4 Kralip 9 - Библия - Пэ Балтитко Романи чиб (Романэс) 2019

¹ Проро́ко Елисе́ё кхардя́ екхэ́с пророкэ́нгирэ чхавэ́ндыр и пхэндя́ лэ́скэ: “Пхандэ трусцял тырэ́ трушула, и лэ дава́ кхоро́ (сасудо) елеёса дро тыро́ васт, и джа́ дро Рамо́фо Галаадоскиро.

² Яви одори́к, латх одо́й Ииуёс, Иосафатоскирэ чхавэ́с, Намесиёскирэ чхавэ́с, и подджа, и пхэн лэ́скэ тэ выджа́л пэ́скирэ пшалэ́ндыр, и залыджа лэс дрэ андратуны́ шту́ба.

³ И лэ кхоро́ елеёса, и вычхув пэ лэ́скиро шэро́, и пхэн: ‘Адя́кэ ракирэ́ла Рай Дэвэ́л: Мэ помакхава тут дрэ крали́стэ пэ Израилё.’ Тэ́ньци отчхакир вуда́р, и праста, и на ужакир.”

⁴ И гия́ тэрно́ ману́ш, пророкэнгиро чхаво́, дрэ Рамо́фо Галаадоскиро.

⁵ И явдя́, и ґа́да, исын бэштэ́ халадэ́нгирэ барыдыра́. И пхэндя́: “Ма́ндэ исын лав кэ ту, халадэ́нгиро барыдыро́.” И пхэндя́ Ииу́ё: “Кэ кон сарэ́н амэ́ндыр?” И пхэндя́ ёв: “Кэ ту, халадэ́нгиро барыдыро́.”

⁶ И уштыя́ ёв, и загия́ дро кхэр. И тэрно́ ману́ш вычхудя́ еле́ё пэ лэ́скиро шэро́, и пхэндя́ лэ́скэ: “Адя́кэ ракирэ́ла Рай Дэвэ́л, Дэвэ́л Израилёскиро: ‘Акана Мэ макхава тут дрэ крали́стэ пэ Ра́скирэ-Дэвлэ́скирэ манушэ́ндэ, пэ Израилё.

⁷ И ту вымарэса кхэр Ахавоскиро, тырэ́-хуласкиро, соб (кай) Ма́нгэ тэ отхав палэ (отомсцинав) пал рат писхарье́нгиро, Мирэ́ пророкэнгиро и пал рат сарэ́ писхарье́нгиро, савэ́ сыс Ра́скирэ-Дэвлэ́скирэ, савэ́ мынэ́ Езавелякирэ вастэ́стыр.

⁸ И хасёла саро́ Ахавоскиро кхэр, и Мэ замарава Ахавостэ кажнонэ́ муршэ́с, кон киндякирэлапэ кэ ва́нта, и бэшыбнарис и кон яця́пэ дро Израилё.

⁹ И кэра́ва Мэ кхэр Ахавоскиро, сыр кхэр Еровоамоскиро, Наватоскирэ чхавэ́скиро, и сыр Ваасаскиро кхэр, Ахииноскирэ чхавэ́скиро.

¹⁰ Езавеля схана джукэла пэ Израилёскири фэ́лда, и нико́н на гаравэла ла.’” И отчхакирдя́ вуда́р, и настя́.

¹¹ И выгия́ Ииу́ё кэ лэ́скирэ-хула́скирэ дына́ри, и пхэндлэ́ лэ́скэ: “Ци раманёса (миро́са)? Пал со сыс яви кэ ту дава́ бигодякиро.” И пхэндя́ лэ́нгэ: “Тумэ́ джинэ́на адалэс манушэ́с и со ёв ракирэ́ла.”

¹² И пхэндлэ́: “На чачипэ́н, пхэн амэ́нгэ.” И пхэндя́ ёв: “Дова́ и дова́ ёв пхэндя́ ма́нгэ, ракири́: ‘Адя́кэ ракирэ́ла Рай Дэвэ́л: Помакхава тут дрэ крали́стэ пэ Израилё.’”

¹³ И сыгнякирдэ ёнэ, и лынэ́ кажно (сва́ко) пэ́скири и́дя, и почхудэ лэ́скэ пэ сама ґэруня (ступеньки), и забашадэ рогоса, и пхэндлэ́: “Ииу́ё яця́ крали́са!”

