Apostolengiri Butý 10 - Библия - Пэ Балтитко Романи чиб (Романэс) 2019

Пэ́три и Корни́лиё

¹ Кэ Кесария дживдя́ екх ману́ш, савэ́с кхардэ́ Корнилиё, ёв сыс пэ Италийсконэ (Италиякиро) полко шэлэнгиро барыдыро́,

² ёв сыс дэвлы́тко ману́ш, сарэ́ пэ́скирэ сэм΄яса (ирьяса) патяндыя Дэвлэ́скэ и дарандыя Лэ́стыр, ёв бут помогинэлас чорорэнгэ манушэ́нгэ и ўса́ды (сак) мангдя́пэ Дэвлэ́скэ,

³ е́кхвар дывэсэ́, пашэ́ еня́то мардо́ (шту́нда), кэ ёв явдя́ Дэвлэ́скиро Янго́ло, савэ́с ёв куч дыкхця́, и саво́ и пхэндя́ лэ́скэ: “Корни́лие.”

⁴ Ёв дыкхця сы́гэс пэ лэ́стэ и пиристрахадыи, пхуця́: “Раё Дэ́вла?” Янго́ло отпхэндя́ лэ́скэ: “Тыро́ мангипэ́н и дова́, со ту дэ́са васт чорорэ́ манушэ́нгэ, явнэ́ Дэвлэ́скэ пэ рипирибэ́н.

⁵ И какана́ бичха́в манушэ́н кэ Иопия, соб (кай) ёнэ тэ кхарэ́н Симонос, савэ́с кхарэ́на Пэ́три.

⁶ Ёв исын гостё дро Симоноскиро кхэр, саво́ исын тэрдо́ пашы́л мо́рё (дэрья́в), и адава́ ману́ш выкэрэла цыпи.

⁷ Ке́ли Янго́ло, саво́ ракирдя́ Корнилиёса, отгия́, тэды ёв кхардя́ кэ пэ дуе пэ́скирэ дынарье́ндыр (слугэ́ндыр) и екхэ халадэс, саво́ сыс дэвлы́тко и ўса́ды (сак) кхэтанэ́ лэ́са;

⁸ и, ке́ли ёв роспхэндя́ лэ́нгэ саро́, тэды бичхадя́ лэн дрэ Иопия.

⁹ Пэ яви́р дывэ́с, ке́ли ёнэ подгинэ́ пашылэды́р кэ фо́ро, Пэ́три пашэ́ шо́вто мардо́ (шту́нда) гия́ упрэ́ пэ кхэр тэ мангэ́лпэ Дэвлэ́скэ.

¹⁰ И ёв бокхалыя и закамдя́ тэ хал. Нэ пака ёнэ кэравэнас хабэ́н, лэ́скэ явдя́ дыкхибэ́н и ёв издрандыя.

¹¹ И дыкхэ́ла ёв: болыбэ́н исын отчхакирдо, и вари-со, со подджа́ла пэ бари цэ́рга, сави́ сыс припхандлы пал штар вэ́нглы, мэкэласпэ тэлэ́ пэ пхув;

¹² и одо́й сыс сарэ́ штарґэритка мурдала́ (жывотна), савэ́ псирэ́на пир пхув, и савэ́ ползынэна, и болыбны́тка чирикля́.

¹³ И зан пхэндя́ лэ́скэ: “Пэтрие! Ушты́, чхин адалэ́ мурдалэ́н и ха”

¹⁴ Нэ Пэ́три пхэндя́: “Над, Раё Дэ́вла! Мэ ние́кхвар на хаём нисо́ джунгалыпнастыр (брыткиматыр) и со исын нажужо.”

¹⁵ И сыс яви́р мо́ло зан, сави́ пхэндя́ лэ́скэ: “Со Дэвэ́л кэрдя́ жужэса (чыстонэса), дова́ ту на гин пал нажужэстэ.”

¹⁶ И адя́кэ сыс трин мо́лы и коригэды́р (позжэ) цэ́рга нэвэ́стыр ґаздыя́пэ пэ болыбэ́н.

¹⁷ Ке́ли Пэ́три пиридуминэлас кокоро́ пэ́скэ, со дава́ саро́ значынэ́ла, со лэ́скэ сыкадыя́ болыбна́стыр, ёв дыкхця́; ґа́да, адалэ́ мануша́, савэ́н бичхадя́ Корнилиё, латхнэ́ Симоноскиро кхэр, подгинэ́ кэ по́рта,

¹⁸ и зоралэ́ заня́са пхучнэ́: “Ци исын ада́й Си́моно, Савэс кхарэ́на Пэ́три?”

