Amoso 8 - Библия - Пэ Балтитко Романи чиб (Романэс) 2019

Дыкхибэ́н пал Лынаитко (Спяло) Фрукто

¹ Акэ, исын дава́, со Рай Дэвэ́л, сыкадя́ ма́нгэ: акэ, кхудо (корзина) спялонэ барьякирдонэнца (фруктэнца).

² И Ёв пхэндя́: “Амосо! Со дыкхэ́са ту?” И пхэндём мэ: “Кхудо лынаитконэ (спялонэ) барьякирдэнца.” Тэ́ньци пхэндя́ Рай Дэвэ́л ма́нгэ: “Ко́нцо (яго́ро) явдя́ пэ Мирэ́ манушэ́ндэ Израилёстыр; и Мэ буты́р на отмэкав банг лэ́нгэ.

³ ‘И гиля́, со багандлэ дрэ фэлатиня́, ячэ́на сыр зорало́ ровибэн дро дова́ дывэ́с’, – ракирэ́ла Рай Дэвэ́л. Бут тру́пы явэ́на пир сарэ́ штэ́ты, мануша́ чхурдэна яври́ лэн би лавэнгиро.”

⁴ Шунэ́н дава́, тумэ́, кон чорьёла тэ накхавэл манушэ́н дрэ трэ́бима, и тэ хасякирэ́л сарэ́ чорорэн пэ пхув,

⁵ тумэ́, савэ́ ракирэ́на: “Ке́ли дава́ Нэвонэ́-Чхонытко свэ́нко проджа́ла (кончынэлапэ), соб (кай) амэ́нгэ явэ́лас сашты́ (могинэлас) тэ бикнас маро́, и дава́ са́вато (субо́та), соб (кай) амэ́нгэ явэ́лас сашты́ тэ кофинас амарэ́ парнэ́ гивэса. Соб (кай) амэ́нгэ тэ тыкнякирас эфа, и тэ барьякирас шэ́келё, и амэ подкэрасас ублады́тка (весы) фрэнтымаса.

⁶ Соб (кай) амэ́нгэ явэ́лас сашты́ тэ кинас чорорэс пал руп, и манушэ́с дрэ трэ́бима пал пара цурули (цандали), соб (кай) тэ бикнас на́лачхо парно́ гив?”

⁷ О Рай Дэвэ́л совлахадя́ Яково́скирэ пхутькирибнаса: “Мэ чачипна́са ние́кхвар на бистрава пал лэ́нгирэ налачхэ́ бутя́.”

⁸ Ци на лэ́ла тэ издрал пхув пал дава́, и кажно (сва́ко) ману́ш явэ́ла тэ тугинэл зоралэ́с, кон дживэ́ла пэ дая́ пхув. Ци на ґаздэ́лапэ сыр шувлыпэн сари́ дая́ пхув сы́рбы рэка (лэнь): со явэ́ла тэ ґаздэлпэ валнэнца и тэ мэкэл тэлэ́ екха́тыр (сра́зу) сы́рбы рэка (лэнь) Египто́скири.’

⁹ “И явэ́ла адя́кэ дро дова́ дывэ́с’, – ракирэ́ла Рай Дэвэ́л – ‘со Мэ кэра́ва адя́кэ, со кхам заджа́ла дро паш-дывэ́с, со явэ́ла кало́ (цямло) пэ пхув дро ясно дывэ́с.

¹⁰ Мэ парувава тумарэ́ свэ́нки пэ зоралы́ ту́га и сарэ́ тумарэ́ гиля́ пэ зорало́ ровибэн; и Мэ яна́ва жалобна балытка гонэ́ пэ кажно трушу́л, и плеха пэ кажно шэро́. Мэ кэра́ва дро да дывэ́с бари ту́га пэ пхув, савья́са обровэна екхорэ чхавэ́с, и ко́нцо (яго́ро) далэскэ явэ́ла сыр кирко дывэ́с.

¹¹ ‘Акэ, явэ́на дывэса́’, – ракирэ́ла Рай Дэвэ́л, со Мэ бичхава́ва бокх пэ дая́ пхув, на бокх би марэскиро, на смэга пал пани́, а явэ́ла труш (жажда) пал лава́ Ра́скирэ-Дэвлэ́скирэ.

¹² И мануша́ явэ́на тэ псирэ́н екхэ морёстыр (дэрьявэстыр) кэ яви́р, паш-ратитконэ́ (севернонэ) рига́тыр кэ васто́ко; ёнэ явэ́на тэ прастан одори́к и палэ тэ родэ́н лав Ра́скирэ-Дэвлэ́скиро, и ёнэ на латхэ́на лэс.”

¹³ Дро дова́ дывэ́с шука́р патывалэ́ тэрнэ́ чхая́ и зоралэ́ тырнэ мануша́ явэ́на тэ нашавэн зор смэгатыр,

¹⁴ савэ́ совлахана грэхоса Самарияскирэса, савэ́ ракирэ́на: “Тэ явэ́л джидо́ тыро́ дэвэл, Данё!” И ишчо (инкэ́): “Тэ явэ́л дром цэ́ло кэ Вирса́вия!” Ёнэ пэрэ́на и ние́кхвар на уштэна нэвэ́стыр!