¹⁴ И гия́ Ииу́ё, Иосафато́скиро чхаво́, Намесиевоскирэ-чхавэ́скиро, пэ Иорамостэ; Иора́мо ж сыс сарэ́нца Израильтянэнца дро Рамо́фо Галаадско пэ ракхибэн проти Азаилостэ, Сириякирэ крали́стэ.

¹⁵ Трэй тэ пхэнас, со кокоро́ кра́ли Иора́мо рисия́, соб (кай) тэ састякирэлпэ дрэ Изреелё чхиныбнастыр, саво́ кэрдэ́ лэ́скэ Сирияни (Араме́йцы), ке́ли ёв мардя́пэ Азаилоса, Сириякирэ крали́са. И пхэндя́ Иуё: “Ко́ли тумэ́ сан дрэ екх годы́, тэды мэк нико́н тэ на джал пэскэ форо́стыр, соб (кай) тэ джас тэ подэс зан (звесь) дрэ Изреелё.”

¹⁶ И бэштя Ииу́ё пэ грэстэ, и традыя́ дрэ Изрее́лё, кай сыс пашто́ Иора́мо, и карик Охозия, кра́ли пэ Юдэ́я явдя́ тэ дыкхэлпэ Иорамоса.

¹⁷ Пэ вучарды́ (башня) дро Изрее́лё сыс тэрдо́ ракхибнари, и дыкхця́ ёв баро́ кэ дар халадыбэ́н Ииуёскиро, ке́ли ёнэ гинэ́, и пхэндя́: “Баро́ кэ дар халадыбэ́н дыкха́ва мэ.” И пхэндя́ Иора́мо: “Лэ манушэ́с, саво́ бэшто́ уклистэ́ пэ грэстэ, и бичха́в гил (пэ стреч) лэ́нгэ, и мэк тэ пхэнэ́л ци раманёса (миро́са)?”

¹⁸ И вытрадыя́ ману́ш уклисто пэ грэстэ гил лэ́скэ, и пхэндя́: “Адя́кэ ракирэ́ла кра́ли: ‘Ци раманёса (миро́са)?” И пхэндя́ Ииу́ё: “Со ту́кэ кэ рама́нё (миро)? Традэ пал ма́ндэ.’ И роспхэндя́ ракхибнари, и пхэндя́: “Уклисто дотрадыя кэ ёнэ, нэ на рисёла.”

¹⁹ И бичхадэ́ явирэ́с манушэ́с уклистэ́ пэ грэстэ, и ёв притрадыя кэ ёнэ, и пхэндя́: “Адя́кэ ракирэ́ла кра́ли: ‘Ци раманёса?’” И пхэндя́ Ииу́ё: “Со ту́кэ кэ рама́нё? Традэ пал ма́ндэ.”

²⁰ И роспхэндя́ ракхибнари, и пхэндя́: “Дотрадыя уклисто кэ ёнэ, и на рисёла; а мина, сыр ёв джа́ла, исын сы́рбы Ииуёскири, Намесиёскирэ чхавэскири, пал-дова́ со ёв джа́ла сы́гэс.”

²¹ И пхэндя́ Иора́мо: “Дэ андрэ́”: и дынэ́ андрэ́ лэ́скиро марибны́тко вурдэ́н. И выгия́ Иора́мо, Израилёскиро кра́ли, и Охозия, кра́ли пэ Юдэ́я, кажно (сва́ко) пэ пэ́скиро вурдэ́н. И выгинэ́ гил Ииуёскэ, и стрэниндлэпэ лэ́са пэ Навуфеёскири-Изреельтяниноскири фэ́лда.

²² И ке́ли дыкхця́ Иора́мо Ииуёс, тэды пхэндя́: “Ци раманёса сан ту, Ииу́ё?” И пхэндя́ ёв: “Саво́ рама́нё пашы́л Езавелякиро биладжаипэ́н, тырэ́-да́киро, и пашы́л бут ла́кирэ човаханякирибэна?”

²³ И рискирдя́ Иора́мо пэ́скирэ васта́, и праста́ндыя, и пхэндя́ Охозие: “Бикиндлэ амэн, Охозиё!”

