Apostolengiri Butý 1 - Библия - Пэ Балтитко Романи чиб (Романэс) 2019

Свэнтонэ́-Апостолэ́нгири Буты́

¹ Дро пэ́рво лылвари́ кэ ту, Феофи́ле (Теофи́ле), мэ чхиндём пал саро́, со Ису́со кэрдя́ самонэ англыпна́стыр, и пал со Ёв сыклякирдя́,

² кэ/жы́ко дова́ дывэ́с, дро саво́ Ёв ґаздыя́пэ пэ болыбэ́н и дыя́ припхэныбэ́н пир Свэ́нто Ду́хо (Фа́но) одолэ́ Апостолэнгэ, савэ́н Ёв Кокоро́ выкэдыя́,

³ и кэ савэ́ адя́кэ-паць палэ пал Пэ́скирэ мэ́ньки, савэ́ Ёв пирилыджия и отдживдя мэрибна́стыр, явэ́лас Ису́со кэ ёнэ чачунэ́ допхэныбнаса, и Ёв штардэша́ дывэса́ псирдя́ кэ ёнэ и ракирдя́ лэ́нгэ пал Дэвлэ́скиро Кралипэ́н.

⁴ Екхвар, ке́ли Ису́со хая кхэтанэ́ Лэскирэ сыкляибнытконэ́нца, Ёв припхэндя́ лэ́нгэ: “Тэ на джа́н тумэ́ Ерусалимо́стыр, а тэ ужакирэн, ке́ли явэ́ла Свэ́нто Ду́хо (Фа́но), пал саво́ дыя́ лав тумэ́нгэ Дад, и пал саво́ тумэ́ шундлэ́ Ма́ндыр;

⁵ пал-дова́ со Иа́но болдя тумэн пане́са, нэ коригэды́р (позжэды́р) далэ́стыр пир вари-кицы́ часо Свэ́нто Ду́хо (Фа́но) явэ́ла тэ болэл тумэн.”

⁶ Палдава́, ке́ли сыкляибны́тка скэдынэ́пэ кхэтанэ́, ёнэ пхучнэ́ Лэ́стыр: “Ра́ё Дэ́вла! Ци на яця́ дава́ часо, соб (кай) Ту тэ кэрэ́с нэвэ́стыр Израилёскиро Кралипэ́н?”

⁷ И Ёв отпхэндя́ лэ́нгэ: “На тумаро́ рэ́ндо (де́ло) тэ джинэ́н часо ци дывэса́, савэ́ Дад выкэдыя́ Лэскирэ правоса;

⁸ нэ тумэ́ндэ явэ́ла зор, ке́ли Свэ́нто Ду́хо (Фа́но) джал тэлэ́ пэ тумэ́ндэ, и тумэ́ явэ́на Мирэ́ якхи́тка (свидетели) дро Ерусалимо и пэ сари́ Юдэ́я и Сама́рия и адя́кэ-паць пир сари́ пхув.”

Ису́со ґаздэ́лапэ пэ Болыбэ́н

⁹ И ке́ли Ёв пхэндя́ дава́, Ёв ґаздыя́пэ пэ болыбэ́н анги́л лэ́нгирэ якха́, и о́блоко чхакирдя Лэс лэ́нгирэ якхэ́ндыр.

¹⁰ И ке́ли сыкляибны́тка ишчо (инкэ́) дыкхнэ́ пэ болыбэ́н, сыр Ису́со ґаздэласпэ, акэ, вари-каты́р анги́л лэ́ндэ тэрдинэ́ дуй мануша́, савэ́ сыс уридэ́ дро парныпэн,

¹¹ и савэ́ пхэндлэ́: “Ѓалилеякирэ Мануша́лэ! Со тумэ́ сан тэрдэ́ и дыкхэ́на пэ болыбэ́н? Кадава́ Ису́со, Саво́ сыс ґаздыно́ тумэ́ндыр пэ болыбэ́н, адя́кэ-паць и явэ́ла, сыр тумэ́ дыкхнэ́, сыр Ёв ґаздэласпэ пэ болыбэ́н.”

