Apostolengiri Butý 14 - Библия - Пэ Балтитко Романи чиб (Романэс) 2019

Дрэ Ико́ния

¹ Дрэ Икония Па́вли Варнаваса загинэ́ дрэ Юдэнгири синагога и ракирдэ́ адя́кэ, со древа́н бут Юды и На́юды патяндынэ́.

² Нэ Юды, савэ́ на патяндынэ́, ґаздынэ́пэ и подракирдэ Наюдэн проти пшалэ́ндэ.

³ Па́вли и Варнава сыс одо́й древа́н бут часо, ёнэ ракирдэ́ муршканэ́с пал Дэвлэ́стэ, Саво́ допхэнэлас пал Пэ́скирэ-лавэскиро бахтякирибэ́н долэса, со дэ́лас Апостолэнгэ зор тэ кэрэ́н знаме́нии (ґертыка́) и ди́вы.

⁴ Дрэ фо́ро машки́р манушэ́ндэ выгия́ кошыбэ́н и ёнэ розгинэпэ пэ дуй рига́, екх мануша́ сыс пэ Юдэнгири риг, а яви́р мануша́ пэ Апостолэнгири риг.

⁵ Ке́ли На́юды и Юды кхэтанэ́ пэ́скирэ барыдырэ́нца доракирдэпэ; соб (кай) тэ ладжакирэн и тэ марэ́н Апостолэн барэ́нца,

⁶ ёнэ уджиндлэ́ пал дава́ и гинэ́ дрэ Ликаоноскирэ [Ликониякирэ-ю.о.] фо́рья Листра и Дэрвия и пэ пашатунэ́ лэ́нгирэ штэ́ты;

⁷ и одо́й ёнэ дурэды́р роспхэнэнас бахталы́ зан (звесь).

Дрэ Ли́стра и Дэ́рвия

⁸ Кэ Листра дживдя́ екх ману́ш, савэ́стэ сыс насвалэ ґэра́, ёв сыс калека бияныпнастыр и ёв ние́кхвар на псирдя́.

⁹ Ёв шундя́, сыр ракирдя́ Па́вли, саво́ дыкхця сыгэс маму́й пэ лэ́стэ и дыкхця́, со манушэ́стэ исын патяибэ́н, соб (кай) тэ явэ́л высастякирдо,

¹⁰ и пхэндя́ зоралэ́ заня́са: “Ушты́ пэ ґэра́ маму́й (ровнэс).” И ёв ухтя и лыя́ тэ псирэ́л.

¹¹ Ке́ли мануша́ дыкхнэ́, со кэрдя́ Па́вли, ёнэ зоралэ́ заня́са лынэ́ тэ ракирэ́н пэ Ликаонытко чиб: “Дэвэла́, савэ́ поджана (зджана) пэ манушэ́ндэ, гинэ́ тэлэ́ болыбна́стыр кэ амэ!”

¹² И ёнэ кхардэ́ Варнавос Зевсоса, а Павли́с Ермиёса, пал-дова́ со ёв буты́р ракирдя́.

¹³ Анги́л фо́ро сыс кхангирори Зевсоскэ и лэ́нгиро раша́й яндя́ гурувэ́н и вянки кэ форо́скири по́рта, ёв камдя́ кхэтанэ́ манушэ́нца тэ чхинэн мурдалэ́н, сыр свэ́нто дыибэ́н ваш лэ́нгэ.

¹⁴ Нэ Апо́столы Варнава и Па́вли, ке́ли шундлэ́ пал дава́, то ёнэ роскушнэ пэ́скирэ и́ди и годла́са чхурдынэпэ дрэ манушэ́ндэ,

¹⁵ ракири́: “Мануша́лэ! Со тумэ́ кэрэ́на? Амэ сам дасавэ́-паць мануша́, сыр и тумэ́, и роспхэнаса бахталы́ зан тумэ́нгэ, и амэ камаса, соб (кай) тумэ́ тэ мэкэ́н кадалэ́ хоханэ́ и́долы и тэ прилэ́н джидэ́ Дэвлэ́с, Саво́ создыя́ болыбэ́н и пхув и пани́, и саро́, со исын дрэ лэ́ндэ;

¹⁶ Саво́ дрэ ґаратунэ́ бэрша́, дэ́лас во́ля сарэ́ нацыенгэ тэ псирэ́н пэ́скирэ дромэ́нца.

