4 Kralip 12 - Библия - Пэ Балтитко Романи чиб (Романэс) 2019

¹ Пэ эфта́то бэрш Ииуёскиро, яця́ крали́са Иоа́со, и ёв штардэша́ бэрш сыс крали́са дро Ерусалимо. Лав лэ́скирэ да́киро сыс Цывья, Вирсавиятыр.

² И кэрдя́ Иоа́со дова́, со сыс лачхэ́с дрэ Ра́скирэ-Дэвлэ́скирэ якха́ дрэ сарэ́ пэ́скирэ дывэса́, пака сыклякирдя́ лэс раша́й Иодаё.

³ Екх вучэ́ штэ́ты на сыс розрадэ; мануша́ ишчо (инкэ́) янэ́нас свэ́нта дыибэна́ и хачкирдэ́ дро́га смо́лы пэ вучипэна́.

⁴ И пхэндя́ Иоа́со рашангэ: “Саро́ руп исын обсвэнцындло, саво́ янэ́на дро Ра́скирэ-Дэвлэ́скиро Кхэр, руп манушэ́ндыр, савэ́ явэ́нас, руп, саво́ вылыджана пал кажно (сва́ко) ди пир тими́н, саро́ руп, ци бут конэ́скэ явэ́ла пэ ило́ тэ янэл дро Ра́скирэ-Дэвлэ́скиро Кхэр.

⁵ Мэк тэ лэн рашая́ пэ́скэ, кажно пэ́скирэ джиндлэ́ манушэ́стыр, и мэк ёнэ тэ подкэрэн, со сыс пхагирдо́ дрэ Кхангири́; пэ кажно штэ́то усе́нде (везде), кай латхэлапэ пхагирибэн.”

⁶ Нэ сыр кэ биш тэ три́то бэрш, ке́ли лыя́ тэ кралинэ́л Иоа́со, рашая́ на подкэрдэ пхагирибэн дро Кхангири́,

⁷ то тэды о кра́ли Иоа́со кхардя́ раша́с Иодаёс и раша́н и пхэндя́ лэ́нгэ: “Со́скэ тумэ́ на кэрэ́на ремо́нто пэ пхагирибэн дрэ Кхангири́? На лэн акана́ руп пэ́скирэ пинджкирдэндыр, а ловэ́ тэ ремонтынэн пхагирибэн дрэ Кхангири́ отдэ́н палэ.”

⁸ И ячнэ́ дрэ екх годы́ рашая́ тэ на лэн руп манушэ́ндыр тэ ремонтынэн пхагирибэн дрэ Кхангири́.

⁹ И лыя́ раша́й Иодаё екх мохто́ (яшчыко), и кэрдя́ кула (отверстиё) упрэ́ лэ́стыр, и чхудя́ лэс пашы́л алта́рё пэ чачи́ (право) риг, кай заджа́на дро Ра́скирэ-Дэвлэ́скиро Кхэр. И чхудэ́ одори́к рашая́, савэ́ сыс тэрдэ́ пэ ракхибэн пашы́л прого, саро́ руп, саво́ янэ́нас дро Ра́скирэ-Дэвлэ́скиро Кхэр.

¹⁰ И ке́ли ёнэ дыкхнэ́, со бут руп сыс дро мохто́ (яшчыко), то явэ́лас лыла́-чхибнаскиро (писарё) крали́скиро и англатуно́ раша́й, и запхандэна дрэ гонэ́, и пиригинэнас руп, саво́ сыс латхно дро Ра́скирэ-Дэвлэ́скиро Кхэр.

¹¹ И отдэнас пиригиндло руп дрэ васта́ манушэ́нгирэ, савэ́ дыкхнэ́ пал бутя́, конэ́с чхудэ́ пэ буты́ кэ Ра́скирэ-Дэвлэ́скиро Кхэр, а одолэ́ лэнас лэс пэ кхэра́-кэрибнаскирэндэ (плотникэндэ) и стройкакирэндэ, савэ́ кэрдэ́ буты́ дро Ра́скирэ-Дэвлэ́скиро Кхэр.

¹² И пэ манушэ́ндэ, савэ́ кэрдэ́ ва́нты и пэ бутярнэндэ, савэ́ вычингирэнас бара́, адя́кэ-паць пэ киныбэн вэш, и обкэрдэ бара́, тэ ремонтынэн пхагирибэн дро Ра́скирэ-Дэвлэ́скиро Кхэр, и пэ саро́, со розгия́пэ ваш Кхангирья́киро подрикирибэ́н.

¹³ Нэ на сыс кэрдэ́ ваш Ра́скирэ-Дэвлэ́скиро Кхэр рупувэ́ чарэ́, чхурья, тахтая́ (чашы) тэ почхувэн, ро́ги (трубы), кажна кхорэ́ сувнакунэ́ и кхорэ́ рупэ́стыр, савэ́ сыс яндлэ́ дро Ра́скирэ-Дэвлэ́скиро Кхэр.

¹⁴ А манушэ́нгэ, савэ́ кэрэ́нас буты́, отдэнас лэс, и чыниндлэ лэ́нгэ Ра́скирэ-Дэвлэ́скиро Кхэр.

¹⁵ И на пхучнэ́ отпхэныбэ́н одолэ́ манушэ́ндыр, савэ́нгэ допатянас руп тэ роздэн манушэ́нгэ, савэ́ кэрдэ́ буты́; пал-дова́ со ёнэ кэрдэ́ чачунэ́с.

¹⁶ Руп пал свэ́нто яныбэ́н Ра́скэ-Дэвлэ́скэ пал чорипэ́н и руп пал свэ́нто яныбэ́н Ра́скэ-Дэвлэ́скэ пал грэ́хо на янэ́нас дро Ра́скирэ-Дэвлэ́скиро Кхэр: рашангэ ёв сыс тэ отдэлпэ.

¹⁷ Тэды выгия́ дро дром Азаило, кра́ли Сирия́киро, и гия́ марибна́са пэ Ге́фо, и лыя́ лэс; и скэдыяпэ Азаило тэ джал пэ Ерусалимо.

¹⁸ Нэ Иоа́со, кра́ли Юдэя́киро, лыя́ саро́, со сыс яндло сыр да́ро, со яндлэ́ ваш Кхангири́, и Иора́мо и Охозия, дада́ лэ́скирэ, кра́лья Иудэякирэ, и со ёв кокоро́ яндя́ сыр да́ро, и саро́ сувнака́й, саво́ сыс латхно дрэ пираля́ дро Кхэр Ра́скирэ-Дэвлэ́скиро и дро кхэр крали́скиро, и бичхадя́ дава́ Иоа́со Азаилоскэ, крали́скэ Сириякирэскэ; и ёв отгия́ Ерусалимо́стыр.

¹⁹ Яви́р пал Иоасостэ и пал саро́, со ёв кэрдя́, сыс зачхиндло́ дрэ бэршы́тка архи́вы кралье́нгэ Юдэякирэнгэ.

²⁰ И ґаздынэ́пэ лэ́скирэ дына́рья, и зракирдэпэ, и мулякирдэ́ Иоасос дро кхэр Милоскиро, пэ дром кэ Сило.

²¹ Лэс замардэ́ лэ́скирэ дына́рья: Иозакаро, Шыметоскиро чхаво́, и Егозавадо, чхаво́ Шомероскиро: и ёв мыя́, и гарадэ́ лэс дадэ́нца лэскирэнца дро Давидо́скиро фо́ро. И яця́ крали́са Ама́сия, чхаво́ лэ́скиро, пэ штэ́то лэ́скиро.