Apostolengiri Butý 15 - Библия - Пэ Балтитко Романи чиб (Романэс) 2019

Скэдыибэ́н дрэ Ерусали́мо

¹ А вари-савэ́ мануша́ явнэ́ Юдэя́тыр дрэ Антио́хия, савэ́ лынэ́ тэ сыклякирэ́н пшалэ́н: “Ко́ли (со) тумэ́ на явэ́на тэ обчхинэнпэ пир Мойза́скиро Зако́но, тумэ́ на могинэ́на тэ зракхэнпэ.”

² Пал-дова́ со, ке́ли выгия́ Павлистэ Варнаваса бари чинга́рд и пириракирибэн лэ́нца, ёнэ пхэндлэ́ Павлискэ Варнаваса тэ джа́н явирэ дэвлытконэнца пир дава́ пхучибэн кэ Апо́столы и годэпхурэ́ (пхурэ́) дро Ерусалимо.

³ И адя́кэ кхангири́ бичхадя́ лэн дрэ дром, и ке́ли ёнэ джа́нас пир Финикия и Сама́рия, одо́й ёнэ роспхэнэнас пал дава́, со На́юды адя́кэ-паць лынэ́ тэ патя́н дрэ Исусо́стэ, дава́ нэвипэн яндя́ бари ра́дыма пшалэ́нгэ.

⁴ И ке́ли ёнэ явнэ́ дро Ерусалимо, лэн прилыя́ Кхангири, Апо́столы и годэпхурэ́, и Па́вли Варнаваса роспхэндлэ́ лэ́нгэ пал саро́, со Дэвэ́л кэрдя́ лэ́нца.

⁵ Тэды уштынэ́ мануша́ Фарисее́нгирэ сектатыр и пхэндлэ́: “Какана́ Наюдэ́нгэ трэй тэ обчхинэнгэ и трэй тэ зачхувэс лэн, соб (кай) ёнэ тэ кэрэ́н пир Мойза́скиро Зако́но.”

⁶ Апо́столы и годэпхурэ́ скэдынэ́пэ, соб (кай) тэ пириракирэн пал дава́ рэ́ндо.

⁷ Пало́ (после) длэнго пириракирибэн уштыя́ Пэ́три и пхэндя́ лэ́нгэ: “Мануша́лэ-Пшала́лэ! Тумэ́ джинэ́на, со Дэвэ́л англатунэ́ дывэсэ́ндыр выкэдыя́ ман ваш дова́, соб (кай) ма́ндыр На́юды тэ шунэ́н лав бахталэ́ занятыр, соб (кай) ёнэ тэ патя́н.

⁸ Дэвэ́л, Саво́ джинэ́ла манушэ́нгиро ило́, допхэндя, со прилэ́ла Наюдэн долэса, со дыя́ лэ́нгэ Свэ́нто Ду́хо (Фа́но) адя́кэ-паць, сыр и амэ́нгэ,

⁹ и Ёв на кэрдя́ нисаво́ выкэдыибэн машки́р амэ́ндэ и лэ́ндэ, пал-дова́ со Ёв патяибна́са выжужакирдя́ лэ́нгирэ илэ.

¹⁰ Тэды со́скэ ж тумэ́ какана́ пропатякирэна Дэвлэ́с, чхуви сыкляибнытконэ́нгэ пэ мэн ґа́мо, саво́ на могиндлэ́ тэ лыджа́н ни амарэ́ дада́, ни амэ?

¹¹ Нэ амэ патя́са дрэ дова́, со амэ зракхасапэ пир бахталыпэ́н амарэ́ Ра́скирэ-Дэвлэ́скиро, Исусо́скиро адя́кэ-паць, сыр и ёнэ.”

¹² Тэды саро́ скэдыибэ́н яця́ штыл и ёнэ шундлэ́ Варавас и Павли́с, савэ́ Дэвэ́л кэрдя́ ґертыка́ и ди́вы пир лэ́ндэ машки́р Наюдэ́нгэ.

