2 Ximaske 3 - Библия - Пэ Балтитко Романи чиб (Романэс) 2019

¹ Джин, со явэ́ла пхаро́ часо дрэ палатунэ́ (последня) дывэса́.

² Мануша́ на явэ́на тэ сыкавэ́н паты́в екх екхэ́скэ, явэ́на тэ традэнпэ пал барвалыпэ́н, явэ́на шарибнытка, пхутькирдэ́, явэ́на тэ калякирэн екх екхэ́с, и на явэ́на тэ кандэ́н пэ́скирэ кхангирья́кирэ пхурыдырэн, лэ́ндыр на шунэса парикирибэн, ёнэ явэ́на магирдэ́ бидэвлыткарья;

³ лэ́ндэ на явэ́ла паты́в кэ яви́р мануша́, ёнэ явэ́на захалэ́, явэ́на тэ бангякирэн явирэ манушэ́н хоханэ́с, явэ́на тэ на зрикирэн пэс, холынакирэ, на явэ́ла пир ило́ лэ́нгэ лачхипэ́н;

⁴ ёнэ явэ́на бикибнарья, нахрата, явэ́на тэ ґаздэ́н накх барипнаса, ёнэ явэ́на тэ ри́кирэн сыр дро́гима пэс буты́р Дэвлэ́стыр;

⁵ ёнэ явэ́на тэ сыкавэ́н анги́л манушэ́ндэ, со дарэ́на Дэвлэ́стыр, нэ ёнэ дэнапэ палэ Лэ́скирэ зорья́тыр. Джа́ адасавэ́ манушэ́ндыр криг.

⁶ Пал-дова́ со кэ адасавэ́ мануша́ отлыджанапэ кодолэ́, савэ́ заджа́на дро кхэр хохаибнаса и злыджана джувле́н, савэ́ исын сарэ́ дро грэ́хо, и савэ́н тырдэна грэхи́тка камибэна,

⁷ Кадалэ́ джувля́ саро́ часо сыклёна и ёнэ ние́кхвар на могинэ́на тэ уджинэ́н чачипэ́н.

⁸ Сыр Яниё (Ианниё) и Ямвриё (Иамвриё) сыс проти Мойзастэ, адя́кэ-паць и ёнэ исын проти чачипэ́н, набарэ́-годякирэ ёнэ исын мануша́, савэ́ рисинэ́ думэ́са пэ патяибэ́н дрэ Христосо́стэ.

⁹ Нэ лэ́нгэ яця́пэ на́бут часо адя́кэ тэ дживэ́н, пал-дова́ со лэ́нгиро дылныпэ́н явэ́ла бицяло́ сарэ́нгэ, сыр дава́ сыс одолэ́ манушэ́нца, савэ́ сыс проти Мойзастэ: Яниёса и Ямвриёса

Палатунэ́ Упхэныбэна́

¹⁰ Ту ги́ян пир миро дром дро сыклякирибэ́н, дро джиибэ́н, дро чачипэ́н, дро патяибэ́н, дро длэнго вырикирибэн, дрэ паты́в кэ яви́р мануша́, дрэ зор пир ду́хо (фа́но),

¹¹ дро традыпэн, мэ́ньки, сыс савэ́ ма́нгэ дрэ Антио́хия, дрэ Икония, дрэ Листра, савэ́ традыпэна мэ вырикирдём, и сарэ́стыр Дэвэ́л зракхця́ ман.

¹² И сарэ́, кон камэ́ла тэ дживэ́л дара́са анги́л Дэвлэ́стэ пир патяибэ́н дро екхипэ́н Исусо́са Христосо́са, кадасавэн явэ́на тэ традэ́н.

¹³ А фуй мануша́ и хоханэ́ сыклякирибнарья явэ́на буты́р тэ хохавэн и тэ залыджан дро хохаибэ́н явирэ манушэ́н и тэ хохавэн кокорэ́ пэс.

¹⁴ Нэ ту яв дурэды́р дро дова́, дро со тут сыклякирдэ́ и дро дова́, со исын допатяндло ту́кэ, пал-дова́ со ту джинэ́са, кон тут сыклякирдя́.

¹⁵ Ту тыкнорал (детствостыр) джинэ́са Свэ́нто Чхиныбэ́н, саво́ дэ́ла ту́кэ годы́ и лыджа́ла тут кэ зракхибэ́н пир патяибэ́н дрэ Исусо́стэ Христосо́стэ.

¹⁶ Саро́ Свэ́нто Чхиныбэ́н исын пир Дэвлэ́скиро Ду́хо (Фа́но) и дэ́ла лачхипэ́н ваш сыкляибэн, ваш вырикирибэн – кон дэ́лапэ дукха́, сыклякирэ́ла тэ уджинэл чачипэ́н.

¹⁷ Мэк Дэвлэ́скиро ману́ш тэ явэ́л скэдыно́, и тэ джинэ́л кэ кэрэ́л кажно лачхо́ рэ́ндо.