2 Petr 1 - Библия - Пэ Балтитко Романи чиб (Романэс) 2019

¹ Симоностыр Пэтристыр, Исусо́скирэ Христосо́скирэ писхаристыр и Апостолостыр, сарэ́ манушэ́нгэ, кон прилыя́ дасаво-паць дро́го патяибэ́н кхэтанэ́ амэ́нца пир чачипэ́н амарэ́ Дэвлэ́скиро и Зракхибнарискиро, Исусо́скирэ Христосо́скиро,

² мэк бахт и рама́нё (миро) тэ явэ́л дыно́ бут буты́р тумэ́нгэ, сыр тумэ́ уджиндлэ́ Дэвлэ́с и Исусо́с, амарэ́ Рас-Дэвлэ́с,

Дэвэ́л Прикхарэ́ла и Выкэдэ́ла

³ Дэвэ́л, Лэ́скирэ Дэвлэ́скирэ зорья́са дыя́ саро́ амэ́нгэ, со трэй ваш дэвлы́тко джиибэ́н, соб (кай) тэ уджинас Дэвлэ́с, Саво́ кхардя́ амэн кэ Пэ слава́са и лачхипна́са,

⁴ савэ́нца Ёв дыя́ най барэды́р и дрогэдыр лав, соб (кай) пир дава́ тумэ́ тэ ячэн пашаса (пашэ́са) Дэвлытконэ́ духо́стыр и тэ джа́н криг Духо́скирэ хасибнастыр, саво́ джа́ла налачхэ́ мыслятыр дро свэ́то соб (кай) пир дава́ тумэ́ тэ дживэ́н сыр трэй Дэвлэ́скэ.

⁵ Нэ палдава́ тумэ́ адя́кэ-паць причхувэ́н зор, соб (кай) тэ сыкавэ́н тумарэ́ патяибнастыр лачхипэ́н, а лачхипнастыр джиныбэ́н,

⁶ джиныбнастыр сыклён тэ обрикирэн пэс, обрикирибнастыр явэ́н вырикирдэ (тривала), ке́ли амэ вырикираса, тэды ячасапэ дэвлытконэнца,

⁷ дэвлыткиматыр сыкавэ́н пшалы́тко паты́в екх екхэ́скэ:

⁸ и ко́ли саро́ дава́ исын дрэ тумэ́ндэ и барьёла бутэды́р, тэды тумэ́ на ячэ́нпэ чхучэ́ вастэ́нца и би рэндоскиро, ко́ли тумэ́ явэ́на тэ причхувэ́н зор тэ уджинэ́н амарэ́ Рас – Дэвлэ́с, Исусо́с Христосо́с;

⁹ а ко́ли дрэ конэ́стэ саро́ дава́ нанэ, одова́ ману́ш исын короро́ и ёв зачхакирдя пэ́скирэ якха́, бистырдя пал дова́, со Дэвэ́л отмэкця́ лэ́скирэ ґаратунэ́ грэ́хи.

¹⁰ Палдава́, пшала́лэ, причхувэ́н зор уса́ буты́р тэ кэрэ́н зоралэды́р тумаро́ Дэвлэ́скиро кхарибэн и выкэдыибэн; ко́ли тумэ́ адя́кэ явэ́на тэ кэрэ́н, тэды тумэ́ ние́кхвар на обштавэнапэ;

¹¹ и палдава́ тумэ́нгэ дэ́лапэ пхэрдо́ право тэ заджа́н дро ве́чно кралипэ́н амарэ́ Дэвлэ́скирэ и Зракхибнарискирэ, Исусо́скиро Христосо́скиро.

¹² Ваш дава́ мэ ние́кхвар на пириячава тэ рипирав ишчо (инкэ́) тумэ́нгэ пал дава́, на дыкхи́ пэ дова́, со дава́ тумэ́ миштэ́с джинэ́н, и тумэ́ зоралэ́с рикирэнапэ пал чачипэ́н акана́.

¹³ Нэ мэ чхина́ва пал чачипэ́н, пака мэ сом джидо́ сы́рбы дрэ ша́тра тэ джангавав тумэн далэ́ рипирибнаса,

¹⁴ пал-дова́ со мэ джино́м (джина́в), со мэ сыг/сы́гэс ячкирава дая́ ша́тра, ке́ли мэ мэра́ва сыр амаро́ Рай Дэвэ́л, Ису́со Христо́со сыкадя́ ма́нгэ;

¹⁵ нэ мэ ява́ва тэ причхував зор, соб (кай) тумэ́ и коригэды́р (позжэ), ке́ли мэ джа́ва тумэ́ндыр, тэ рикирэ́н дава́ пэ годы́ саро́ часо.

Якхи́тка пал Христосо́скири Сла́ва

¹⁶ Амэ роспхэнасас тумэ́нгэ джиныбэ́н пал зор, и со сыг явэ́ла амаро́ Рай Дэвэ́л, Ису́со Христо́со на парамысенца, со мануша́ счхудэ годэс, нэ амэ кокорэ́ сам якхи́тка пал Лэ́скиро баро́ райканыпэн.

¹⁷ Пал-дова́ со Ёв прилыя́ Дэвлэ́стыр Дадэ́стыр паты́в и сла́ва, ке́ли догия́ кэ Ёв райканэ славатыр зан: “Дава́ исын Миро Чхаво́, Саво́ Ма́нгэ яця́ Дро́го, дрэ Савэ́стэ исын Мири́ ра́дыма”,

¹⁸ и кадая́ зан, сави́ амэ кокорэ́ шундя́м Болыбна́скирэ Раёстыр, ке́ли амэ са́мас кхэтанэ́ Лэ́са пэ свэ́нто бэ́рга.

¹⁹ И апри́ч дова́, саро́ амэ́ндэ исын най чачунэдыр пророкэнгиро лав, и тумэ́ миштэ́с кэрэ́на, со тумэ́ ракхибны́ткэс шунэ́на дава́ лав, саво́ исын сы́рбы дава́ дуд (свэ́то), со хачола дро цямло штэ́то, пака на явэ́ла палатуно́ зло́ко (ра́нко) и ґаздэ́лапэ злокоскири чэргэн дрэ тумарэ́ илэ,

²⁰ и англэды́р сарэ́стыр джинэ́н дова́, со нисаво́ ангилпхэныбэ́н дро Свэ́нто Чхиныбэ́н на сыс чхиндло́ пир пророкэнгиро джиныбэ́н,

²¹ пал-дова́ со мануша́ ние́кхвар вагэдыр (ґарэдыр) на ангилпхэнэнас пир пэ́скири во́ля, а дава́ ракирдэ́ свэ́нта Дэвлэ́скирэ мануша́, ке́ли Свэ́нто Ду́хо (Фа́но) лыджия́ лэн.