Amoso 2 - Библия - Пэ Балтитко Романи чиб (Романэс) 2019

¹ Адя́кэ ракирэ́ла Рай Дэвэ́л: “Пал трин чорипэна, со кэрдэ́ мануша́ Моавостыр, и пал штар чорипэна, Мэ на отмэка́ва пхаро́ сэ́ндо лэ́нгэ, пал-дова́ со ёнэ хачкирдэ́ кокалы́ крали́скирэ Эдэмоскирэ ваш звёска (известь):

² Нэ Мэ бичхава́ва яг пэ Моа́во, и ёй схачкирэ́ла барэ́ фэлатиня́ (колова́) дро Кериофо, и Моа́во хасёла машки́р марибнаскири го́дла, манушэ́нгирэ годлыпнаса и рогоскирэ башаибнаса.

³ И Мэ хасякира́ва сэндарис машки́р лэ́ндэ, и Мэ мулякирава сарэ́ лэ́нгирэ тхагарьен кхэтанэ́ лэ́са”, – ракирэ́ла Рай Дэвэ́л.

Сэ́ндо пэ Юдэ́я

⁴ Адя́кэ ракирэ́ла Рай-Дэвэ́л: “Пал трин чорипэна, со кэрдя́ Юда и пал штар чорипэна, Мэ на отмэка́ва пхаро́ сэ́ндо лэ́нгэ, пал-дова́ со ёнэ на прилынэ́ (дыкхнэ́ вучипна́стыр) пэ Зако́но Ра́скирэ-Дэвлэ́скиро, и ёнэ на ракхнэ Лэ́скирэ припхэныбэна́ и лэ́нгирэ хоханэ́ дэвлорэ́, пал савэ́ лэ́нгирэ дада́ гинэ́ тэ кэрэ́н паты́в, лыджинэ́ лэн дромэ́стыр.

⁵ Нэ Мэ бичхава́ва яг пэ Юдэ́я, и ёй хачкирэ́ла барэ́ фэлатиня́ дро Ерусалимо.”

Сэ́ндо пэ Израилё

⁶ Адя́кэ ракирэ́ла Рай Дэвэ́л: “Пал трин чорипэна, со кэрдэ́ мануша́ Израилёскирэ и пал штар чорипэна, Мэ на отмэка́ва пхаро́ сэ́ндо, пал-дова́ со ёнэ бикиндлэ чачипнаскирэн манушэ́н пал руп, и чорорэн пал пара цурули (цандали).

⁷ Ёнэ древа́н тырдэнапэ кэ пра́хо пхувья́киро, тэ явэ́л пэ шэро́ чорорэскиро, и ёнэ пиририскирэна дром, савэ́са псирэ́на напхутькирдэ мануша́, а дад и чхаво́ псирэ́на кэ екх джувлы́, соб (кай) тэ магирэ́н свэ́нто Миро лав.

⁸ Ёнэ пасёна пашы́л кажно алта́рё дрэ и́ди, со лынэ́ дрэ сымады́ (залого), и пьена мол (вино) бангякирдэ-манушэ́нца дро кхэр, кай исын лэ́нгиро дэвлоро.

⁹ Нэ дава́ сыс Мэ, Кон хасякирдя́ Амореен анги́л лэ́ндэ, Мирэ́ манушэ́ндэ, савэ́ исыс вучэ́ сы́рбы кедры, и ёнэ сыс зоралэ́ сы́рбы дэмбы, нэ Мэ хасякирдём лэ́нгирэ барьякирдэ́ (пло́ды) упра́л, и лэ́нгирэ ко́рни (рукха́) тэла́л.

¹⁰ И дава́ сыс Мэ, Кон вылыджия́ тумэн Египто́скирэ пхувья́тыр, и Кон лыджия́ тумэн штардэша́ бэрш пир чхучи́ пхув, соб (кай) тэ заухтылэн тумэ́нгэ пхув Амореенгири.

¹¹ Мэ выкэдыём вари-савэ́ тумарэ́ чхавэ́н сыр пророкэ́н, и вари-савэ́н тумарэ́ тэрнэ́ манушэ́н сыр Назареен. Ци на сыс дава́ адя́кэ тумэ́, чхавэ́ Израилёскирэ” – раки́рла Рай Дэвэ́л.

¹² “Нэ тумэ́ дынэ́ Назареенгэ мол (вино) тэ пьен, и тумэ́ припхэндлэ пророкэнгэ, ракири́: ‘На ангилпхэнэн!’

¹³ Акэ, Мэ притасавава тумэн, сы́рбы вурдэ́н, со исын пхэрдо́ ґарбэ́нца (снопэнца).

¹⁴ Палдава́ сы́гно ману́ш на кэрлапэ никай, а зорало́ на явэ́ла тэ рикирэ́л пэ́скири зор, и муршари на зракхэ́ла кокоро́ пэс;

¹⁵ и кон рикирэ́ла лу́ко, на вырикирэ́ла, а сы́гно пэ ґэро́й ману́ш, на нашэла, и одова́, кон традэ́ла уклистэ́, на зракхэ́ла пэ́скиро ди.

¹⁶ Нэ са́мо муршкано́ ману́ш, нашэла нанго криг дро дова́ дывэ́с”, – ракирэ́ла Рай Дэвэ́л.