¹³ Пало́ (после) дова́, сыр ёнэ пириячнэ тэ ракирэ́н, Яково отпхэндя́: “Мануша́лэ-Пшала́лэ! Вышунэн какана́ ман:

¹⁴ Си́моно роспхэндя́ амэ́нгэ пал дава́, сыр Дэвэ́л англэды́р сыкадя́ пэ́скири ла́ска ваш Наюдэ́нгэ, со Ёв выкэдыя́ лэ́ндыр манушэ́н ваш Пэ́скиро лав.

¹⁵ Адя́кэ, сыр исын чхиндло́, зджанапэ пророкэ́нгирэ лава́:

¹⁶ Пало́ дава́ Мэ рисёва́ва и кэра́ва роспхагирды Давидоскири ша́тра ваш Дэвлэ́скэ, и со исын дрэ ла́тэ роспхагно, мэ подкэрава, и кэра́ва ла, сыр нэви́,

¹⁷ соб (кай) тэ родэ́н Дэвлэ́с и яви́р мануша́ и сарэ́ На́юды, машки́р савэ́ндыр явэ́ла джиндло́ Миро лав. Адя́кэ ракирэ́ла Дэвэ́л, саво́ кэрдя́ саро́ дава́.

¹⁸ Векостыр исын джиндлэ́ Дэвлэ́скэ сарэ́ Лэ́скирэ рэ́нды.

¹⁹ Мэ палдава́ думинава, со на трэй тэ кэрэ́с пхарипэ́н ваш Наюдэ́нгэ, савэ́ камэ́на тэ явэ́н кэ Дэвэ́л;

²⁰ нэ тэ чхинас лэ́нгэ лыл, соб (кай) ёнэ тэ на хан хабэ́н, саво́ янэ́на сыр свэ́нто дыибэ́н идолэ́нгэ и тэ на кэрэ́н биладжаипэ́н и тэ на хан мас затасадэ мурдалэстыр, и тэ на пьен рат.

²¹ Пал-дова́ со Мойза́скиро Законо́стыр ґаратунэ́ бэршэ́ндыр пир сарэ́ фо́рья рашая́ роспхэнэна и гинэ́на дава́ Зако́но дрэ синагоги саватонэ́ (суботонэ́).”

Лыл Наюдэ́нгирэ Патяибнаскирэ́нгэ

²² Тэды Апо́столы и годэпхурэ́ пириракирдэ манушэ́нца пэ́скирэ Кхангирья́тыр и выкэдынэ́ вари-кицы́ пэ́скирэ манушэ́н ваш дова́, соб (кай) лэн тэ бичхавэн дрэ Антио́хия Павлиса и Варнаваса: Юдас, савэ́с кхардэ́ о Варна́ва, и Силас, савэ́ сыс лыджаибна́скирэ (шэрэ́ мануша́) (вожди) машки́р пшалэ́ндэ,

²³ и ёнэ чхиндлэ́ дасаво лыл лэ́нгэ: “Апостолэндыр, кхангирья́кирэ годэпхурэндыр, пшалэ́нгэ Наюдэндыр, савэ́ исын дрэ Антио́хия, Сирия и Киликия: тэ явэ́л рама́нё (миро) тумэ́нгэ.

²⁴ Адя́кэ, сыр амэ шундя́м, со кэ тумэ́ явнэ́ вари-савэ́ мануша́ амэ́ндыр, савэ́ страхакирдэ тумэн пэ́скирэ лавэ́нца и далэ́са-паць ёнэ яндлэ́ тумэ́нгэ бут пиридживибэн, ке́ли ёнэ ракирдэ́: ‘Тумэ́нгэ трэй тэ обчхинэнпэ и тэ ракхэ́н Мойза́скиро Зако́но,’ савэ́н амэ на бичхадям дава́ тэ ракирэ́н;

²⁵ палдава́ амэ скэдыямпэ сарэ́ кхэтанэ́ и выкэдыям амэ́ндыр вари-кицы́ манушэ́н тэ бичхавас лэн кэ тумэ́ кхэтанэ́ амарэ́ дрогонэ́ Варнаваса и Павлиса,

²⁶ адалэ́ манушэ́нца, савэ́ отдэнас пэ́скиро джиибэ́н пал лав амарэ́ Ра́скирэ-Дэвлэ́скиро, Исусо́скиро Христосо́скиро.