Матфеё Заме́ст (Пашы́л) Юда́стэ

¹² Пало́ дава́ Апо́столы явнэ́ палэ дро Ерусалимо, сыр гинэ́ тэлэ́ Оливитконэ (Елеоноскирэ) бэрга́тыр; дромэ́са долэ́ бэрга́тыр сашты́ (можна) тэ доджас кэ Ерусалимо пал са́вато (субо́та).

¹³ И ке́ли ёнэ явнэ́ дро фо́ро, ёнэ скэдынэ́пэ дрэ бари шту́ба (комната), кай сыс: Пэ́три (Пётр) и Яково, Варфаламеё и Матфеё, Иа́но и Ендри (Андреё), Филипо и Фама, Яково Алфеёскиро и Си́моно Зилото, и пшал Яково́скиро, Юда.

¹⁴ Ёнэ кхэтанэ́ скэдэнаспэ тэ мангэ́нпэ Дэвлэ́скэ; сыс лэ́нца вари-кицы́ джувля́ и Мари́я, Исусо́скири Дай, и Лэ́скирэ пша́ла.

¹⁵ И дрэ долэ́ дывэса́ о Пэ́три, тэрдия́ машки́р сыкляибнытконэндэ (сыс скэдыибэ́н, пэ саво́ явнэ́ пашы́л шэл тэ биш мануша́) и пхэндя́:

¹⁶ “Мануша́лэ – Пшала́лэ! Трэиндя́ тэ сполнинэ́лпэ дова́, со сыс анги́л пхэндло́ дро Свэ́нто Чхиныбэ́н, дро саво́ Свэ́нто Ду́хо (Фа́но) ангилпхэндя пир Давидо́стэ пал Юда́стэ, саво́ сыс лыджаибнаскиро (вождё) одолэ́нгэ, савэ́ бикиндлэ Исусо́с.

¹⁷ Ёв сыс гиндло кхэтанэ́ амэ́нца, и адя́кэ-паць пхэнэлас дова́, со и амэ.

¹⁸ Ёв киндя пэ́скэ пхув пал ловэ́, савэ́ ёв дорэсця́ пал Исусо́скиро здыибэн, пэ дая́ пхув кокоро́ и хасия́, и лэ́скиро тру́по латхнэ́ роскушнэ пэрэ́са и выпынэ́ виндырье́нца.

¹⁹ И пал дава́ сарэ́ мануша́, савэ́ дживдэ́ кэ Ерусалимо, джиндлэ́, со доя́ пхув кхардэ́ пэ лэ́нгири чиб Акелдама, ци “ратвалы пхув.”

²⁰ Пал-дава́ со исын чхиндло́ дрэ Псалмы: “Мэк тэ явэ́л дава́ кхэр чхучо́, и мэк нико́н одо́й тэ на дживэ́л, и мэк тэ кэрэ́л лэ́скири буты́ яви́р.”

²¹ Палдава́ амэ́нгэ трэй тэ выкэдас пэ лэ́скиро штэ́то манушэ́с, саво́ псирдя́ кхэтанэ́ амэ́нца саро́ часо, ке́ли дживдя́ машки́р амэ́ндэ Рай Дэвэ́л Ису́со,

²² гины Ианоскирэ болдэипнастыр кэ/жы́ко дова́ дывэ́с, ке́ли Ису́со сыс ґаздыно́ амэ́ндыр, адалэ́ манушэ́скэ трэиндя́ тэ явэ́л кхэтанэ́ амэ́нца сыр якхи́тко пал Исусо́скиро отджидыибэн мэрибна́стыр,

²³ И ёнэ выкэдынэ́ дуе́н: Ёзас (Иосифос), савэ́с кхардэ́ Варсава, и прокхардэ Иустоса, и Матфеёс.

²⁴ И ёнэ мангнэпэ Дэвлэ́скэ и пхэндлэ́: “Дэ́вла! Ту джинэ́са сарэнгиро ило́, сыка́в екхэ́с кадалэ́ дуендыр, савэ́с Ту выкэдыян,

²⁵ соб (кай) тэ залэл штэ́то, сыр Апостоло тэ дынаринэ́л заме́ст Юдастэ, саво́ гия́ одори́к, карик лэ́скэ трэиндя́ тэ джал пэ́скэ.”

²⁶ И ёнэ чхурдынэ́ жре́биё, и жре́биё пыя́ пэ Матфеёстэ; и ёв сыс прилыно кэ дэшуекх Апо́столы.