Amoso 1 - Библия - Пэ Балтитко Романи чиб (Романэс) 2019

¹ Лава́ Амосо́скирэ, кон сыс екх чхупна́ри (пастухо) дрэ Фекоя [Тэкоа-ю.о.], савэ́ лэ́скэ Рай Дэвэ́л сыкадя́ дрэ сунэ́, дрэ одолэ́ дывэса́, ке́ли о Ози́я сыс кра́ли пэ Юдэ́я, и дрэ дывэса́, ке́ли о Иеровоамо, чхаво́ Иоасоскиро, сыс кра́ли пэ Израилё дуй бэрш анги́л пхувья́киро тринскирибэн.

² И ёв пхэндя́: “О Рай Дэвэ́л явэ́ла тэ ґреминэл Сионо́стыр, и Ёв пхэнэ́ла Пэ́скирэ заня́са Ерусалимо́стыр; и явэ́на тэ тугинэн зоралэ́с санэ буди (хижыны) чхупнарьенгирэ, и вышутёла фе́ля (макушка) пэ вучипэ́н Кармилоскиро.”

Сэ́ндо пэ Наюды́тка На́цыи

³ Адя́кэ ракирэ́ла Рай Дэвэ́л: “Пал трин чорипэна и штар, со кэрдя́ Дама́ско, Мэ на отмэка́ва пхаро́ сэ́ндо лэ́нгэ, палдова́ со ёнэ молотиндлэ Галаа́до саструнэ́ гиваобкэрибнытконэ́нца (молотилкэнца).

⁴ И Мэ бичхава́ва яг пэ Азаилоскиро кхэр и ёй хачкирэ́ла Венададоскирэ [Бэн-Хададоскирэ-ю.о.] барэ́ фэлатиня́ (колова́).

⁵ И Мэ адя́кэ-паць пхагирава шы́беро (засо́во) пэ по́рта Дамаскоскири и Мэ хасякира́ва манушэ́н, кон дживэ́ла пэ до́ло Авеноскиро и кодолэ́с, кон рикирэ́ла тхагаритко дэсто́ дро Едэно (Бэн-Хададо). Мануша́ Сириятыр джа́на дро пле́но кэ Кира”, – ракирэ́ла Рай Дэвэ́л.

Сэ́ндо пэ Израилё

⁶ Адя́кэ ракирэ́ла Рай Дэвэ́л: “Пал трин чорипэна, со кэрдэ́ мануша́ Газатыр и пал штар чорипэна, Мэ на отмэка́ва пхаро́ сэ́ндо лэ́нгэ, пал-дова́ со ёнэ лыджинэ́ сарэ́ Юдэ́н дро пле́но, соб (кай) тэ бикнэн лэн сыр писхарье́н кэ Эдо́мо.

⁷ И Мэ бичхава яг пэ ва́нта Газакири, и ёй хачкирэ́ла ла́кирэ барэ́ фэлатиня́ (колова́) [коморы-р.с.].

⁸ И Мэ хасякира́ва манушэ́н, кон дживэ́ла кэ Азото, и кодолэ́с, кон рикирэ́ла тхагаритко дэсто́ пэ Аскалоно, и Мэ рискира́ва Миро васт проти Экроно (Екроно), и мануша́, кон ячэ́лапэ Филистимлянэндыр, хасёна” – ракирэ́ла Рай Дэвэ́л.

⁹ Адя́кэ ракирэ́ла Рай Дэвэ́л: “Пал трин чорипэна, со кэрдэ́ мануша́ Тиростыр, и пал штар чорипэна, Мэ на отмэка́ва пхаро́ сэ́ндо лэ́нгэ, пал-дова́ со ёнэ лыджинэ́ сарэ́н пленнонэн кэ Эдо́мо, и ёнэ на рипирдэ пшалы́тко доракирибэ́н (союзо).

¹⁰ Нэ Мэ бичхава яг пэ ва́нта Тироскири, и ёй хачкирэ́ла лэ́скирэ барэ́ фэлатиня́ (колова́) [коморы-р.с.].”

¹¹ Адя́кэ ракирэ́ла Рай Дэвэ́л: “Пал трин чорипэна, со кэрдэ́ мануша́ Эдомостыр, и пал штар чорипэна, Мэ на отмэка́ва лэ́нгэ банг, пал-дова́ со ёнэ традэнаспэ пал пэ́скирэ пшалэ́стэ куртала́са и ёнэ на тангиндлэ лэн сыр сэмэ́нца, и лэ́нгири холы́ хачолас бипириячыбнаскиро, и ёнэ ўса́ды (сак) рикирэнас холы́ (мижэхипэн).

¹² И Мэ бичхава́ва яг пэ Фемано, и ёй схачкирэ́ла барэ́ фэлатиня́ (колова́) дрэ Восора [Боцра-ю.о.].”

¹³ Адя́кэ ракирэ́ла Рай Дэвэ́л: “Пал трин чорипэна, со кэрдэ́ чхавэ́ Амоноскирэ, и пал штар чорипэна, Мэ на отмэка́ва пхаро́ сэ́ндо лэ́нгэ, пал-дова́ со ёнэ росчингирэнас (путравэнас) пэра́ пхарэ́ джувлендэ, соб (кай) лэ́нгэ тэ буґлякирэн кустыка (ме́жы) пэ пхув.

¹⁴ Нэ Мэ росхачкирава яг дрэ ва́нта Равакири, и ёй хачкирэ́ла сарэ́ ла́кирэ барэ́ фэлатиня́ (колова́), годлыпнаса дро марибны́тко дывэ́с, барэ́ штормоса дро дова́ дывэ́с, сыр явэ́ла рискирибнаскири балва́л.

¹⁵ И лэ́нгиро кра́ли джа́ла дро пле́но, ёв и лэ́скирэ тхага́рья кхэтанэ́”, – ракирэ́ла Рай Дэвэ́л.