²⁴ А Ииу́ё оттырдыя лу́ко пэ́скирэ вастэ́са и попыя Иорамоскэ машки́р лэ́скирэ псикэ́, и прогия́ марибны́тко буст пирда́л лэ́скиро ило́, и пыя́ ёв пэ пэ́скиро марибны́тко вурдэ́н.

²⁵ И пхэндя́ Ииу́ё Бидэкароскэ, ра́скэ пэскирэскэ пэ халадэ́ндэ: “Лэ, чхурдэ лэс пэ Навуфеёскирэ-Изреелитяниноскиро фэлдакиро котэ́р; пал-дова́ со пририпир, сыр амэ ту́са традыям дуйджинэ́ пала́л Ахавостэ, лэ́скирэ дадэ́стэ, и сыр Рай Дэвэ́л пхэндя́ пэ лэ́стэ дасаво ангилпхэныбэ́н.

²⁶ Чачо́, рат Навуфеёскиро и рат, лэ́скирэ-чхавэ́нгиро, дыкхцём мэ тася́, ракирэ́ла Рай Дэвэ́л, и Мэ отхава палэ (отомстинава) ту́кэ пэ дая́ фэ́лда. И адя́кэ лэ, чхурдэ лэс пэ фэ́лда, пир Ра́скирэ-Дэвлэ́скиро лав.”

²⁷ Охозия, Юдэя́киро кра́ли, сыр дыкхця́ дава́, то праста́ндыя пир дром кэ кхэр, со сыс дрэ у́нта (садо). И традыяпэ пал лэ́стэ Ииу́ё, и пхэндя́: “Марэ́н лэс пэ вурдэ́н.” Дава́ сыс пэ вучипэ́н Гур, со исын пашы́л Ивлеамо. И праста́ндыя ёв дрэ Мегидоно, и мыя́ одо́й.

²⁸ И лыджинэ́ лэс писха́рья лэ́скирэ дро Ерусалимо, и гарадэ́ лэс дрэ лэ́скири копли́ца, лэ́скирэ дадэ́са, дро Давидо́скиро фо́ро.

²⁹ Пэ дэшупэрво бэрш Иорамо́скиро, Ахавоскирэ-чхавэ́скиро, яця́ крали́са Охозия дрэ Юдэ́я.

³⁰ И явдя́ Ииу́ё дро Изрее́лё. Э Езаве́ль, дорэсця́ зан, вымакця пэ́скиро муй, и прикэдыя пэ́скиро шэро́, и дыкхця́ дрэ фэнштра.

³¹ Ке́ли Ииу́ё загия́ дрэ по́рта, то ёй пхэндя́: “Ци исын рама́нё Замвриёскэ, пэ́скирэ кхенингоскирэ замарибнарискэ?”

³² И ґаздыя́ ёв пэ́скиро муй кэ фэнштра, и пхэндя́: “Кон исын ма́нца, кон?” И выдыкхнэ кэ ёв дуй, трин е́внухи.

³³ И пхэндя́ ёв: “Чхурдэ́н ла яври́.” И вычхурдынэ ла. И брызниндя ла́киро рат пэ ва́нта и пэ грэ́ндэ, и затопчындлэ (штакирдэ) ла.

³⁴ И явдя́ Ииу́ё, и хая, и пия, и пхэндя́: “Латхэ́н адаля бибахталя и гаравэн ла, адя́кэ, сыр ёй исын крали́скири чхай.”

³⁵ И гинэ́ тэ гаравэн ла, и на латхнэ́ ла́тыр ничы́, апри́ч чэрепостыр и ґэрэндыр, и ангуштэндыр пэ васта́.

³⁶ И рисинэ́, и роспхэндлэ́ лэ́скэ. И пхэндя́ ёв: “Дасаво сыс Ра́скирэ-Дэвлэ́скиро лав, саво́ Ёв пхэндя́ пирда́л Пэ́скирэ писхаристэ, Илиястэ Фесвитяниностэ, ке́ли пхэндя́ ёв пэ Израилёскири фэ́лда “Схана джукэла Езавелякиро тру́по.

³⁷ И явэ́ла Езавелякиро тру́по пэ котэ́р пхув Изреелёскири, сыр гнэё пэ фэ́лда, адя́кэ со нико́н на пхэнэ́ла: ‘Дава́ исын Езавель.’”