4 Kralip 10 - Библия - Пэ Балтитко Романи чиб (Романэс) 2019

¹ Ахавостэ сыс эфтадэша́ (битрияндэнгиро шэл) чхавэ́ дро Сама́рия. И чхиндя́ Ииу́ё лыла́, и бичхадя́ дрэ Сама́рия кэ барыдыра́ Изреёлёскирэ, пхурыдырэнгэ и опекунэнгэ Ахавоскирэ чхаворэнгирэнгэ, дасавэ́ лавэ́нца:

² “Ке́ли явэ́ла дава́ лыл кэ тумэ́, тэды адя́кэ сыр тумэ́ндэ и чхавэ́ тумарэ́ хула́скирэ, тумэ́ндэ и вурдына́, и грая, и фо́ро зоралэ́ тыноса, и марды́тко (оружыё), –

³ Выкэдэн фэдыршонэ и славутнонэ чхавэ́ндыр пэ́скирэ кхенингос, и чхувэ́н лэс тэ бэшэ́л пэ троно лэ́скирэ дадэ́скиро, и марэ́нпэ пал кхэр пэ́скирэ кхенингоскиро.”

⁴ Ёнэ хор страха́дынэ и пхэндлэ́: “Ѓа́да, дуй кра́лья на вытэрдинэ анги́л лэ́стэ, сыр амэ́нгэ тэ вытэрдёвас?”

⁵ И бичхадя́ барыдыро́ пэ кхэр крали́скиро, и форо́скиро барыдыро́, и пхурыдыра́, и опекуны кэ Ииу́ё тэ пхэнэ́н: “Амэ сом тырэ́ дына́рья, и со пхэнэ́са амэ́нгэ, дова́ и амэ кэра́са. Амэ никонэ́с на чхуваса крали́са; со исын лачхо́ ту́кэ, дова́ и кэр.

⁶ И чхиндя́ ёв кэ ёнэ лыл яви́р мо́ло дасаво: “Ко́ли тумэ́ сан мирэ́ и лав миро кандэ́на, тэды лэн шэрэ́ пэ́скирэ кхенингоскирэ чхавэ́нгирэ и явэ́н кэ мэ атася́ дрэ дава́ часо дро Изреелё. (Кралискирэн чхавэ́н сыс эфтадэша́ манушэ́н; барьякирдэ́ лэн славутна мануша́ дро фо́ро).

⁷ Ке́ли явдя́ кэ ёнэ лыл, ёнэ лынэ́ кралискирэн чхавэ́н, и запхусадэ лэн – эфтадэша́ манушэ́н, и чхудэ́ лэ́нгирэ шэрэ́ дрэ корзи́ны (кхудэ́), и бичхадэ́ кэ ёв дро Изреелё.

⁸ И явдя́ ману́ш, савэ́с бичхадэ́, и роспхэндя́ лэ́скэ, и пхэндя́: “Яндлэ́ шэрэ́ крали́скирэ чхавэ́нгирэ.” И пхэндя́ ёв: “Чхувэ́н лэн пэ дуй кучы, пашы́л загиибэ́н дро вуда́р, кэ зло́ко (ра́нко).”

⁹ Пэ зло́ко ёв выгия́, и тэрдия́, и пхэндя́ сарэ́ манушэ́нгэ: “Тумэ́ на сан бангэ́. Ѓа́да, мэ тэрдиём проти мирэ́ кхенинго́стэ и мулякирдём лэс; а лэн сарэ́н кон замардя́?

¹⁰ Джинэ́н акана́, со на пэрэ́ла пэ пхув ни екх Ра́скирэ-Дэвлэ́скиро лав, саво́ Ёв пхэндя́ пал кхэр Ахавоскиро; Рай Дэвэ́л кэрэ́ла дова́, со Ёв пхэндя́ пирда́л Пэ́скирэ писхаристэ Илиястэ.”

¹¹ И мулякирдя́ Иуё сарэ́н манушэ́н, савэ́ ячнэ́пэ Ахавоскирэ кхэрэ́стыр дро Изреелё, и сарэ́ барэ́ ран лэскирэн, и пашатунэ́ лэскирэн, и раша́н лэскирэн адя́кэ, со на яця́пэ лэ́стыр ни екхэ́с джидэс манушэ́с.

¹² И уштыя́, и гия́, и явдя́ дро Сама́рия. Ке́ли ёв гия́ пири́ дром пашы́л Беф-Екедо, кай джа́на чхупна́рья,

¹³ то стрэниндя Ииу́ё пшалэ́н Охозияскирэн, Юдэя́кирэ-кралискирэн, и пхэндя́: “Кон сан тумэ́?” Ёнэ отпхэндлэ́: “Амэ сам Охозияскирэ пша́ла, джа́са тэ уджинас пал састыпэн крали́скирэ-чхавэ́нгиро, и кхенингицакирэ-чхавэ́нгиро.”

¹⁴ И пхэндя́ ёв: “Лэн лэн джидэнца.” И лынэ́ лэн джидэнца, и запхусадэ лэн – штардэша́ дуй мануша́, пашы́л ґаны́нг Беф-Екедо, и на яця́пэ ние́кх лэ́ндыр.

¹⁵ И традыя́ ёв одотхы́р, и стрэниндяпэ Ионадавоса, Рихавоскирэ чхавэ́са, саво́ гия́ гил лэ́скэ, и дыя́ “добридим” лэ́скэ, и пхэндя́ лэ́скэ: “Ци пашто́ исын тыро́ ило́ адя́кэ, сыр миро ило́ кэ тыро́ ило́?” И пхэндя́ Ионадаво: “Адя́кэ.” “Ко́ли адя́кэ, тэды дэ тыро́ васт.” И дыя́ ёв пэ́скиро васт, и ґаздыя́ ёв лэс кэ пэ дро марибны́тко вурдэ́н.

¹⁶ И пхэндя́: “Традэ ма́нца и дыкх пэ миро чачипэ́н пал Растэ-Дэвлэ́стэ.” И чхудэ́ тэ бэшэ́л лэс дро марибны́тко вурдэ́н.

¹⁷ Сыр явдя́ Ииу́ё дрэ Сама́рия, ёв домардя́ сарэ́н манушэ́н, савэ́ ячнэ́пэ Ахавостэ дрэ Сама́рия адя́кэ, со сарэ́са вымардя лэс, пир Ра́скирэ-Дэвлэ́скиро лав, саво́ Ёв пхэндя́ Илияскэ.

¹⁸ И скэдыя́ Ииу́ё сарэ́ манушэ́н, и пхэндя́ лэ́нгэ: “Аха́во на́бут (куты́) дынариндя́ Ваалоскэ, Ииу́ё явэ́ла тэ дынаринэ́л лэ́скэ буты́р.

¹⁹ И адя́кэ кхарэ́н кэ мэ сарэ́н Ваалоскирэ пророкэ́н, сарэ́н лэ́скирэ бутярнэн и сарэ́н лэ́скирэ раша́н, соб (кай) нико́н тэ на явэ́л ишчо (инкэ́) вари-кай; пал-дова́ со ма́ндэ явэ́ла баро́ свэ́нто яныбэ́н Ваалоскэ. А кажно (сва́ко), кон на явэ́ла, на ячэ́лапэ джидо́.” Ииу́ё кэрдя́ дава́ мэндримаса, соб (кай) тэ марэл Ваалоскирэ бутярнэн.

²⁰ И пхэндя́ Ииу́ё: “Пхэнэ́н пал дывэ́с свэнкоскиро ваш скэдыибэ́н ваш Ваалоскэ.” И дынэ́ тэ джинэ́н пал скэдыибэ́н.

²¹ И бичхадя́ Ииу́ё пир саро́ Израилё; и явнэ́ сарэ́ Ваалоскирэ бутярнэ́: на яця́пэ ние́кх ману́ш, кон бы на явдя́; и загинэ́ дро Ваалоскиро кхэр, и яця́ пхэрдо́ Ваалоскиро кхэр ягоро́стыр (краёстыр) кэ яго́ро.

²² И пхэндя́ ёв иде́нгирэ ракхибнарискэ (хранителёскэ): “Ян и́дя ваш сарэ́нгэ Ваалоскирэ бутярнэнгэ.” И ёв яндя́ и́дя лэ́нгэ.

