3 Kralip 22 - Библия - Пэ Балтитко Романи чиб (Романэс) 2019

¹ И прогинэ́ (накхлэ) ишчо (инкэ́) трин бэрша́, и на сыс марибэ́н машки́р Сирия (Арамея) и Израиле.

² Пэ три́то бэрш гия́ о Иосафа́то, кра́ли пэ Юдэ́я; кэ кра́ли Израилёскиро.

³ И пхэндя́ кра́ли пэ Израилё пэ́скирэ дынарье́нгэ: “Ци джинэ́на тумэ́, со Рамо́фо, со исын пэ Галаа́до, исын амаро́? Амэ адя́кэ ґара́ сам штыл, и амэ на отласа лэс вастэ́стыр Сириякирэ крали́стыр.

⁴ И пхэндя́ ёв Иосафатоскэ: “Ци джа́са ту ма́нца пэ мэрибэ́н проти Рамо́фо Галаадоскиро?” И пхэндя́ Иосафа́то крали́скэ Израилёстыр: “Сыр ту, адя́кэ и мэ, сыр тырэ́ мануша́, адя́кэ и мирэ́ мануша́; сыр тырэ́ граё, адя́кэ и мирэ́ граё.”

⁵ И отпхэндя́ Иосафа́то крали́скэ пэ Израилё: “Пхучпэ ададывэ́с, со пхэнэ́ла Рай Дэвэ́л?”

⁶ И кэдыя кэ пэ кра́ли Израилёскиро пророкэ́н, пашы́л штаршэла́ манушэ́н, и пхэндя́ лэ́нгэ: “Ци тэ джав ма́нгэ марибна́са пэ Рамо́фо Галаадостыр, ци тэ обрикирав пэс?” Ёнэ пхэндлэ́: “Джа́, Рай Дэвэ́л отдэ́ла лэс дрэ васта́ крали́скирэ.”

⁷ И пхэндя́ Иосафа́то: “Ци исын ада́й ишчо (инкэ́) проро́ко, соб (кай) амэ́нгэ тэ выпхучаспэ лэ́стыр?”

⁸ И пхэндя́ кра́ли Израилёскиро Иосафатоскэ: “Исын екх ману́ш, о Михеё, чхаво́ Емвлаёскиро [Имлахо-ю.о.], пирда́л конэ́стэ сашты́ тэ пхучас Ра́стыр-Дэвлэ́стыр, нэ мэ на кама́м лэс, пал-дова́ со ёв ангилпхэнэла (пророчынэла) налачхипэн, а екх фуипэ́н!” И пхэндя́ Иосафа́то: “На ра́кир, кра́лё, адя́кэ!”

⁹ Тэ́ньци кра́ли Израилёскиро кхардя́ кэ пэ екхэ евнухос (кон сыс дына́ри дро кхэр), и пхэндя́: “Джа́ сыгэды́р пал Михеёстэ, кон исын чхаво́ Емфлаёскэ!”

¹⁰ О кра́ли Израилёскиро, и Иосафа́то, кра́ли Юдэя́киро, сыс бэштэ́ кажно пэ пэ́скиро троно, и сыс уридэ́ дрэ кралитка и́ди (ризы) пэ баро́ откэрдо штэ́то пашы́л по́рта тэ заджас дрэ Сама́рия, и сарэ́ проро́ки ангилпхэнэнас анги́л лэ́ндэ.

¹¹ И кэрдя́ пэ́скэ о Сэдэки́я, Хенаанаскиро чхаво́, саструнэ́ шынга́ (ро́ги), и пхэндя́: “Лэ́нца выпихинэса (вышпулэса) Сириянэн (Арамейцэн) пака ту хасякирэса лэн.”

¹² И сарэ́ проро́ки ангилпхэнэнас дова́-паць, ракири́: “Джа́ пэ Рамо́фо, со исын пэ Галаа́до, ту пиризорьякирэса, о Рай Дэвэ́л отдэ́ла лэс дрэ васт крали́скиро.”