¹⁹ Пака Пэ́три думиндя пал дова́, со ёв дыкхця́, Ду́хо (Фа́но) пхэндя́ лэ́скэ: “Ѓа́да, трин мануша́, савэ́ родэ́на тут;

²⁰ ушты́ и джа́ тэлэ́ и джа́ кхэтанэ́ лэ́нца ни палсо́ на пиридумин; пал-дова́ со дава́ мэ лэн бичхадём кэ ту.”

²¹ Пэ́три гия́ тэлэ́ кэ мануша́, савэ́ сыс прибичхадэ кэ ёв Корнилиёстыр и пхэндя́: “Мэ сом одова́, конэ́с тумэ́ родэ́на; пал саво́ рэ́ндо (де́ло) тумэ́ явнэ́?”

²² Ёнэ отпхэндлэ́ лэ́скэ: “Корнилиё бичхадя́ амэн, шэлэнгиро барыдыро́, ману́ш чачуно́ и саво́ дарэ́ла Дэвлэ́стыр и сарэ́ Юды лэс шунэ́на, а свэ́нто Янго́ло пхэндя́ лэ́скэ тэ кхарэл тут дро лэ́скиро кхэр и тэ шунэ́л тырэ́ лава́.”

²³ Тэды Пэ́три кхардя́ лэн дро кхэр и дыя́ тэ хал. Пэ яви́р дывэ́с Пэ́три и вари-кицы́ пша́ла Иопиятыр гинэ́ лэ́са кхэтанэ́.

²⁴ Пэ атася́ ёнэ явнэ́ дрэ Кесария. А Корнилиё ужакирдя лэн, и кхардя́ кэ пэ сари́ пэ́скири сэмэ́нца и пашатунэ́ малэн (другэн).

²⁵ Ке́ли Пэ́три заджалас дро кхэр, Корнилиё пирилыя лэс, пыя́ кэ лэ́скирэ ґэра́ и кэрдя́ шэрэ́са (поклониндяпэ) лэ́скэ.

²⁶ Нэ Пэ́три ґаздыя́ лэс, пхэни́: “Ушты́! И мэ сом адасаво́-паць ману́ш.”

²⁷ И ке́ли Пэ́три ракирдя́ дурэды́р Корнилиёса, ёв загия́ дро кхэр и латхя́ бут манушэ́н, савэ́ кэдынэпэ.

²⁸ И ёв пхэндя́ лэ́нгэ: “Тумэ́ джинэ́на, со пир амаро́ Зако́но нашты́ Юдоскэ тэ ракирэ́л Наюдэнца, ци тэ явэ́л кхэтанэ́ лэ́нца; нэ Дэвэ́л сыкадя́ ма́нгэ, тэ на кхарав ние́кхвар манушэ́с налачхэса ци нажужэса.

²⁹ Палдава́, сыр ман кхардэ́, мэ явдём би ловэнгиро; и какана́ мэ тумэ́ндыр пхучава: “Ваш саво́ рэ́ндо тумэ́ бичхадэ́ пал ма́ндэ?”

³⁰ Корнилиё пхэндя́: “Штар дывэса́ палэ мэ постиндёмпэ кэ/жы́ко кадава́ моменто, дрэ дава́-паць часо мэ мангдёмпэ Дэвлэ́скэ дрэ миро кхэр, сыс еня́ (биекхэ́скиро дэш) мардэ́; и ґа́да, анги́л ма́ндэ тэрдия́ ману́ш дрэ зяиндлы и́дя,

³¹ и пхэндя́: “Корни́лие! Дэвэ́л шундя́ тыро́ мангипэ́н и дова́, со ту дэ́са васт чорорэ́ манушэ́нгэ.

³² Бичха́в палдова́ манушэ́н дрэ Иопия пал Симоностэ, савэ́с кхарэ́на “Пэ́три”; ёв исын сыр гостё дро Симоноскиро кхэр, саво́ исын тэрдо́ пашы́л пани́ и адава́ ману́ш выкэрэла цыпи; ёв явэ́ла и пхэнэ́ла ту́кэ.

