2 Petr 3 - Библия - Пэ Балтитко Романи чиб (Романэс) 2019

Сыр Явэ́ла Рай Дэвэ́л

¹ Дро́га мирэ́! Ѓа́да, яви́р лыл мэ чхина́ва тумэ́нгэ. Мэ сы́рбы джангавава далэ́ лылэнца тэ рипирэ́н чачипэ́н и тумари́ жужы годы́,

² соб (кай) тумэ́ тэ рипирэ́н лава́, савэ́ англэды́р свэ́нта проро́ки пхэндлэ́ и пал припхэныбэ́н амарэ́ Ра́скирэ – Дэвлэ́скиро и Зракхибнарискиро, со дынэ́ тумарэ́ Апо́столы.

³ Нэ англэды́р сарэ́стыр джинэ́н, со дрэ палатунэ́ (последня) дывэса́ явэ́на нахрата мануша́, савэ́ явэ́на тэ санпэ холямэс тумэ́ндыр, а кокорэ́ ёнэ явэ́на тэ кэрэ́н дурэды́р, со лэ́нгэ пир годы́ пир налачхэ́-пэ́скирэ масэ́нгиро тырдыпэ́н,

⁴ и ёнэ явэ́на тэ ракирэ́н: “И кай жа Лэ́скиро лав, со Ёв дыя́, ке́ли Ёв явэ́ла? Пал-дова́ со долэ́ поратыр, ке́ли мынэ́ амарэ́ дада́ нисо́ на парудыя, сыр сыс создыно́ свэ́то.”

⁵ Кадасавэ́ мануша́ думинэна и сы́рбы на джинэ́на дова́, со ґара́ Дэвэ́л припхэндя́ и кэрдэ́пэ болыбэ́н и пхув пане́стыр и пане́са,

⁶ палдава́ и ґаратуно свэ́то сыс зачхудо пане́са кэ хасибэ́н.

⁷ Кэ дава́ болыбэ́н и пхув, со исын какана́, ракхэнапэ Дэвлэ́скирэ лавэ́са ваш яг кэ/жы́ко сэндоскиро дывэ́с и кэ хасибэ́н ваш надэвлытконэ манушэ́нгэ.

⁸ Нэ екх дывэ́с на могинэ́ла тэ явэ́л гарадо́ тумэ́ндыр, дро́га мирэ́, со Дэвлэ́стэ екх дывэ́с исын сыр бар (тысёнцо) бэрш, и бар бэрш исын, сыр екх дывэ́с.

⁹ Дэвэ́л на зарикирэлапэ тэ кэрэ́л дова́, пал со Ёв дыя́ лав, сыр вари-савэ́ мануша́ гинэ́на, со дава́ явэ́ла на сыг, нэ Ёв ґара́ вырикирэ́ла тумэн, и на камэ́ла, соб (кай) вари-кон тэ хасёл, нэ соб (кай) сарэ́ тэ рисён кэ Дэвэ́л.

¹⁰ Нэ Дэвлэ́скиро дывэ́с явэ́ла сыр чор раты́, и тэды болыбэ́н грукимаса джа́ла криг якхэ́ндыр и сарэ́ болыбны́тка котэра́ схачона, и пхув и саро́, со исын пэ ла́тэ, явэ́на чхучэ́ (пуста).

¹¹ Пал-дова́ со ко́ли сарэ́ частыра (предметы) явэ́на биладэ, то тэды тумэ́нгэ трей тэ дживэ́н свэнтэс и тэ отдэ́н пэс Дэвлэ́скэ;

¹² и тэ ужакирэн и тэ тырдэнпэ зоралэ́с, соб (кай) сыгэды́р тэ явэ́л дова́ дывэ́с, ке́ли явэ́ла Дэвэ́л, дывэ́с, дро саво́ болыбэ́н явэ́ла схачкирдо и сарэ́ котэра́, со исын пэ болыбэ́н, явэ́на розбиладэ яга́са.

¹³ Нэ пир Дэвлэ́скиро дыно́ лав амэ ужакираса нэво́ болыбэ́н и нэви́ пхув, кай явэ́ла тэ дживэ́л чачипэ́н.

Зоралэ́ дро Ду́хо (Фа́но)

¹⁴ Палдава́, дро́га мирэ́, ко́ли ужакирэ́на тумэ́ саро́ дава́, причхувэ́н зор тэ явэ́н анги́л Лэ́стэ бибангякирэ и бидошэнгирэ и тэ явэ́н дро рама́нё;

¹⁵ и прилэ́н дрэ годы́ дова́, со Рай Дэвэ́л ґара́ вырикирэ́ла амэн и дэ́ла саштыпэн тэ зракхаспэ, сыр дова́-паць и амаро́ дро́го пшал Па́вли, савэ́скэ дыя́ годы́ Дэвэ́л, чхиндя́ тумэ́нгэ пал дава́,

¹⁶ адя́кэ-паць Па́вли ракирэ́ла пал дава́ дрэ сарэ́ пэ́скирэ лыла́; дрэ лэ́ндэ исын вари-со, со исын пхаро́ тэ ґалёс, и мануша́, савэ́ исын тэмпа и нанэ зоралэ́ дро патяибэ́н, бут пиририскирэна, со ёв чхиндя́ дрэ лыла́, сыр и дрэ яви́р паша́ Чхиныбна́стыр. Кадасавэ́ мануша́ сы́рбы кокорэ́ пэ пэ́стэ лыджа́на хасибэ́н.

¹⁷ И палдава́ тумэ́, дро́га мирэ́, сыр тумэ́ акана́ англэды́р джинэ́н дава́, ракхэ́нпэ, соб (кай) тумэ́ тэ на кэрэ́н грэ́хо и тэ на патя́н дрэ фрэнтыма кхэтанэ́ кадалэ́ манушэ́нца и тэ на отпэрэн хоралэ патяибнастыр

¹⁸ а тэ барьён дро бахтякирибэ́н и тэ уджинэ́н фэды́р амарэ́ Рас-Дэвлэ́с, и Зракхибнарис (Спасителёс) Исусо́с Христосо́с. Тэ явэ́л Лэ́скэ сла́ва какана́ и пэ сарэ́ ве́ки. Ами́нь.