3 Kralip 21 - Библия - Пэ Балтитко Романи чиб (Романэс) 2019

¹ И пал одолэ́ сарэ́ рэ́нды сыс адя́кэ: Навуфеёстэ, саво́ сыс Изреельтянино, сыс винагра́днико (дракх) пашы́л бари фэлатин/колов (дворцо) Ахавоскири, саво́ сыс кра́ли пэ Израиле.

² И пхэндя́ Аха́во Навуфеёскэ дасавэ́ лава́: “Отдэ́ ма́нгэ пэ́скиро винагра́днико; соб (кай) ма́нгэ тэ кэра́в лэ́стыр шахитко у́нта (овошытко садо); пал-дова́ со ёв исын пашы́л миро кхэр, и мэ да́ва ту́кэ винагра́днико фэды́р кадалэстыр, ци, ко́ли дава́ здэлапэ мишто́ ту́кэ, то мэ да́ва ту́кэ руп, кицы́ ёв исын мол.”

³ Нэ Навуфеё пхэндя́ Ахавоскэ: “О Рай Дэвэ́л припхэндя́ ма́нгэ тэ на отдав ту́кэ мэкно́ миштыпэ́н мирэ́ дадэндыр.”

⁴ И явдя́ кхэрэ́ Аха́во холямэ́ и киркэ мо́са далэ́ лавэ́стыр, со пхэндя́ лэ́скэ Навуфеё, саво́ сыс Изреельтянино, ракири́: “На отда́ва мэ ту́кэ мэкно́ миштыпэ́н мирэ́ дадэндыр.” И пасия́ ёв пэ пэ́скиро чхуибэ́н, и отрискирдя муй пэ́скиро, и маро́ на хая.

⁵ И загия́ кэ ёв лэ́скири ромны́ э Езавель, и пхэндя́ лэ́скэ: “Со́скэ тыро́ ду́хо холямо́, со ту на хаса маро́?”

⁶ Ёв пхэндя́ ла́кэ: “Ке́ли мэ яцём тэ ракира́в Навуфеёскэ Израильтяниноскэ, и пхэндём лэ́скэ: ‘Отдэ́ ма́нгэ винагра́днико тыро́ пал руп, ци, ко́ли камэ́са, мэ да́ва ту́кэ яви́р винограднико пал лэ́стэ,’ то тэды ёв пхэндя́: ‘На отда́ва ту́кэ миро винагра́днико.’”

⁷ И Езавель, ромны́ лэ́скири, пхэндя́ лэ́скэ: “Со дасаво кралипэ́н исын, ко́ли ту адя́кэ кэрэ́са? Ушты́, ха маро́ и яв штыл; мэ да́ва ту́кэ винагра́днико Навуфеёскиро Изреелитяниноскиро.”

⁸ И чхиндя́ ёй лыла́ Ахавоскирэ лавэ́стыр, и ёй запечатындя лэн Ахавоскирэ барэ́ ангрустяса, и ей бичхадя́ далэ́ лыла́ пхурыдырэнгэ и лачхэ́-родоскирэ манушэ́нгэ дро лэ́скиро фо́ро, савэ́ дживдэ́ Навуфеёса.

⁹ Дрэ лыла́ чхиндя́ ёй адя́кэ: “Пхэнэ́н анги́л сарэ́ндэ пал посто, и чхувэ́н Навуфеёс пэ пэ́рво штэ́то машки́р манушэ́ндэ;

¹⁰ и чхувэ́н дуе́н манушэ́н, злыднен, маму́й проти лэ́стэ, савэ́ досыкавэнас пэ лэ́стэ, пхэни́: “Ту калякирдян Дэвлэ́с и крали́с; а тэ́ньчи лыджа́н лэс яври́, и домарэн лэс барэ́нца, соб (кай) ёв тэ мэрэ́л.”

¹¹ Адя́кэ кэрдэ́ мурша́ форо́скирэ, пхурыдыра́ и лачхэ́-родоскирэ мануша́, савэ́ дживдэ́ дро лэ́скиро фо́ро, сыр припхэндя́ э Езавель лэ́нгэ, адя́кэ, сыр сыс чхиндло́ дрэ лыла́, савэ́ ёй бичхадя́ лэ́нгэ.

¹² Ёнэ пхэндлэ́ анги́л сарэ́ндэ пал посто, и чхудэ́ Навуфеёс барэ́ патыва́са машки́р манушэ́ндэ.

¹³ И дуй мануша́, злыдни, бэшнэ́ маму́й лэ́стэ, и лынэ́ тэ досыкавэн пэ лэ́стэ далэ́ налачхэ́ мануша́ анги́л манушэ́ндэ, и ракирдэ́: “Навуфеё калякирдя Дэвлэ́с и крали́с.” И лыджинэ́ лэс пал фо́ро, и домардэ́ лэс барэ́нца, и мыя́ ёв.

