3 Kralip 9 - Библия - Пэ Балтитко Романи чиб (Романэс) 2019

¹ Пало́ (после) дова́, сыр Соломо́но кэрдя́ Ра́скирэ-Дэвлэ́скири Кхангири́ и крали́скиро кхэр и саро́, со Соломо́но камдя́ тэ кэрэ́л,

² то явдя́ дро суно́ Соломоно́скэ Рай Дэвэ́л яви́р мо́ло, сыр явдя́ лэ́скэ дро Гавао́но.

³ И пхэндя́ лэ́скэ Рай Дэвэ́л: “Мэ шундём па́тери (моли́тва) тыри́ и мангипэ́н тыро́, пал со ту мангдян Ман. Мэ обсвэнцындём дая́ Кхангири́, сави́ ту кэрдя́н, соб (кай) тэ явэ́л лав Миро одо́й дро ве́ко; и явэ́на якха́ Мирэ́ и ило́ Миро одо́й дрэ сарэ́ дывэса́.

⁴ И ко́ли ту явэ́са тэ псирэ́с анги́л муй Миро, сыр псирдя́ дад тыро́ Дави́до, дро жужо́ ило́ и дро чачипэ́н, кэр саро́, со Мэ ракирдём ту́кэ, и ко́ли явэ́са тэ ракхэ́с упхэныбэна́ Мирэ́ и зако́ны Мирэ́,

⁵ то тэды Мэ чхува́ва крали́скиро троно тыро́ пэ Израилё дро ве́ко; сыр Мэ пхэндём дадэ́скэ тырэ́скэ, Давидо́скэ, ракири́: ‘На пирилыджалапэ ту́тэ дро ро́до ману́ш, кон явэ́ла тэ бэшэ́л пэ троно Израилёскиро.’

⁶ Ко́ли тумэ́ и чхавэ́ тумарэ́ отджана Ма́ндыр, и тумэ́ на явэ́на тэ ракхэ́н припхэныбэна́ Мирэ́ и упхэныбэна́ Мирэ́, савэ́ Мэ дыём тумэ́нгэ, и джа́на, и лэ́на тэ дынаринэ́н явирэ дэвлорэ́нгэ и тэ мангэ́нпэ лэ́нгэ,

⁷ то тэды Мэ традава криг Израилё пхувья́тыр, сави́ Мэ дыём лэ́скэ, и Кхангири́, сави́ Мэ обсвэнциндём лавэ́са Мирэса, отрискирава мо́стыр Мирэстыр, и явэ́ла Израилё притчаса и сабнаса сарэ́ манушэ́ндэ.

⁸ И пал Кхангири́ дая́ вучи́, кажно, кон явэ́ла тэ проджал маму́й ла, страхадёла, и дэ́ла шоля (свиснинэла), и пхэнэ́ла: “Палсо́ Рай Дэвэ́л кэрдя́ адя́кэ далэ́ пхувья́са и далэ́ Кхангирьяса?”

⁹ И пхэнэ́на: “Палдова́, со ёнэ ячкирдэ́ Рас-Дэвлэ́с, пэ́скирэ Дэвлэ́с, Саво́ вылыджия́ лэ́нгирэ дадэн Египто́скирэ пхувья́тыр, и прилынэ́ явирэ дэвлорэ́, и мангнэпэ лэ́нгэ, и дынариндлэ́ лэ́нгэ, – пал дова́ яндя́ пэ лэ́ндэ Рай Дэвэ́л сари́ дая́ би́да.”

¹⁰ И сыс адя́кэ: сыр (накхлэ) прогинэ́ биш бэрш, дрэ савэ́ Соломо́но кэрдя́ дуй кхэра́, – Дэвлэ́скиро Кхэр (Кхангири́) и крали́скиро кхэр,

¹¹ ваш савэ́ о Хирамо, кра́ли Тироскирэ, янэлас Соломоно́скэ вэша́ (дрэвы) кедрытка кашта́ и вэша́ кипарисытка и сувнака́й, пир лэ́скиро ило́, – кра́ли Соломо́но дыя́ Хирамоскэ биш фо́рья пэ Галилеякири пхув.

¹² И выгия́ Хирамо Тиростыр тэ обдыкхэл фо́рья, савэ́ дыя́ лэ́скэ Соломо́но; и ёнэ на сыс пир ило́ лэ́скэ.

¹³ И пхэндя́ ёв: “Со исын далэ́ фо́рья, савэ́ ту, миро пшал, дыя́н ма́нгэ?” И кхардян лэн пхувья́са Кавуло, сыр кхарэнапэ ёнэ кэ дава́ дывэ́с.

¹⁴ И бичхадя́ Хирамо крали́скэ шэл тэ биш тала́нты сувнака́й.

¹⁵ Ѓа́да, исын упхэныбэ́н пал намирья (подать), саво́ чхудя́ кра́ли Соломо́но, соб (кай) тэ кэрэ́л Ра́скирэ-Дэвлэ́скири Кхангири́ и кхэр пэ́скиро, и Мило (квартало) дро Ерусалимо, и ва́нта Ерусалимо́скири, Гацоро, и Мегидо, и Газеро.

¹⁶ О фарао́но, Египто́скиро кра́ли, явдя́ и лыя́ Газе́ро, и хачкирдя́ лэс яга́са, и Хананеен, савэ́ дживдэ́ дро фо́ро, мулякирдя́, и отдыя́ лэс дро пасаго чхакэ пэскирьякэ, Соломоно́скирэ ромнякэ.

¹⁷ И кэрдя́ Соломо́но Газеро и тэлатуно Бефороно;

¹⁸ И Валафо и Фадморо пэ чхучи́ пхув дрэ Юдэ́я.

¹⁹ И сарэ́ фо́рья ваш запасы, савэ́ сыс Соломоностэ, и фо́рья ваш марибны́тка вурдына́, и фо́рья ваш грэнгэ пэ савэ́ традэ́на уклистэ́, и саро́ дова́, со Соломо́но камдя́ тэ кэрэ́л, дро Ерусалимо и пэ Лива́но и пэ сари́ пхув, пэ сави́ ёв сыс хула́й.

²⁰ Сарэ́ мануша́, савэ́ ячнэ́пэ Аморее́ндыр, Хетее́ндыр, Ферезее́ндыр, Евее́ндыр и Евусее́ндыр, савэ́ сыс на Израилёскирэ чхавэ́ндыр.

²¹ Чхавэ́н лэнгирэн, савэ́ ячнэ́пэ пало́ лэ́ндэ пэ пхув, савэ́н Израилёскирэ чхавэ́ на могиндлэ́ тэ традэ́н пэ́стыр, Соломо́но кэрдя́ андынаршчыкэнца кэ дава́ дывэ́с.

²² Израилёскирэ чхавэ́н Соломо́но на кэрдя́ бутярнэнца; нэ ёнэ сыс лэ́скирэ халадэ́, лэ́скирэ слу́ги (дына́рья), лэ́скирэ упратунэ, лэ́скирэ халадэ́нгирэ барыдыра́ и шэралэ́ пэ лэ́скирэ марибны́тка вурдэна́ и лэ́скирэ мануша́, савэ́ сыс уклистэ́ пэ грэ́ндэ.

²³ Ѓа́да, сыс барыдыр упратунэ (приставники) пэ Соломоно́скирэ бутя́: савэ́ дыкхнэ́ пал манушэ́ндэ, савэ́ кэрдэ́ бутя́, сыс панджшэла́ пандждэша́ мануша́.

²⁴ Чхай фараоноскири пиригия Давидо́скирэ форо́стыр дро пэ́скиро кхэр, саво́ кэрдя́ ваш ла́кэ Соломо́но; пал дова́ кэрдя́ ёв Мило.

²⁵ И янэ́ла Соломо́но трин мо́лы дрэ бэрш саро́ схачкирибэ́н и мирна свэ́нта дыибэна́ Ра́скэ-Дэвлэ́скэ пэ алта́рё, саво́ ёв кэрдя́ Ра́скэ-Дэвлэ́скэ, и хачкирдя́ гудлэ́ смо́лы пэ лэ́стэ анги́л Растэ-Дэвлэ́стэ. И закончындя ёв тэ кэрэ́л кхэр.

²⁶ Кра́ли Соломо́но адя́кэ-паць кэрдя́ па́рма (кораблё) дрэ Ецыон-Гаверо, со исын пашы́л Елафа, пэ Лоло́ морёскиро (дэрьявэ́скиро) брэ́го, пэ Идумеякири пхув.

²⁷ И бичхадя́ Хирамо пэ па́рма пэ́скирэ отдынэ́ дынарье́н, савэ́ джинэнас мо́рё (дэрья́в), Соломоно́скирэ дынарье́нца.

²⁸ И гинэ́ ёнэ дро Офиро, и лынэ́ одотхы́р сувнака́й штаршэла́ биш тала́нты, и яндлэ́ крали́скэ Соломоно́скэ.