ кхангирьенгирэ годэпхурэ́.

¹⁹ Пал дава́, сыр Па́вли дыя́ “добридим” лэ́нгэ, ёв лыя́ тэ роспхэнэл саро́ пал дова́, со Дэвэ́л кэрдя́ машки́р Наюдэ́ндэ пир лэ́скиро дынарибэ́н.

²⁰ Ке́ли ёнэ вышундлэ лэс, ёнэ прославиндлэ Дэвлэ́с, нэ коригэды́р (позжэ) ёнэ пхэндлэ́ Павлискэ: “Ту дыкхэ́са, пша́ла, со бут тысёнцы Юды лынэ́ тэ патя́н, и сарэ́ ёнэ шылалэс ракхэна Мойза́скиро Зако́но;

²¹ лэ́нгэ роспхэндлэ́ пал дова́, со ту сыклякирэса сарэ́н Юдэ́н, савэ́ дживэ́на машки́р Наюдэ́ндэ, тэ отджан Мойза́скирэ Законо́стыр, соб (кай) ёнэ буты́р тэ на обчхинэн пэ́скирэ чхаворэ́н и тэ на дживэ́н пир амаро́ сыкляибэн.

²² Со амэ́нгэ тэ кэра́с? Дава́ трэй тэ джинэ́с, со кэдэнапэ бут мануша́, сыр шунэ́на пал дова́, со ту явдя́н.

²³ Палдава́, кэр дова́, со амэ ту́кэ пхэна́са: исын амэ́ндэ штар мануша́, савэ́ндыр исын пэ пэ́стэ совла́х;

²⁴ лэ лэн, и прилэ́ кхэтанэ́ лэ́нца жужакирибэн и заплэскир пал лэ́ндэ, соб (кай) ёнэ тэ обмуравэн пэ́скэ шэро́, тэды сарэ́ уджинэна, со саро́, со ракирдэ́ пал ту́тэ, на чачипэ́н, и со ту кокоро́ дживэса пир Зако́но.

²⁵ А пал дэвлытконэ́ Наюдэ́ндэ амэ лэ́нгэ чхиндям, со лэ́нгэ сыс нашты́ тэ на хан дова́ хабэ́н, саво́ янэ́на сыр свэ́нто дыибэ́н идолэ́нгэ, и рат, адя́кэ-паць и мас мурдалэ́ндыр, саво́ исын затасадо и тэ на кэрэ́н биладжаипэ́н.”

²⁶ Тэды Па́вли лыя́ одолэ́н манушэ́н и кхэтанэ́ лэ́нца прилыя́ жужакирибэн, нэ пэ яви́р дывэ́с ёв загия́ дрэ Кхангири́ и пхэндя́, ке́ли проджа́на (накхэ́на) жужакирибнаскирэ дывэса́ и пал кажнонэ́стэ лэ́ндыр явэ́ла яндло свэ́нто дыибэ́н.

Павли́с Лэ́на дрэ Кхангири́

²⁷ Ке́ли далэ́ эфта́ дывэса́ кончындлэпэ, Юды Асиятыр дыкхнэ́ лэс дрэ Кхангири́, и ґаздынэ́ манушэ́н и ухтылдэ́ лэс,

²⁸ и лынэ́ тэ дэн го́дла: “Израилёскирэ Мурша́лэ! Дэн васт! Дава́ исын кадава́ ману́ш, саво́ сарэ́н и пир саро́ свэ́то сыклякирэ́ла проти амарэ́ манушэ́ндэ, проти Зако́но, и проти дава́ штэ́то; апри́ч саро́ ёв и Грекэ́н (Баламэ́н) яндя́ дрэ Кхангири́ и магирдя дава́ свэ́нто штэ́то.”

²⁹ Пал-дова́ со ёнэ англэды́р дыкхнэ́ Трафимос Ефесянинос кхэтанэ́ Павлиса дрэ фо́ро: ёнэ думиндлэ, со Па́вли яндя́ лэс дрэ Кхангири́.

³⁰ Дрэ фо́ро ґаздыя́пэ бизладо и скэдынэ́пэ бут мануша́; и ёнэ ухтылдэ́ Павли́с, тырдынэ яври́ Кхангирья́тыр, и дрэ дова́-паць часо чхакирдэ вудара́.

³¹ Ёнэ камлэ́ тэ замарэ́н лэс, ке́ли халадэ́нгирэ – тысёнцэнгирэ барыдырэ́скэ пиридынэ зан (звесь) пал дова́, со пир саро́ фо́ро мануша́ кэрэ́на бизладо.

³² Ёв дро дова́-паць часо, лыя́ халадэнгирэн барыдырэ́н и халадэ́н и гия́ пэ лэ́ндэ. Ке́ли ёнэ дыкхнэ́ тысёнцэнгирэ барыдырэ́с и халадэ́н, то пириячнэ тэ марэ́н Павли́с.

³³ Тэды барыдыро́ подги́я, закэдыя лэс и припхэндя́ тэ пхандэн лэс дуе зандирьенца, ёв пхуця́ манушэ́ндыр, кон ёв сыс и со ёв кэрдя́?

³⁴ Мануша́, кон пэ́скэ дынэ́ го́дла, и адя́кэ, сыр пир дасави́ го́дла, ёв нисо́ на могиндя́ тэ уджинэл, припхэндя́ тэ лыджа́н лэс дрэ казарма.

³⁵ Ке́ли ёв сыс пэ ΄гэруня (ступеньки), халадэнгэ приявдяпэ тэ лыджа́н Павли́с, мануша́ на дэ́нас лэ́нгэ тэ проджан.

³⁶ Пал-дова́ со бут мануша́ гинэ́ пала́л, и дынэ́ го́дла: “Мэрибэ́н лэ́скэ!”

Па́вли Пхэнэ́ла Лав пал Пэ́стэ

³⁷ Анги́л дова́, сыр тэ заджа́л дрэ тва́рдыма (диз), Па́вли ракирэ́ла тысёнцэнгирэ барыдырэ́скэ: “Ци сашты́ (можна) ма́нгэ тэ пхэна́в вари-со ту́кэ?” И одова́ пхэндя́: “Ту джинэ́са Греки́тко (Балами́тко) чиб?”

³⁸ Адя́кэ, со ту на сан одова́ Египтянино, саво́ наґара газдыя и лыджия́ пэ́са пэ чхучи́ пхув штар тысёнцы розмарибнарьен?”

³⁹ Нэ Па́вли отпхэндя́: “Мэ сом Юдо, Тарсянино, ману́ш Киликиякирэ барэ́ форо́стыр; и мэ манга́ва тут тэ дэс во́ля ма́нгэ тэ пхэна́в манушэ́нгэ.”

⁴⁰ Ке́ли тысёнцэнгиро барыдыро́ дыя́ во́ля лэ́скэ тэ ракирэ́л, Па́вли тэрдия́ пэ стылба (лесвица), сыкадя́ вастэ́са манушэ́нгэ, соб (кай) ёнэ тэ шунэ́н; и, ке́ли сарэ́ ячнэ́ штыл, ёв лыя́ лэ́нгэ тэ ракирэ́л пэ Юды́тко чиб, ракири́: