4 Kralip 18 - Библия - Пэ Балтитко Романи чиб (Романэс) 2019

¹ Пэ три́то бэрш Осияскиро, Иласкирэ-чхавэ́скиро, кон сыс кра́ли пэ Израилё, яця́ крали́са Езэки́я, Ахазо́скиро чхаво́, Юдэя́кирэ-крали́скиро.

² Биш тэ пандж бэрш сыс лэ́скэ, ке́ли ёв яця́ крали́са, и биш тэ еня́ бэрш ёв сыс крали́са дро Ерусалимо; лав лэ́скирэ-да́киро сыс Ави, Захарияскири чхай.

³ И кэрдя́ ёв лачхэ́с дрэ якха́ Ра́скирэ-Дэвлэ́скирэ дро саро́ адя́кэ, сыр кэрдя́ Дави́до, лэ́скиро дад.

⁴ Ёв отпарудя вучипэна́, розмардя́ статулы, вычингирдя дэмбы и харкунэ́ сапэс, савэ́с кэрдя́ Мо́йза, – пал-дова́ со кэ сама долэ́ дывэса́ Израилёскирэ чхавэ́ тхувалякирдэ лэ́скэ и кхардэ́ лэс ‘Нехуштано.’

⁵ Ёв патяндыя зоралэ́с дрэ Растэ-Дэвлэ́стэ, Израилёскирэ Дэвлэ́стэ; и ададысавэс, сыр ёв, на сыс машки́р сарэ́ндэ Юдэиякирэ кралье́ндэ и пало́ (после) лэ́стэ и англэды́р лэ́стыр.

⁶ И прилипниндя ёв кэ Рай Дэвэ́л, и на отгия́ Лэ́стыр, и ракхця́ Лэ́скирэ припхэныбэна́, савэ́ припхэндя́ Рай-Дэвэ́л Мойза́скэ.

⁷ И сыс Рай Дэвэ́л лэ́са усе́нде (везде), и карик ёв на псирдя́, то кэрдя́ ёв годьварэс. И счхудя ґа́мо ёв пэ́стыр Асирия́кирэ крали́стыр, и на яця́ тэ дынаринэ́л лэ́скэ.

⁸ Ёв традыя́ Филистимлянэн кэ Газа и дрэ ла́кирэ ме́жы пир рига́, ракхибнарьякирэ вучардятыр (башнятыр) кэ фо́ро зоралэ́ тыноса.

⁹ Пэ шта́рто бэрш, сыр лыя́ тэ кралинэ́л Езэки́я, дрэ саво́ сыс пэ эфта́то бэрш Осияскиро, Иласкирэ-чхавэ́скиро, Израилёскирэ крали́скиро, гия́ Салманасаро, Асирия́киро кхенинго, пэ Сама́рия и обчхудя́ халадыбнаса ла.

¹⁰ И лыя́ ла пирда́л трин бэрш. Пэ шо́вто бэрш Езэкия́скиро, саво́ сыс пэ еня́то бэрш Осияскиро, Израилёскирэ-крали́скиро, Асирийцы лынэ́ Сама́рия.

¹¹ И пиричхудя тэ дживэ́н Асирия́киро кра́ли Израильтянэ́н дрэ Асирия, и мэкця́ лэн тэ дживэ́н кэ Халахо и дро Хаворо, пашы́л рэка (лэнь) Гозана, и дрэ Мидиякирэ фо́рья.

¹² Пал-дова́, со ёнэ на шундлэ́ пэ́скирэ Ра́скирэ-Дэвлэ́скири зан (глос), и пиригинэ́ Заве́то Лэ́скиро, саро́, со припхэндя́ лэ́нгэ Мо́йза (Моисеё), Ра́скирэ-Дэвлэ́скиро писха́ри; ёнэ и на шундлэ́, и на сполниндлэ.

¹³ Пэ дэшуштарто бэрш Езэкия́скиро крали́скиро, гия́ Сенахиримо, Асирия́киро кра́ли, проти сарэ́ндэ Юда́скирэ фо́рья зоралэ́ тынэ́нца и лыя́ лэн.

¹⁴ И бичхадя́ Езэки́я, кра́ли Юдэя́киро, кэ кра́ли Асирия́киро дро Лахизо тэ пхэнэ́л: “Банго́ мэ сом; отджа ма́ндыр; со чхувэ́са пэ ма́ндэ, дова́ мэ отда́ва.” И чхудя́ кра́ли Асирия́киро пэ Езекиястэ, Юдэя́кирэ крали́стэ триншэла́ шэ́кели руп и трия́нда шэ́кели сувнака́й.