¹³ О бичхадо́ ману́ш, саво́ гия́ тэ кхарэл Михеёс, ракирэ́ла лэ́скэ: “Акана́ проро́ки со кэ екх ангилпхэнэнас лачхипэ́н крали́скэ; мэк и тэ явэ́л тыро́ лав дасаво, сыр кажно (сва́ко) лав лэ́ндыр, ангилпхэн и ту вари-саво́ лачхипэ́н.”

¹⁴ И пхэндя́ Михе́ё: “Тэ явэ́л джидо́ пэ ве́ки Рай Дэвэ́л! Мэ пхэна́ва дова́, со пхэнэ́ла ма́нгэ Рай Дэвэ́л.”

¹⁵ Тэ́ньци явдя́ ёв кэ кра́ли. О кра́ли пхэндя́ лэ́скэ: “Михе́е! Ци тэ джав амэ́нгэ марибна́са пэ Рамо́фо Галаадостыр, ци над?” И пхэндя́ Михе́е лэ́скэ: “Джа́, ту пиризорьякирэса, Рай Дэвэ́л отдэ́ла лэс дрэ васт тыро́.”

¹⁶ И пхэндя́ лэ́скэ кра́ли: “Кицы́ мо́лы мэ тэ засовлахав тут, соб (кай) ту тэ на ракирэ́с ничы́ ма́нгэ апри́ч чачипнастыр дро лав Ра́скирэ-Дэвлэ́скиро.”

¹⁷ И пхэндя́ Михе́ё: “Мэ дыкхцем сарэ́ Израильтянэ́н, савэ́ сыс росчхурдынэ, сыр бакрэ́, савэ́ндэ на сыс чхупнарис. И пхэндя́ Рай Дэвэ́л: “Лэ́ндэ нанэ барыдырэ́с, мэк ёнэ тэ джа́н пэ́скэ раманёса (миро́са) кажно (сва́ко) дро пэ́скиро кхэр.’”

¹⁸ И пхэндя́ Аха́во, кра́ли Израилёскиро, Иосафатоскэ: “Ци на пхэндём мэ ту́кэ, со ёв на ангилпхэнэла пал ма́ндэ лачхипэ́н, а екх фуипэ́н?”

¹⁹ И пхэндя́ Михе́ё: “Пал-дова́ шун лав Ра́стыр-Дэвлэ́стыр: мэ дыкхцём Рас-Дэвлэ́с, Саво́ сыс бэшто́ пал Лэ́скиро троно, и сарэ́ янголы и ду́хи болыбна́скирэ сыр халадыпэн сыс тэрдэ́ пашы́л Лэ́стэ, пир чачи́ и пир зэ́рво (ле́во) васт Лэ́стыр.

²⁰ И пхэндя́ Рай Дэвэ́л: “Кон тэ уракирэл Ахавос, соб (кай) ёв тэ джал и тэ пэрэ́л пэ Рамо́фо Галаадоскиро?” И екх ракирдя́ адя́кэ, яви́р ракирдя́ явирчанэс.

²¹ И екх ду́хо (фа́но) гия́ анги́л, тэрдия́ анги́л муй Ра́скиро-Дэвлэ́скиро и пхэндя́: “Мэ уракирава лэс.” И пхэндя́ лэ́скэ Рай Дэвэ́л: “Со́са?”

²² Ёв отпхэндя́: “Мэ выджава и ячавапэ хоханэ́ духо́са пэ ушта́ сарэ́ пророкэ́ндэ.” О Рай Дэвэ́л пхэндя́: “Ту уракирэса лэс и лэ́са упралыпэ́н пэ дава́; джа́ и кэр адя́кэ.”

²³ И, акэ, акана́ Рай Дэвэ́л чхудя́ хохано́ ду́хо (фа́но) пэ ушта́ сарэ́ далэ́стыр пророкэ́ндэ, нэ Рай Дэвэ́л выпхэндя бари биба́хт пал ту́тэ.”

²⁴ И тэ́ньчи подги́я Сэдэки́я, Хенаанаскиро чхаво́, и пэкадя́ Михеёс дрэ чам (шчока), пхэни́: “Кай, сыр дава́ акана́ отгия́ ма́ндыр Ду́хо (Фа́но) Ра́стыр-Дэвлэ́стыр, соб (кай) тэ ракирэ́л ту́тыр?”

²⁵ И пхэндя́ Михеё: “Чачэс, ту явэ́са тэ дыкхэ́с дрэ дава́ дывэ́с, ке́ли ту явэ́са тэ прастас екхэ штубатыр дрэ яви́р, соб (кай) тэ ґарадёс.”

²⁶ И пхэндя́ Аха́во, кра́ли Израилёскиро: “Лэн Михеёс и лыджа́н лэс кэ Ама́но кэ барыдыро́ пэ фо́ро, и кэ Иоа́со, кэ чхаво́ крали́скиро.

²⁷ И пхэнэ́н, “Адя́кэ ракирэ́ла кра́ли: ‘Чхувэ́н далэ́ манушэ́с дрэ бэшыбэн и чалякирэн лэс скэмпэс и панякирэн скэмпэс, пака мэ рисёва́ва раманёса (миро́са).’

²⁸ И пхэндя́ Михеё: “Ко́ли ту рисёса дро рама́нё, то дава́ на Рай Дэвэ́л ракирдя́ дрэ ма́ндэ.” И ишчо (инкэ́) пхэндя́ ёв: “Шунэ́н ман, сарэ́ мануша́лэ!”

²⁹ И гия́ кра́ли Израилёскиро Аха́во и кра́ли Юдэя́киро Иосафа́то кэ Рамо́фо пэ Галаа́до.

³⁰ И пхэндя́ кра́ли Израилёскиро Иосафатоскэ: “Мэ пириурьявапэ, соб (кай) тэ на ґалён ман, а ту ури пэ́скирэ кралитка и́ди (ризы).”

³¹ О кра́ли Сирия́киро припхэндя́ пхурыдырэнгэ пэ марибны́тка вурдэна́, савэ́ сыс лэ́стэ трия́нда дуй, пхэндя́: “На марэ́нпэ ни тыкнэса, ни барэса, а екхэ крали́са Израилёскирэса.”

³² Э пхурыдыра́ пэ марибны́тка вурдэна́, сыр дыкхнэ́ Иосафатос, подуминдлэ: “Чачо́, дава́ исын кра́ли Израилёскиро” и ёнэ рисинэ́ пэ лэ́стэ, соб (кай) тэ марэ́нпэ лэ́са. И дыя́ го́дла Иосафа́то.

³³ Пхурыдыра́ пэ марибны́тка вурдэна́, дыкхи́, со дава́ нанэ кра́ли Израилёскиро, рисинэ́ лэ́стыр.

³⁴ И сыс адя́кэ, со екх ману́ш оттырдыя пэ́скиро лу́ко би мыслякиро, и ёв дошадя крали́с Израилёскирэс, попыи машки́р шовы дрэ кольчуга. И пхэндя́ кра́ли пэ́скирэ фурманоскэ: “Рисёв палэ и вылыджа ман марибнастыр, пал-дова́ со ман дукхадэ (раниндлэ).”

³⁵ Нэ марибэ́н яця́ зоралэды́р дро дова́ дывэ́с, и о кра́ли сыс тэрдо́ дрэ пэ́скиро марибны́тко вурдэ́н проти Сирия, и мыя́ бэльвэле́, и рат франсостыр (ранатыр) тхадэлас дро марибны́тко вурдэ́н.

³⁶ И сыр кхам джа́лас тэлэ́, то го́дла прогия́ пир саро́ халадыбэ́н: “Кажно джа́ дрэ пэ́скиро фо́ро, кажно пэ пэ́скири пхув.”

³⁷ Адя́кэ мыя́ кра́ли и лэс яндлэ́ дрэ Сама́рия, и гарадэ́ крали́с дрэ Сама́рия.

³⁸ И вымордэ марибны́тко вурдэ́н дрэ вэндэри (прудо), и джукэла чардэ рат лэ́скиро и биладжакунэ́ джувля́ обморэнас вурдэ́н пир лав Ра́скиро-Дэвлэ́скиро, саво́ Ёв выпхэндя.

³⁹ Яви́р рэ́нды Ахавоскирэ, саро́, со ёв кэрдя́, и кхэр слонытконэ кокалостыр, саво́ ёв чхудя́ и сарэ́ фо́рья, со ёв чхудя́, исын зачхиндлэ́ дрэ бэршы́тка архи́вы пал кралье́ндэ Израилёстыр.

⁴⁰ И гарадэ́ Ахавос пэ́скирэ дадэ́нца и яця́ тэ кралинэ́л Охозия, чхаво́ лэ́скиро, пэ штэ́то лэ́скиро.

⁴¹ О Иосафа́то, чхаво́ Асакиро яця́ тэ кралинэ́л пэ Юдэ́я, ке́ли сыс шта́рто бэрш Ахавоскирэ кралипнаскэ, сыр ёв яця́ кра́ли пэ Израилё.

⁴² Иосафатоскэ сыс трия́нда пандж бэрш, сыр ёв яця́ тэ кралинэ́л, и ёв кралиндя биш тэ пандж бэрш дро Ерусалимо. Лэ́скирэ-да́киро лав сыс Азува, чхай Салаилоскэ.

⁴³ Ёв кэрдя́ саро́, сыр лэ́скиро дад Аса́, ёв на рисёлас далэ́ дромэ́стыр, кэри со сыс лачхо́ анги́л якха́ Ра́скирэ-Дэвлэ́скирэ. Екх со вучипэна́ на сыс отпарудэ, мануша́ ишчо (инкэ́) янэ́нас свэ́нта дыибэна́ и хачкирэнас дро́га смо́лы пэ вучипэна́.

⁴⁴ Иосафа́то кэрдя́ доракирибэ́н Ахавоса, крали́са пэ Израилё,

⁴⁵ Яви́р рэ́нды Иосафатоскирэ, и лэ́скирэ славутна кэрибэна и, сыр ёв мардя́пэ, исын зачхиндлэ́ дрэ бэршы́тка архи́вы пал кралье́ндэ Юдэя́тыр.

⁴⁶ И одолэ́ содомитка (блудники), кон яця́пэ джидо́ дрэ дывэса́ Асаскирэ, саво́ сыс дад лэ́скэ, ёв традыя́ яври́ тхэмэстыр.

⁴⁷ Дрэ Идумея (Эдо́мо) на сыс кра́ли; нэ сыс крали́скиро чачэ́-вастытко (наместнико).

⁴⁸ Иосафа́то кэрдя́ па́рмы (корабли) пир мо́рё (дэрьява́), соб (кай) тэ плывинэн (тэ дэн плима) дро Офиро пал сувнака́й.

⁴⁹ Тэньці пхэндя́ Охозия, чхаво́ Ахавоскиро Иосафатоскэ “Мэк мирэ́ дына́рья тэ джа́н тырэ́ дынарье́нца пэ па́рмы.” Нэ Иосафа́то на камдя́.

⁵⁰ И чхудэ́ Иосафатос сыр ёв мыя́, лэ́скирэ дадэ́нца дро фо́ро Давидо́скиро, пэ́скирэ-дадэ́скиро. И яця́ тэ кралинэ́л Иора́мо, лэ́скиро чхаво́, пэ штэ́то лэ́скиро.

⁵¹ Охозия, чхаво́ Ахавоскиро яця́ тэ кралинэ́л пэ Израилё дрэ Сама́рия, сыр сыс дэшуэфтато бэрш Иосафатоскэ, крали́скэ пэ Юдэ́я, сыр ёв яця́ тэ кралинэ́л, и кралиндя ёв пэ Израилё дуй бэрш.

⁵² И кэрдя́ ёв налачхэ́с анги́л якха́ Ра́скирэ-Дэвлэ́скирэ, и кэрдя́ саро́, сыр лэ́скиро дад и сыр лэ́скири дай, и псирдя́ Еровоамоскирэ дромэ́са, кон сыс чхаво́ Наватоскэ, саво́ залыджия́ Израилё дро грэ́хо.

⁵³ Ёв дынариндя́ Ваалоскэ, и ёв дэ́лас паты́в лэ́скэ, и холякирдя Рас-Дэвлэ́с, Дэвлэ́с Израилёскирэс далэ́са-паць, со кэрдя́ дад лэ́скиро.