Amoso 6 - Библия - Пэ Балтитко Романи чиб (Романэс) 2019

Приракхибэн Сионоскэ и Самариякэ

¹ Бида тумэ́нгэ, кон прилэ́ла джиибэ́н локхэс, и савэ́ исын наракхибнытка (беспечна) дро патяибэ́н пэ бэ́рга дрэ Сама́рия, – тумэ́, славутна мануша́ барэ́ нацыятыр, кэ савэ́ явэ́ла кхэр Израилёскиро.

² Джа́н дурэды́р кэ Калнэ, и дыкхэ́н, одотхы́р джа́н кэ баро́ Емафо, и одотхы́р кэ Гефо Филистимлянэнгиро: ци ёнэ исын фэды́р кадалэ́ тумарэ́ кралипнэндыр? Ци лэ́нгирэ ме́жы исын буґлэдыр тумарэ́-пхувья́кирэ межэндыр?

³ Бида пэ тумэ́ндэ, савэ́ отчхувэна бибахтало́ дывэ́с, и, савэ́ янэ́на пашылэды́р кэ пэ, сыр явэ́на тэ притасавэн тумэн.

⁴ Тумэ́, савэ́ сан паштэ́ пэ чхуибэна, со исын ґожакирдэ слонытконэ кокалоса, и тумэ́ потырдэнапэ пэ тумарэ́ дро́га пасиндля (ложы). Тумэ́ ха́на выкэдынэ́ бакрэ́н тумарэ́ стадатыр, и тхулэ гуруворэ́н ґуртостыр.

⁵ Тумэ́ багана тэл гусленгири (арфакири) зан (глос), и придуминэна ваш пэ́скэ музыкакирэ струме́нты сыр Дави́до.

⁶ Тумэ́ пьена мол (вино) тахтаендыр, и макхэнапэ най фэдыршонэ макхлуненца (мазенца), нэ тумэ́ на пиридживэна пал дова́, со Ёза (Иосифо) исын притасадо.

⁷ Палдава́ тумэ́ акана́ джа́на пэ́рва дро пле́но анги́л пленонэндэ и, савэ́ тумэ́ндыр акана́ исын бэштэ́ пал свэнкитка скаминда паш-пасиндой, явэ́на штыл.

⁸ Рай Дэвэ́л совлахадя́ Пэ́са, янголэ́нгирэ-болыбна́скиро Дэвэ́л, Рай Дэвэ́л и ракирэ́ла адя́кэ: “Ма́нгэ исын джунгало́ (брытко), со пхутёла Яково, и Мэ бидыкхава лэ́скирэ барэ́ фэлатиня́ (колова́); палдава́ Мэ выдава лэ́скиро фо́ро и саро́, со исын дрэ лэ́стэ.”

⁹ И тэ́ньчи явэ́ла адя́кэ: со ко́ли дэш мануша́ ячэ́напэ дро екх кхэр, то и ёнэ мэрэ́на.

¹⁰ И сэмэ́нца мулэнгири, лэ́ла явирэ манушэ́с, саво́ явэ́ла тэ хачкирэл тру́пы, и ёв пхэнэ́ла кодолэ́скэ кхэрэ́стыр, кон яця́пэ джидо́: “Ци исын ишчо (инкэ́) вари-кон дро кхэр?” Тэ́ньци кодова́ ману́ш кхэрэ́стыр пхэнэ́ла: “Нанэ ‘никонэ́с.” И дая́ сэмэ́нца тэды пхэнэ́ла: “Рикир пэ́скири чиб! Пал-дова́ со амэ́нгэ нашты́ тэ пририпирас лав Ра́скирэ-Дэвлэ́скиро.”

¹¹ Пал-дова́ со, акэ, Рай Дэвэ́л припхэнэла, со Ёв пхагирэ́ла баро́ кхэр (кралипэ́н Израилёскиро) кэ руи́ны, и тыкно́ кхэр (кралипэ́н Юдэя́киро) пэ котэра́.

¹² Ци праста́на грая пир бэ́рги? Ци пахинэла пхув ману́ш, одо́й, пэ гурувэстэ? А сыр жа тумэ́ пиририскирдэ чачипэ́н дрэ жэлучоскири трута (ядо), а бар΄якирдо (пло́до) чачипна́скиро дро киркипэн (палыно)?

¹³ Тумэ́, савэ́ радынэ́напэ нисостыр, савэ́ пхэнэ́на: “Амэ, ж, хай, на пэ́скирэ зорья́са дорэсцям пэ́скэ зоралыпэ́н?”

¹⁴ “Нэ, акэ, Мэ, – ракирэ́ла Рай Дэвэ́л, янголэ́нгиро-болыбна́скиро Дэвэ́л, Мэ ґазда́ва Наюдытко нацыя проти тумэ́ндэ, кхэр Изралёскиро, и адалэ́ вэ́рги тумарэ́ явэ́на тэ притасавэн тумэн штэто́стыр, кай тэ джа́н андрэ́ Емафо, кэ сы́гно рэ́кица (лэнори́) пэ чхучэ́ прахи (Аравия).”