²⁷ И палдава́ амэ бичхадям кэ тумэ́ Юдас и Силас, савэ́ пиридэна тумэ́нгэ лавэ́нца дова́, со амэ чхиндям.

²⁸ Пал-дова́ со Свэ́нто Ду́хо (Фа́но) и амэ на ява́са тэ чхувас пэ тумэ́ндэ буты́р нисаво́ пхарипэ́н апри́ч дава́, саво́ трэй.

²⁹ На хан дова́ хабэ́н, саво́ янэ́на идолэ́нгэ сыр свэ́нто дыибэ́н и на пьен рат, на кэрэ́н биладжаипэ́н, и на хан мас затасадэ мурдалэстыр, и на кэрэ́н явирэ́нгэ дова́, со тумэ́ на камэ́на пэ́скэ; ко́ли тумэ́ явэ́на тэ ракхэ́н пэс сарэ́ далэ́стыр, тумэ́ кэрэ́на шука́р. Ячэ́нпэ Дэвлэ́са.”

³⁰ И ке́ли выкэдынэ́ мануша́ сыс бичхадя́ дро дром, ёнэ явнэ́ дрэ Антио́хия, и скэдынэ́ кхангири́, и отдынэ́ лыл.

³¹ И ке́ли мануша́ гиндлэ́ зоралэ́с дава́ лыл, ёнэ обрадындлэпэ далэ́ нэвипнастыр.

³² Юда и Сила кокорэ́ сыс проро́ки и ёнэ сыклякирдэ́ пшалэ́н пэ́скирэ лавэ́нца и патякирэнас лэ́нца лэн.

³³ Ке́ли ёнэ сыс одо́й вари-саво́ часо, пша́ла отмэкнэ лэн раманёса (миро́са) кэ Апо́столы.

³⁴ Нэ Сила закамдя́ тэ ячэ́лпэ одо́й, а Юда рисия́ дро Ерусалимо:

³⁵ Па́вли и Варнава адя́кэ-паць ячнэ́пэ дрэ Антио́хия, одо́й ёнэ кхэтанэ́ бутэ́ явирэнца сыклякирдэ́ и пхэнэнас Дэвлэ́скиро лав.

Па́вли и Варна́ва Джа́на пир Ра́зна Дрома́

³⁶ Нэ пир вари-кицы́ дывэса́ Па́вли пхэндя́ Варнаваскэ: “Явэ́н, дыкхаса амарэ́ пшалэ́н пир сарэ́ фо́рья, дрэ савэ́ амэ роспхэнасас Дэвлэ́скиро лав, сыр ёнэ дживэ́на.”

³⁷ Варнава камдя́ тэ лэл пэ́са и Ианос, савэ́с кхардэ́ Марко.

³⁸ Нэ Па́вли сыс проти тэ лэл лэс пэ́са, пал-дова́ со ёв мэкця́ лэн дрэ Памфилия и на гия́ лэ́нца пэ рэ́ндо, пэ саво́ ёнэ сыс бичхадэ́.

³⁹ Палдава́ машки́р лэ́ндэ выгия́ бари чинга́рд, со ёнэ розячнэпэ екх екхэ́са; и Варнава лыя́ Маркос и отплывиндя (дыя́ плима́ криг) дро Кипро;

⁴⁰ а Па́вли, выкэдыя́ пэ́скэ Силас, пша́ла бахтякирдэ лэс и ёв гия́ дрэ дром.

⁴¹ Па́вли гия́ пир Сирия и Киликия и ёв патякирэлас кхангирья.