Apostolengiri Butý 11 - Библия - Пэ Балтитко Романи чиб (Романэс) 2019

Пэтри́скиро Ракирибэ́н дрэ Ерусалимо́скири Кхангири́

¹ Апо́столы и пша́ла, савэ́ дживдэ́ кэ Юдэ́я, шундлэ́, со и На́юды прилынэ́ Дэвлэ́скиро лав;

² и ке́ли Пэ́три явдя́ дро Ерусалимо, дэвлы́тка Юды, савэ́ сыс обчхиндлэ́, лынэ́ тэ выракирэн лэ́скэ, пхэни́:

³ “Ту псирдян кэ мануша́, савэ́ исын наобчхиндлэ и хаян лэ́нца.”

⁴ И Пэ́три лыя́ тэ роспхэнэл лэ́нгэ саро́, сыр сыс:

⁵ “Дро фо́ро Иопия мэ мангдёмпэ Дэвлэ́скэ и дрэ мангипэ́н сы́рбы дрэ сунэ́ мэ дыкхцём дыкхибэ́н и издрандыём: мэ дыкхцём, сыр болыбна́стыр змэкэлапэ вари-со, со подджа́ла пэ бари цэ́рга, сави́ пал штар вэ́нглы змэкэлапэ болыбна́стыр маму́й (прямэс) одори́к, кай мэ со́мас:

⁶ мэ задыкхцём ракхунэс андрэ́ и дыкхцём штарэ́ пхувитконэ – ґэритконэ мурдалэ́н (зверен), савэ́ псирэ́на пири́ пхув и савэ́ ползынэна, и болыбнытконэ чириклен.

⁷ И шундём мэ зан, сави́ пхэндя́ ма́нгэ: “Пэ́тре! Ушты́, замар далэ́ мурдалэ́н и ха.”

⁸ Нэ Мэ пхэндём: “Над, Раё Дэ́вла! Мэ ние́кхвар на хаём нисо́ джунгало́ (брытко) ци нажужо.”

⁹ И пхэндя́ ма́нгэ зан болыбна́стыр яви́р мо́ло: “Со Дэвэ́л кэрдя́ жужэса, дова́ ту на гин пал нажужо.”

¹⁰ И сыс адя́кэ трин мо́лы, и коригэды́р (позжэды́р) цэ́рга нэвэ́стыр ґаздыя́пэ пэ болыбэ́н;

¹¹ и ґа́да, дро дова́-паць часо, трин мануша́ подгинэ́ кэ кхэр, дрэ саво́ мэ со́мас, ёнэ сыс бичхадэ́ Кесариятыр кэ мэ.

¹² И Ду́хо пхэндя́ ма́нгэ, соб (кай) мэ тэ джав лэ́нца, никицы на думины. И адалэ́ шов пша́ла гинэ́ кхэтанэ́ ма́нца и амэ явдя́м дро одолэ́-манушэ́скиро кхэр, саво́ кхардя́ ман.

¹³ Ёв роспхэндя́ амэ́нгэ, сыр ёв дыкхця́ дро пэ́скиро кхэр свэнтонэ́ Янголо́с, саво́ и пхэндя́ лэ́скэ: бичха́в кэ Иопия манушэ́н и выкхар Симонос, савэ́с кхарэ́на Пэ́три;

¹⁴ ёв пхэнэ́ла ту́кэ лава́, савэ́нца ту зракхэсапэ и саро́ тыро́ кхэр.”

¹⁵ Ке́ли мэ лыём тэ ракира́в, Свэ́нто Ду́хо (Фа́но) згия пэ лэ́ндэ, адя́кэ-паць, сыр англэды́р ёв згия и пэ амэ́ндэ.

¹⁶ И Мэ пририпирдём Ра́скирэ-Дэвлэ́скиро лав, сыр Ёв ракирдя́: ‘Иа́но болдя пане́са, а тумэ́ явэ́на болдэ Свэнтонэ́ Духо́са’.