³³ Палдава́ мэ дрэ дава́-паць часо бичхадём манушэ́н пал ту́тэ и ту куч кэрдя́н, со явдя́н. Какана́ амэ сарэ́ ада́й сам анги́л Дэвлэ́стэ тэ шунас саро́, со Дэвэ́л пхэндя́ ту́кэ, соб (кай) ту тэ пхэнэ́с амэ́нгэ.”

Пэтри́скиро Пхэныбэ́н

³⁴ Пэ́три лыя́ тэ ракирэ́л: “Какана́ мэ ґалёвава, со Дэвэ́л кутякирэла шэра́ (ра́внэс) сарэ́н манушэ́н;

³⁵ и Ёв прилэ́ла манушэ́н сарэ́ нацые́ндыр, ко́ли адалэ́ мануша́ дарэ́на Лэ́стыр и кэрэ́на пир чачипэ́н.

³⁶ Ёв бичхадя́ лав Израилёскирэ чхавэ́нгэ, саво́ роспхэнэ́ла пал “рама́нё” пир Исусо́стэ Христосо́стэ, Ёв исын Рай Дэвэ́л пир саро́ свэ́то.

³⁷ Тумэ́ джинэ́на и пал дова́, со сыс пало́ (после) болдэипэн, саво́ пхэндя́ Иа́но пир сари́ Юдэ́я аж Галилеятыр,

³⁸ пал Исусо́стэ Назаретостыр: сыр Дэвэ́л дыя́ Свэ́нто Ду́хо (Фа́но) Лэ́скэ и зор, и, сыр Ёв псирдя́ пир сари́ пхув, кэрдя́ лачхипэ́н и састякирдя сарэ́н, савэ́ндэ сыс налачхэскири зор, пал-дова́ со Дэвэ́л сыс Лэ́са.

³⁹ Амэ сам якхи́тка далэ́ сарэскэ, со Ису́со кэрдя́ пэ Юдэякири пхув и дро Ерусалимо, ёнэ замардэ́ Лэс и убладэ Лэс пэ трушу́л.

⁴⁰ Нэ Дэвэ́л пэ три́то дывэ́с отджидякирдя́ Лэс мэрибна́стыр и дыя́ Лэ́скэ саштыпэн, соб (кай) мануша́ тэ дыкхэ́н Лэс.

⁴¹ Нэ на сарэ́ мануша́, а амэ, савэ́н Дэвэ́л выкэдыя́ сыр якхитконэн, дыкхцям, амэ, савэ́ хаям и пиям кхэтанэ́ Лэ́са пало́ дова́, сыр Ёв отджидыя́ мэрибна́стыр.

⁴² И Ёв припхэндя́ амэ́нгэ тэ пхэнас лав манушэ́нгэ и тэ допхэнас пал дова́, со Ёв исын Одова́, Савэс Дэвэ́л выкэдыя́ тэ явэ́л Сэндариса пэ мулэ́ и джидэ́ манушэ́ндэ.

⁴³ Сарэ́ проро́ки допхэнэна пал Лэ́стэ, со одолэ́скэ, кон патя́ла дрэ Лэ́стэ, явэ́на отмэкнэ грэ́хи Лэ́скирэ лавэ́са.”

На́юды Дорэсэ́на Свэ́нто Ду́хо (Фа́но)

⁴⁴ Ке́ли Пэ́три ракирдя́ далэ́ лава́, Свэ́нто Ду́хо (Фа́но) гия́ тэлэ́ пэ сарэ́ндэ, кон шундя́ лав.

⁴⁵ И Юдытка дэвлы́тка, савэ́ явнэ́ Пэтриса, дивиндлэ́пэ, со Свэ́нто Ду́хо (Фа́но) гия́ тэлэ́ и пэ Наюдэ́ндэ;

⁴⁶ пал-дова́ со ёнэ шундлэ́, сыр одолэ́ ракирдэ́ пэ яви́р чиба́/чибья́, и ёнэ барьякирэнас паты́в Дэвлэ́скэ. Тэды Пэ́три пхэндя́:

⁴⁷ “Кон могинэ́ла (сашты́) тэ запхэнэл тэ болэнпэ пане́са, одолэ́нгэ, савэ́ прилынэ́ Свэ́нто Ду́хо (Фа́но), адя́кэ-паць, сыр и амэ?”

⁴⁸ И пхэндя́ лэ́нгэ тэ болэнпэ дро Исусо́скиро Христосо́скиро лав. Коригэды́р (позжэ) ёнэ мангнэ́ Пэтрис тэ явэ́л лэ́нца вари-кицы́ дывэса́.