Apostolengiri Butý 20 - Библия - Пэ Балтитко Романи чиб (Романэс) 2019

Кэ Македо́ния и Аси́я

¹ Ке́ли кошыбэ́н штылыя, Па́вли кхардя́ сыкляибнытконэ́н, облыя лэн, а кокоро́ гия́ дрэ Македония.

² И ке́ли ёв прогия́ пир далэ́ штэ́ты, ёв подрикирдя лэн бутэ́ лавэ́нца, и явдя́ дрэ Гре́цыя (Бала́мия).

³ Па́вли сыс одо́й трин чхона́ анги́л лэ́скиро традыпэн кэ Сирия, ке́ли Юды зракирдэпэ проти лэ́стэ, и ёв пиридуминдя тэ рисёл палэ пир Македония.

⁴ Лэс лыджа́нас Сосипатро, Пироскиро чхаво́, Вериянино, а Аристархо и Секундо Фесалоникийцэндыр, и Гаё Дервянино и Хима (Тимофеё), Тихико Трафимоса Асиятыр.

⁵ Ёнэ прогинэ́ анги́л и ужакирдэ амэн дрэ Троада;

⁶ нэ амэ коригэды́р (позжэды́р) Апреснокэнгирэ Свэнкостыр вытрадыям Филипинэндыр, и пир пандж дывэса́ явдя́м кэ ёнэ дрэ Троада, кай са́мас охто́ (бидуе́нгиро дэш) дывэса́.

Павли́скиро Палатуно́ (Последнё) Затрадыпэ́н кэ Троа́да

⁷ Дро пэ́рво куркитко дывэ́с, ке́ли амэ скэдыямпэ тэ пхагирас маро́, Па́вли ракирдя́ лэ́нца, а пэ яви́р дывэ́с ёв кэдэласпэ тэ джал дро дром. И ёв ракирдя́ дурэды́р кэ пашрат.

⁸ Дрэ упратуны шту́ба, кай амэ скэдыямпэ, хачинэ бут яга.

⁹ Пэ фэнштра сыс бэшто́ тэрно́ ману́ш, савэ́с кхардэ́ о Евтихо, адя́кэ сыр Павли́скиро ракирибэ́н сыс длэ́нго (гара́), Евтихо засуця и пыя́ тэлэ́ пэ пхув тритонэ вучыпнастыр (этажостыр), и лэс ґаздынэ́ пхувья́тыр мулэс.

¹⁰ Па́вли гия́ тэлэ́, бандия пашы́л лэ́стэ и облыя лэс, пхэни́: “На пиридживэн, пал-дова́ со лэ́скиро ду́хо (фа́но) исын дрэ лэ́стэ.”

¹¹ И ке́ли Па́вли ґаздыя́пэ упрэ́, ёв пхагирдя́ маро́, хая, и ракирдя́ лэ́нца сари́ рат кэ/жы́ко зло́ко (ра́нко), а тэды гия́ дурэды́р.

¹² А тэрнэ́ манушэ́с яндлэ́ джидэс, и ёнэ сарэ́ сыс древа́н ра́да.

Троада́тыр кэ Миле́то

¹³ Амэ гиям анги́л пэ па́рма (корабле) и плывиндям (дыям пли́ма) дро Асо, соб (кай) тэ лас одотхы́р Павли́с: пал-дова́ со ёв кокоро́ адя́кэ камдя́, ёв кэдыяпэ одотхы́р тэ джал пэзал.

¹⁴ Ке́ли ёв стрэниндяпэ (дыкхцяпэ) амэ́нца дро Асо, тэды амэ лыям лэс кэ пэ и явдя́м дрэ Митилина,

¹⁵ И одотхы́р пэ яви́р дывэ́с амэ традыям дурэды́р и явдя́м дро Хиосо, а пэ яви́р дывэ́с догиям кэ Самосо, и пир яви́р дывэ́с притрадыям дро Милето:

¹⁶ пал-дова́ со Па́вли задуминдя тэ на затрадэл дро Ефесо, соб (кай) лэ́скэ тэ на зарикирэлпэ дрэ Асия, пал-дова́ со ёв камдя́, сыр сашты́ сыгэды́р тэ пэрэ́л одори́к анги́л Духоскиро Свэ́нко ду́хо дро Ерусалимо.

Па́вли Ракирэ́ла Пхурэпшалэ́нгэ кэ Ефе́со Анги́л, Сыр тэ Розячэ́нпэ

¹⁷ Милетостыр ёв бичхадя́ манушэ́н, соб (кай) одолэ́ тэ кхарэ́н кхангирья́кирэ годэпхурэн.

¹⁸ И ке́ли ёнэ явнэ́ кэ ёв, ёв пхэндя́ лэ́нгэ: “Тумэ́ джинэ́на, сыр мэ англатунэ́ дывэсэ́стыр, ке́ли явдём дрэ Асия, саро́ дава́ часо со́мас тумэ́нца,

¹⁹ и мэ кандыём сарэскэ, и мэ кэрдём буты́ ясвэ́нца ваш Дэвлэ́скэ, на дыкхи́ пэ саро́, со ма́нгэ пригияпэ тэ пиридживав пал Юдэ́нгиро зракирибэ́н проти ма́ндэ;

²⁰ и сыр мэ на промэкцём нисо́ тэ пхэна́в лав пал Исусо́стэ тумэ́нгэ, со тумэ́нгэ явэ́ла трэй, и ракирдём анги́л сарэ́ндэ и псирдём пир кхэра́,

²¹ мэ и сыр ракирдём Юдэ́нгэ и Грекэ́нгэ (Баламэ́нгэ), со ёнэ сыс бангэ́ (мусиндлэ) тэ рискирэ́н пэ́скиро джиибэ́н кэ Дэвэ́л и тэ патя́н дрэ Растэ-Дэвлэ́стэ, амарэ́ Исусо́стэ Христосо́стэ.