¹⁵ И отдыя́ Езэки́я саро́ руп, саво́ латхяпэ дро Ра́скирэ-Дэвлэ́скиро Кхэр и дрэ пираля́ крали́скирэ кхэрэ́скиро.

¹⁶ Дрэ долэ́ дывэса́ злыя́ Езэки́я сувнака́й Ра́скирэ-Дэвлэ́скирэ Кхэрэскирэ вударэндыр и стылбэнгирэ вударэндыр, савэ́ сувнакунякирдя Езэки́я, Юдэя́киро кра́ли, и отдыя́ лэс Асирия́кирэ крали́скэ.

¹⁷ И бичхадя́ Асирия́киро кра́ли Тартанос, и Рабсарисос, и Рабсакос Лахисостыр кэ кра́ли Езэки́я бутэ́ халадэнца дрэ Ерусалимо. И гинэ́, и явнэ́ ёнэ кэ Ерусалимо; и гинэ́, и явнэ́, и тэрдинэ́ пашы́л панескиро пролыджиибнытко (водопроводо) упратунэ вэндэрья́тыр (прудостыр), саво́ сыс пэ дром кэ фэ́лда, кай парнякирэнас похтана.

¹⁸ И кхардэ́ ёнэ крали́с. И выгия́ кэ ёнэ Елиакимо, Хелкииноскиро чхаво́, фэлятинякиро/колово́скиро (дворцоскиро) барыдыро́, и Се́вна, лыла́-чхиныбнаскиро (писцо), и Иоахо, Асафоскиро чхаво́, канцэляри.

¹⁹ И пхэндя́ лэ́нгэ Рабсако: “Пхэнэ́н Езэкияскэ: ‘Адя́кэ ракирэ́ла кра́ли баро́ Асирия́киро кра́ли: сави́ исын наде́я, пэ сави́ ту розгинэса (саво́ дава́ исын тыро́ лачхо́ ужакирибэ́н, пэ саво́ ту допатяса).

²⁰ Ту ракирдян екх чхучэ́ (пуста) лава́: ваш марибэ́н трэй годыпэ́н и зор. Какана́, пэ конэ́стэ ту чхувэ́са наде́я, со отгиян ма́ндыр?

²¹ Ѓа́да, ту думинэса тэ рикирэспэ пал Еги́пто, дава́ дэсто́ пхагирдо́, саво́, ко́ли кон явэ́ла тэ рикирэлпэпэ пал лэ́стэ, адолэ манушэ́скэ заджа́ла ёв (дэсто́) лэ́скэ дро васт и пропхусавэла лэс. Дава́ исын фарао́но, Египто́скиро кра́ли, ваш сарэ́нгэ, кон чхувэ́ла наде́я пэ лэ́стэ.

²² А ко́ли тумэ́ пхэнэ́на ма́нгэ: ‘Пэ Растэ-Дэвлэ́стэ амарэстэ амэ чхуваса наде́я,’ тэды ци пэ долэстэ, савэскирэ вучипэна́ и алтарья отпарудя Езэки́я, и пхэндя́ Юда́скэ и Ерусалимоскэ: Анги́л дава́ е́кх алта́рё (жэртвенико) мангэ́нпэ дрэ Ерусалимо?

²³ И адяка заджа́ дрэ доракирибэ́н совлахаса мирэ́ хула́са Асирия́кирэ крали́са; мэ да́ва ту́кэ дуй тысёнцы грэн, ци ту могинэ́са тэ дорэсэс пэ́скэ манушэ́н, савэ́ бэшэна уклистэ́ пэ лэ́ндэ?

²⁴ Сыр ту́кэ тэ пиризорьякирэс (тэ здолинэс) и екхэ́с шэралэс мирэ́ хула́скирэ тыкнэдыршонэндыр дынари́с? И ту чхувэ́са наде́я пэ Еги́пто ваш вурдына́ и грэнгэ?

²⁵ Пир саро́ акана́, нау́што мэ би Ра́скирэ-Дэвлэ́скирэ лавэскиро гиёмас пэ дава́ штэ́то, соб (кай) тэ хасякира́в лэс? Рай Дэвэ́л пхэндя́ ма́нгэ: ‘Джа́ пэ дая́ пхув, и хасякир ла.’”