²³ И загия́ Ииу́ё Ионадавоса, Рихавоскирэ чхавэ́са, дро Ваалоскиро кхэр, и пхэндя́ Ваалоскирэ бутярнэнгэ: “Уджинэ́н и роздыкхэн, ци нанэ тумэ́ндэ вари-кон Ра́скирэ-Дэвлэ́скирэ бутярнэндыр, адя́кэ сыр ада́й мусинэн тэ явэ́н е́кх Ваалоскирэ дына́рья.”

²⁴ И лынэпэ ёнэ пал свэ́нто яныбэ́н и цэ́ло схачкирибэ́н. А Ииу́ё чхудя́ пал кхэр охтодэша́ манушэ́н и пхэндя́: “Одолэскиро ди, савэ́стыр зракхэ́лапэ вари-кон манушэ́ндыр, савэ́н мэ отда́ва тумэ́нгэ дрэ васта́, явэ́ла пэ штэ́то одолэскиро, кон зракхэ́лапэ.”

²⁵ Ке́ли кэрдо́ сыс цэ́ло схачкирибэ́н, пхэндя́ Ииу́ё манушэ́нгэ, савэ́ сы́гэс псирэ́на и барыдырэ́нгэ: “Джа́н, марэ́н лэн, соб (кай) ние́кх тэ на джал криг пэскэ.” И домардэ́ лэн куртала́са, и чхурдынэ́ лэн мануша́, савэ́ сы́гэс псирэ́на и барыдыра́, и гинэ́ дро фо́ро, кай сыс мангипнытко штэ́то Ваалоскиро.

²⁶ И вылыджинэ́ статулы Ваалоскирэ мангипнытконэ штэто́стыр, и схачкирдэ́ лэн.

²⁷ И розмардэ Ваалоскири статула, и роспхагирдэ́ Ваалоскиро мангипнытко штэ́то; и кэрдэ́ лэ́стыр штэ́то ваш шума, кэ дава́ дывэ́с.

²⁸ И вымардя Ииу́ё Ваалос Израилёскирэ пхувья́тыр.

²⁹ Усае́кх Еровоамоскирэ грэхэ́ндыр, Наватоскирэ-чхавэ́скирэ, саво́ лыджия́ Израилё дро грэ́хо, лэ́ндыр на отгия́ Ииу́ё, – сувнакунэ́ гурувэндыр, савэ́ сыс дро Вефи́лё, и савэ́ сыс дро Дано.

³⁰ И пхэндя́ Рай Дэвэ́л Ииуёскэ: “Пал-дова́, со ту илэ́са кэрдя́н, со сыс чачуно́ дрэ Мирэ́ якха́, кэрдя́н пэ Ахавоскиро кхэр саро́, со сыс пэ ило́ Ма́ндэ, тырэ́ чхаво́ кэ шта́рто ро́до явэ́на тэ бэшэ́н пэ Израилёскиро троно.”

³¹ Нэ Ииу́ё на стариндяпэ тэ псирэ́л пир Ра́скирэ-Дэвлэ́скиро, Дэвлэ́скирэ-Израилёскиро зако́но, сарэ́ илэ́стыр. Ёв на отгия́ Еровоамоскирэ грэхэ́ндыр, саво́ залыджия́ Израилё дро грэ́хо.

³² Дрэ долэ́ дывэса́ лыя́ Рай Дэвэ́л тэ отчхинэл паша́ Израильтянэндыр, и домардя́ лэн Азаило пэ сари́ Израилёскири риг.

³³ Пэ васто́ко Иорданостыр, сари́ пхув Галаадоскири, ро́дыцо Гадоскиро, Рувимоскиро, Манасия́скиро, лыи Ароэростыр, саво́ сыс пашы́л сы́гно рэ́кица (лэнори́) Арноно, и Галаа́до и Васа́но.

³⁴ Яви́р лав пал Ииуёстэ и пал саро́, со ёв кэрдя́, и пал муршканэ́ рэ́нды (подвиги) лэ́скирэ, исын зачхиндло́ дро Израилёскирэ-кралье́нгирэ бэршы́тка архи́вы.

³⁵ И пасия́ Ииу́ё пэ́скирэ дадэ́нца, и гарадэ́ лэс дрэ Сама́рия. И яця́ крали́са Иоахазо, лэ́скиро чхаво́, пэ штэ́то лэ́скиро.

³⁶ Ииу́ё кралиндя пэ Израилё, дро Сама́рия, биш тэ охто́ бэрш.