3 Kralip 19 - Библия - Пэ Балтитко Романи чиб (Романэс) 2019

¹ И роспхэндя́ Аха́во Езавелякэ, саро́, со кэрдя́ о Или́я, и адя́кэ-паць дова́, со ёв мулякирдя́ сарэ́ пророкэ́н куртала́са.

² И тэды бичхадя́ э Езавель манушэ́с тэ пиридэл Илияскэ: “Мэк дова́ и дова́ тэ кэрэ́н ма́нгэ дэвлорэ́, ко́ли мэ кэ атася́ на кэра́ва тырэ́ деса дова́, со кэрдя́н ту деса кажнонэса (сваконэса) лэ́ндыр.”

³ Ке́ли Или́я дыкхця́ дава́, то ёв уштыя́ и гия́, соб (кай) тэ ракхэ́л пэ́скиро джиибэ́н, и ёв явдя́ дрэ Вирса́вия, сави́ исын дрэ Юдэ́я, и мэкця́ лэ́скирэ тэрнэ́ дынари́с одо́й.

⁴ И гия́ ёв пэ чхучи́ пхув пэ цэ́ло дывэ́с, и явдя́, и бэсця́ тэл вэрэсытко хру́сто. И ёв мангдя́пэ Ра́скэ-Дэвлэ́скэ, соб (кай) ёв, тэ мэрэ́л, и пхэндя́: “Ухты́лла (до́си) ужэ ма́нгэ, Раё Дэ́вла, лэ миро джиибэ́н, пал-дова́ со мэ на сом фэды́р мирэ́ дадэндыр.”

⁵ Тэ́ньци ёв пасия́, и засутя тэл вэрэсытко хру́сто. И, акэ, Янго́ло чиладя́ лэс и пхэндя́: “Ушты́, ха.”

⁶ И Или́я дыкхця сыгэс, и, акэ, пашы́л лэ́скиро шэро́, сыс пэкны мариклы, и кхоро́ пане́са. Ёв хая, пия чалэ́с, и нэвэ́стыр засутя.

⁷ И Янго́ло Ра́скирэ-Дэвлэ́скиро явдя́ яви́р мо́ло, и чиладя́ лэс и пхэндя́: “Ушты́, ха; пал-дова́ со баро́ дром трэй тэ джас ту́кэ.”

⁸ Адя́кэ ёв уштыя́, и хая, и пия, и сыр ёв хая дова́ хабэ́н, то гия́ штардэша́ дывэса́ и штардэша́ ратя кэ бэ́рга Дэвлэ́скири, Хориво.

⁹ И гия́ ёв дрэ ґеба́р (пешчэра) одо́й, и ратькирдя одо́й. И, акэ, сыс лав Рэстыр-Дэвлэ́стыр лэ́скэ, и пхэндя́ лэ́скэ Рай Дэвэ́л: “Со кэрэ́са ту ада́й, Или́я?”

¹⁰ Ёв пхэндя́: “Захачиём мэ пал Растэ-Дэвлэ́стэ пал болыбна́скирэ-янголэнгирэстэ; пал-дова́ со чхавэ́ Израилёскирэ мэкнэ́ Тыро́ заве́то, алта́ри Тырэ́ роспхагирдэ́ и замардэ́ Тырэ́ пророкэ́н куртала́са; и мэ яцёмпэ екхджино́, нэ ёнэ родэ́на тэ отлэн миро джиибэ́н.”

¹¹ И пхэндя́ Рай Дэвэ́л: “Джа́ анги́л и тэрдёв анги́л Миро муй. И, акэ, Рай Дэвэ́л проджа́ла, и бари и зоралы́ балва́л, сави́ явэ́ла тэ роскушэл бэ́рги, и сави́ явэ́ла тэ пхагирэл скалы анги́л Растэ-Дэвлэ́стэ; нэ Рай Дэвэ́л нанэ дрэ балва́л. Пало́ балва́л явэ́ла издраны пхувья́кири, нэ Рай Дэвэ́л нанэ дрэ издраны пхувья́кири.

¹² Пало́ издраны явэ́ла пхувья́кири яг, нэ Рай Дэвэ́л нанэ дрэ яг. Пало́ яг явэ́ла занори (глосори) балвалякири.”

¹³ И сыс адя́кэ: ке́ли Или́я шундя́, то ёв учхакирдя́ пэ́скиро муй лэ́скирэ плашчоса, и выгия́, и тэрдия́ пашы́л загиибэ́н дрэ ґеба́р (пешчэра). И сыс сы́рбы занори (глосори) лэ́скэ, и пхэндя́ лэ́скэ: “Со кэрэ́са ту ада́й, Или́я?”

¹⁴ И пхэндя́ ёв: “Захачиём мэ пал Растэ-Дэвлэ́стэ, пал болыбна́скирэ-янголэнгирэстэ, пал-дова́ со чхавэ́ Израилёскирэ мэкнэ́ Тыро́ завето, алта́ри Тырэ́ роспхагирдэ́ и замардэ́ Тырэ́ пророкэ́н куртала́са; и мэ яцёмпэ екхджино́, нэ ёнэ родэ́на тэ отлэн миро джиибэ́н.”

¹⁵ И пхэндя́ лэ́скэ Рай Дэвэ́л: “Джа́ палэ пэ́скирэ дромэ́са дро Дама́ско; и, ке́ли ту явэ́са одори́к, то помакх Азаилос сыр крали́с пэ Сирия.”

¹⁶ И ту адя́кэ-паць помакх Ииуёс, чхавэ́с Намесиёскирэс сыр крали́с пэ Израилё, а Елисеёс, чхавэ́с Сафатоскирэс Авэл-Мехолатыр, помакх сыр пэ штэ́то пэ́скиро.

¹⁷ Кон нашэла Азаилоскирэ куртала́тыр, одолэ́с мулякирэ́ла Ииу́ё, а кон зракхэ́лапэ Ииуёскирэ куртала́тыр, одолэ́с мулякирэ́ла о Елисеё.

¹⁸ Ишчо Мэ ячкирдём машки́р Израильтянэндэ эфта́ тысёнцы муршэ́н: сарэ́ далэ́ кхэри́тка ро́ды на пынэ́ пэ чанга́ анги́л Ваалостэ, и сарэнгирэ ушта́ лэ́ндыр на чамудэнас лэс.”

¹⁹ И дурия ёв одотхы́р, и латхя́ Елисеёс, чхавэ́с Саватоскирэс, ке́ли ёв пашындя; лэ́стэ сыс дэшуду́й пары ослэнгирэ тэл ґа́мо, и ишчо (инкэ́) пашы́л лэ́стэ сыс дэшуду́й пары.

²⁰ И мэкця́ Елисеё гурувэ́н, и праста́ндыя пал Илиястэ, и пхэндя́: “Дэ во́ля ма́нгэ тэ чамудав мирэ́ дадэ́с и мирэ́ да, и мэ джа́ва пал ту́тэ.” Ёв пхэндя́: “Джа́ и яв палэ, пал-дова́ со мэ на сом пэ дром ту́кэ.”

²¹ Адя́кэ Елисеё отгия́ лэ́стыр, лыя́ пара гурувэнгири и зачхиндя́ лэн, и ёв захачкирдя плуго гурувэнгиро, спэкця мас лэ́нгиро, и роздыя манушэ́нгэ, и ёнэ ханэ́. А кокоро́ уштыя́ ёв и гия́ пал Илиястэ, и яця́ тэ дынаринэ́л лэ́скэ.