¹⁴ И бичхадэ́ тэ́ньчи кэ Езавель, пхэни́: “Навуфеё домардо барэ́нца и ёв мыя́.”

¹⁵ И сыс адя́кэ: ке́ли Езавель шундя́, со Навуфеё домардо барэ́нца и мыя́, то пхэндя́ ёй Ахавостэ. “Ушты́, лэ пэ́скэ винагра́днико Навуфеёскиро, саво́ сыс Изреельтянино, кон на камдя́ тэ дэл ту́кэ пало́ руп, пал-дова́ со Навуфеё исын наджидо, ёв мыя́.”

¹⁶ Сыр шундя́ Аха́во, со Навуфеё сыс домардо, то уштыя́ Аха́во, соб (кай) тэ джал дро винагра́днико Навуфеёскиро, саво́ сыс Езреелёстыр, соб (кай) тэ лэл лэс пэ́скэ.

¹⁷ И сыс лав Илияскэ Ра́стыр-Дэвлэ́стыр, кон сыс Фесвоностыр:

¹⁸ “Ушты́, джа́ гил Ахавоскэ крали́скэ пэ Израилё, саво́ исын дрэ Сама́рия; акэ, ёв акана́ исын дрэ винагра́днико Навуфеёскиро, соб (кай) тэ лэл лэс пэ́скэ.

¹⁹ И пхэн лэ́скэ: ‘Адя́кэ ракирэ́ла Рай Дэвэ́л: Ту замардян, и ту ишчо (инкэ́) лэ́са дро мэкно́ миштыпэ́н пэ́скэ?’ И пхэн лэ́скэ: ‘Пэ дова́ штэ́то, кай джукэла чардэ рат Навуфеёскиро, джукэла явэ́на тэ чарэн и тыро́ рат.’”

²⁰ И пхэндя́ Аха́во Илияскэ: “Латхян ту ман, вэ́рго миро!” Ёв пхэндя́: “Латхём, пал-дова́ со ту отдыян пэс адя́кэ, со ту кэрэ́са фуипэ́н анги́л якха́ Ра́скирэ-Дэвлэ́скирэ.”

²¹ Адя́кэ ракирэ́ла Рай Дэвэ́л: ‘Ѓа́да, Мэ яна́ва бари би́да, и Мэ вышулавава тыро́ ро́до пал ту́тэ, и Мэ хасякира́ва Ахавостэ кажнонэ́ муршорэс дро Израилё, и одолэ́с, кон исын дрэ наволя и исын пэ во́ля.

²² И Мэ кэра́ва тырэ́ кхэрэса адя́кэ, сыр Мэ кэрдём кхэрэса Еровоамоскирэса, кон сыс чхаво́ Наватоскиро, и сыр кхэрэса Ваасаскирэса, кон сыс чхаво́ Ахииноскиро, пал-дова́, со тумэ́ сыкадэ бипатыв, савья́са ту холякирэсас Ман и со́са ту яндян Израилё дро грэ́хо.’

²³ Адя́кэ и пал Езавелятэ пхэндя́ Рай Дэвэ́л: ‘Джукэла ха́на Езавель пал ва́нта Изреелёскири.’

²⁴ Кон мэрэ́ла Ахавостэ дро фо́ро, одолэ́с схана джукэла; а кон мэрэ́ла пэ фэ́лда, одолэ́с чирикля́ болыбны́тка росклюинэна.”

²⁵ На сыс ишчо (инкэ́) адасавэс, сыр Аха́во, саво́ отдыя́ пэс тэ кэрэ́л злыднитка рэ́нды анги́л якха́ Ра́скирэ-Дэвлэ́скирэ, кэ со лэс подмарэлас лэ́скири ромны́ Езавель.

²⁶ Ёв кэрдя́ древа́н брытка рэ́нды, ке́ли джа́лас пал и́долы, сыр кэрдэ́ Амореи, конэ́с о Рай Дэвэ́л традыя́ криг мо́стыр чхавэ́ндыр Израилёскирэн.”

²⁷ И сыс адя́кэ: сыр Аха́во вышундя далэ́ лава́, то ёв роскусця и́ди пэ́скирэ, и причхудя гоно́ праскаса пэ маса́ пэ́скирэ, и постиндя ёв, и сыс суто́ дро гоно́, и ёв псирдя́ пхарэ́ минаса.

²⁸ И сыс лав Ра́скирэ-Дэвлэ́скиро Илияскэ Фесвоностыр; и пхэндя́ Рай Дэвэ́л:

²⁹ “Ци дыкхэ́са, сыр Аха́во тыкнякирдя пэс анги́л Ма́ндэ? Пал-дова́ со о Аха́во тыкнякирдя пэс анги́л Ма́ндэ, то Мэ на ява́ва тэ янав бари би́да пэ кхэр лэ́скиро, нэ Мэ яна́ва бари би́да дрэ дывэса́ чхавэ́скирэ лэ́скирэ.”