¹⁷ Ко́ли тэды Дэвэ́л дыя́ лэ́нгэ дасаво-паць тала́но, сыр и амэ́нгэ, савэ́ патя́на дрэ Растэ-Дэвлэ́стэ, Исусо́стэ Христосо́стэ, тэды, кон мэ сом адасаво́, соб (кай) тэ кэра́в вари-со проти Дэвлэ́стэ?”

¹⁸ Ке́ли ёнэ шундлэ́ саро́ дава́, ячнэ́ штыл и лынэ́ тэ славинэ́н Дэвлэ́с, ракири́: “Бицяло́, со и Наюдэ́нгэ Дэвэ́л дыя́ во́ля тэ рискирэ́н пэ́скиро джиибэ́н кэ Дэвэ́л и тэ дживэ́н.”

Пэ́рво Кхангири́ дрэ Антио́хия

¹⁹ А мануша́, савэ́ мэкнэ́ пэ́скирэ штэ́ты пал би́да, сави́ кэрдя́пэ Стехваноса, догинэ́ кэ Финикия, Кипро и Антио́хия, ёнэ никонэ́скэ на ракирдэ́ Дэвлэ́скиро лав, апри́ч екхэ Юдэ́ндэ.

²⁰ А сыс машки́р лэ́ндэ Кипряни и Киринейцы, савэ́, ке́ли явнэ́ дрэ Антио́хия, лынэ́ тэ ракирэ́н и Элинэнгэ (Грекэ́нгэ/Баламэ́нгэ), ке́ли ёнэ миштопхэнэнас пал Растэ-Дэвлэ́стэ Исусо́стэ.

²¹ И сыс Дэвлэ́скиро васт лэ́нца, и бут мануша́ патяндынэ́ и рисинэ́ кэ Дэвэ́л.

²² И уджиндлэ́ пал дава́ дрэ Ерусалимо́скири Кхангири́, и одотхы́р бичхадэ́ Варнавас дрэ Антио́хия:

²³ саво́, ке́ли явдя́, дыкхця́ Дэвлэ́скиро бахталыпэ́н, и ёв древа́н обрадындяпэ и подрикирэлас сарэ́н, соб (кай) ёнэ тэ явэ́н дро патяибэ́н дрэ Растэ-Дэвлэ́стэ сарэ́ пэ́скирэ илэ́са;

²⁴ пал-дова́ со Варнава сыс лачхо́ ману́ш, пхэрдо́ патяибна́са и Свэнтонэ́ Духо́са, и пир лэ́стэ древа́н бут мануша́ рискирдэ́ пэ́скиро ило́ кэ Дэвэ́л.

²⁵ Коригэды́р Варнава гия́ дро Тарсо тэ родэ́л Савлос. И ке́ли ёв латхя́ лэс, то яндя́ дрэ Антио́хия.

²⁶ И саро́ бэрш Варнава Савлоса кэдэнаспэ дрэ Кхангири́ и сыклякирдэ́ бутэ́ манушэ́н: и сыкляибны́тка дрэ Антио́хия сыс пэ́рва тэ кхарэнпэ Дэвлытконэ́нца (Христианэ́нца).

²⁷ И дро дова́ часо проро́ки Ерусалимо́стыр явнэ́ дрэ Антио́хия;

²⁸ и екх лэ́ндыр, савэ́с кхардэ́ “Агаво”, уштыя́ и Свэнтонэ́ Духо́са ангилпхэндя, со явэ́ла бари бокх пир сари́ пхув, и, ґа́да, бокх яця́, ке́ли Клавдиё сыс кхенинго (кесарё).

²⁹ И сыкляибны́тка доракирдэпэ, соб (кай) кажно лэ́ндыр, кицы́ кон могинэ́ла, тэ помогинэл пшалэ́нгэ, савэ́ дживэ́на кэ Юдэ́я,

³⁰ И ёнэ кэрдэ́ дова́, ке́ли ёнэ бичхадэ́ ловэ́ пхурэпшалэнгэ (пресвитерэнгэ), со скэдынэ́ Варнава и Савло.”