²⁶ И пхэндя́ Елиакимо, Хелкииноскиро чхаво́, и Се́вна [Шэбна-ю.о.], и Иоахо Рабсакоскэ: “Ра́кир писхарье́нгэ тырэнгэ пир арамеитко чиб, пал-дова́ со ґалёваса амэ, а на ра́кир амэ́нца пир юды́тко чиб дрэ саро́ шуныбэ́н манушэ́нгиро, савэ́ исын пэ ва́нта.”

²⁷ И пхэндя́ лэ́нгэ Рабсако: “Нау́што е́кх кэ тыро́ хула́й и кэ ту бичхадя́ ман хула́й миро тэ пхэна́в далэ́ лава́? Над, адя́кэ-паць и кэ мануша́, савэ́ исын бэштэ́ пэ ва́нта, соб (кай) тэ хан нажужыпэн пэ́скиро и тэ пьен мутыра пэ́скирэ тумэ́нца.”

²⁸ И уштыя́ Рабсако, и пхэндя́ сарэ́нгэ зоралэ́ заня́са пир юды́тко, и ракирдя́, и пхэндя́: “Шунэ́н лав барэ́ крали́скиро, Асирия́кирэ-крали́скиро!

²⁹ Адя́кэ ракирэ́ла кра́ли: ‘Мэк тэ на хохавэ́л тумэн Езэки́я, пал-дова́ со ёв на могинэ́ла тумэн тэ зракхэ́л мирэ́ вастэ́стыр.’

³⁰ И мэк тэ на дэл наде́я тумэ́нгэ Езэки́я Ра́са Дэвлэ́са, ракири́: ‘Зракхэ́ла амэн Рай Дэвэ́л, и на явэ́ла дава́ фо́ро отдыно́ дрэ Асирия́кирэ-крали́скирэ васта́.’

³¹ На шунэ́н Езэкияс. Пал-дова́ со адя́кэ ракирэ́ла Асирия́киро кра́ли: ‘Кэрэ́н доракирибэ́н (союзо) ма́нца и выджа́н кэ мэ, и мэк кажно (сва́ко) тэ хал му́ри пэ́скирэ-винаградытконэ хрустостыр и инжыро пэ́скиро, и мэк кажно (сва́ко) тэ пьел пани́ пэ́скирэ ґанынгатыр.

³² Пака мэ ява́ва и лава́ тумэн пэ дасави́-паць пхув, сыр и тумари́ пхув исын, пэ пхув маритко и молитко марэскири и молякири, пэ оливи́тко пхув и пэ авгинэскири пхув, и явэ́на тумэ́ тэ дживэ́н, и на мэрэ́на. На шунэ́н Езэкияс, саво́ хохавэла тумэн, ракири́: ‘Рай Дэвэ́л зракхэ́ла амэн.’

³³ Ци зракхнэ́ дэвлорэ́ манушэ́нгирэ нацые́ндыр, кажно (сва́ко) пэ пэ́скири пхув, Асирия́кирэ-крали́скирэ вастэ́стыр?

³⁴ Кай исын дэвлорэ́ Емафоскирэ и Арпадоскирэ? Кай исын дэвлорэ́ Сепарваимоскирэ, Енаскирэ и Иваскирэ? Ци зракхнэ́ ёнэ Сама́рия мирэ́ вастэ́стыр?

³⁵ Кон сарэ́ дэвлорэндыр далэ́ пхувьендыр зракцья пхув пэ́скири мирэ́ вастэ́стыр? Адя́кэ нау́што Рай Дэвэ́л зракхэ́ла Ерусалимо мирэ́ вастэ́стыр?’”

³⁶ И молчындлэ (сыс штыл) мануша́, и на отпхэндлэ́ лэ́скэ ни лав; пал-дова́ со сыс припхэныбэ́н крали́скиро: на отпхэнэн лэ́скэ.

³⁷ И явдя́ Елиакимо, Хелкииноскиро чхаво́, фэлатинякиро барыдыро́, и Се́вна, лыла́-чхиныбнаскиро, и Иоахо, Асафоскиро чхаво́, канцэляри (дееписателё), кэ Езэки́я дрэ роскушнэ и́ди, и пирипхэндлэ лэ́скэ лава́ Рабсакоскирэ.