¹⁷ Нэ Ёв ячкирдя́ пал Пэ́стэ допхэныбэ́н и сыкавэ́ла Пэ́скиро лачхипэ́н дрэ дова́, со бичхавэ́ла амэ́нгэ болыбна́стыр брышы́нд дро аплодоскиро часо; Ёв дэ́ла амэ́нгэ хабэ́н и пхэрдякирэла амарэ́ илэ радыма́са”

¹⁸ И ракири́ дава́, ёнэ пир бари зор патякирдэ́ манушэ́н тэ на янэ́н лэ́нгэ свэ́нто дыибэ́н.

¹⁹ Нэ явнэ́ Юды Антиохиятыр и Икониятыр и, ке́ли Апо́столы маму́й (прямэс) пхэндлэ́ лав, ёнэ патякирдэ́ манушэ́н тэ отджан лэ́ндыр, ракири́, со ёнэ на ракирэ́на нисаво́ чачипэ́н, а саро́ хохавэна. И подракирдэ манушэ́н и лынэ́ лофо пэ лэ́ндэ: ёнэ домардэ́ Павли́с барэ́нца и вытырдынэ лэс пал фо́ро, сыр ёнэ гиндлэ́ лэс пал мулэстэ.

²⁰ А ке́ли сыкляибны́тка скэдынэ́пэ пашы́л лэ́стэ, ёв уштыя́ и гия́ дрэ фо́ро; а пэ яви́р дывэ́с ёв гия́ криг Варнаваса дрэ Дэрвия.

Рисибэ́н дрэ Антио́хия кэ Си́рия

²¹ И ке́ли ёнэ роспхэндлэ́ бахталы́ зан (звесь) дрэ дава́ фо́ро и лэ́ндэ ячнэ́ сыкляибны́тка древа́н буты́р, ёнэ рисинэ́ палэ дрэ Листра, Икония и Антио́хия,

²² и ёнэ подрикирэнас сыкляибнытконэ́н и патякирэнас лэн, соб (кай) ёнэ тэ явэ́н зоралэ́ дро патяибэ́н и ракирдэ́: “Амэ́нгэ явэ́ла трэй бут тэ пиридживас анги́л дава́, соб (кай) тэ заджас дро Дэвлэ́скиро Кралипэ́н.”

²³ Па́вли Варнаваса дрэ кажно кхангири́ чхудэ́ годэпхурэн пир постиныбэн и мангипэ́н и отдынэ́ лэн Ра́скэ-Дэвлэ́скэ, дрэ Савэ́стэ ёнэ патяндынэ́.

²⁴ И ке́ли Апо́столы гинэ́ пир Писидия, ёнэ явнэ́ дрэ Памфилия.

²⁵ И коригэды́р, сыр ёнэ пхэндлэ́ Дэвлэ́скиро лав дрэ Пергия, то гинэ́ дурэды́р дрэ Аталия,

²⁶ Аталиятыр ёнэ отплывиндлэ (дынэ́ пли́ма криг) палэ дрэ Антио́хия, одо́й ёнэ кэрдэ́ сари́ пэ́скири буты́, ваш сави́ ёнэ сыс бичхадэ́ и бахтякирдэ.

²⁷ Ке́ли Апо́столы рисинэ́ палэ дрэ Антио́хия, ёнэ скэдынэ́ кхангири́, и пал саро́ роспхэндлэ́, со Дэвэ́л кэрдя́ пир лэ́ндэ, и сыр Ёв Наюдэ́нгэ псирадя вудара́ ваш патяибэ́н.

²⁸ И ячнэ́пэ ёнэ одо́й кхэтанэ́ сыкляибнытконэ́нца бут часо.