²² И, ґа́да, какана́ мэ, сыр Ду́хо (Фа́но) лыджа́ла ман, мэ джа́ва нэ Ерусалимо, и мэ на джино́м, со одо́й ма́нца явэ́ла;

²³ а екх Свэ́нто Ду́хо (Фа́но) пир сарэ́ фо́рья пхэнэ́ла ма́нгэ пал дова́, со ман ужакирэ́на мэ́ньки и штарибэ́н.

²⁴ Нэ мэ ни пэ со дава́ на дыкха́ва, и мэ на дарава пал пэ́скиро джиибэ́н, екх ма́нгэ трэй тэ проджав миро дром и тэ кэра́в рэ́ндо (де́ло), саво́ дыя́ ма́нгэ Рай Дэвэ́л, Ису́со Христо́со, тэ лыджав бахталы́ зан (звесь) манушэ́нгэ пал Дэвлэ́скиро бахталыпэ́н.

²⁵ И какана́, ґа́да, мэ джино́м, со буты́р тумэ́ на дыкхэ́на ман сарэ́, конэса мэ со́мас кхэтанэ́ и конэ́скэ мэ пхэндём лав пал Дэвлэ́скиро Кралипэ́н.

²⁶ Палдава́ мэ и ракира́ва тумэ́нгэ дава́ ададывэ́с, со нанэ мири́ банг пал рат, ко́ли кон тумэ́ндыр хасёла,

²⁷ пал-дова́ со мэ нисо́ на промэкцём тэ роспхэнав тумэ́нгэ пал Дэвлэ́скири во́ля.

²⁸ И адя́кэ ракхэ́н пэс и сарэ́ дэвлытконэ́ манушэ́н, савэ́н Свэ́нто Ду́хо (Фа́но) чхудя́ тэ явэ́н кхангирья́кирэ барыдырэ́нца (дыкхибнаскирэнца), соб (кай) тэ ракхэ́н Дэвлэ́скири Кхангири́, сави́ Ёв дорэсця́ Пэ́скэ Лэ́скирэ-Чхавэ́скирэ Ратэ́са.

²⁹ Мэ джино́м, со ке́ли ман на явэ́ла, кэ тумэ́ явэ́на холямэ́ мануша́, сыр рува́, савэ́ на явэ́на тэ тангинэн (жалинэн) дэвлытконэн;

³⁰ адя́кэ-паць и машки́р тумэ́ндэ явэ́на мануша́, савэ́ явэ́на тэ ракирэ́н хохано́ сыкляибэн, соб (кай) тэ злыджан пал пэ́стэ сыкляибнытконэ́н.

³¹ Палдава́ дыкхэ́н и ракхэ́нпэ и рипирэ́н, со мэ на пириячавас тэ сыклякирав кажнонэс тумэ́ндыр сарэ́ трин бэрш а раты́ и дывэсэ́ ясвэ́нца.

³² И какана́, мэ пиридава тумэн Дэвлэ́скэ и Лэ́скирэ бахтякирибнаскирэ лавэ́скэ, саво́ явэ́ла тэ зорьякирэл тумэн и дэ́ла джиибэ́н кхэтанэ́ свэнтонэнца.

³³ Мэ никонэстыр на камдём тэ лав ни руп, ни сувнака́й, ни и́дя.

³⁴ Тумэ́ кокорэ́ джинэ́на, со мэ пэ́скирэ вастэ́нца закэравас пэ джиибэ́н пэ́скэ и одолэ́ манушэ́нгэ, савэ́ сыс ма́нца.

³⁵ Дро саро́, со мэ тэ на кэра́в, мэ сыкадём тумэ́нгэ, со амари́ буты́ исын дро дова́, соб (кай) тэ помогинас чорорэнгэ, и тэ рипирас Ра́скирэ-Дэвлэ́скирэ Исусо́скирэ лава́; савэ́ Ёв Кокоро́ пхэндя́, со ману́ш, саво́ дэ́ла, явэ́ла бахталэдыр одолэ́стыр, саво́ лэ́ла.

³⁶ Ке́ли Па́вли пхэндя́ дава́, ёв тэрдия́ пэ чанга́ кхэтанэ́ сарэ́нца и мангдя́пэ Дэвлэ́скэ сарэ́нца.

³⁷ И ёнэ сарэ́ рондлэ́, облэнас лэс и обчамудэнас,

³⁸ и ёнэ древа́н пиридживэнас пал лэ́скирэ лава́, савэ́ ёв пхэндя́, со ёнэ буты́р ние́кхвар на дыкхэ́на лэс. И ёнэ лыджинэ́ лэс пэ па́рма (кораблё).