2 Паралипоменоно 8 - Библия - Пэ Балтитко Романи чиб (Романэс) 2019

¹ Сыр прогинэ́ биш бэрш, дрэ савэ́ Соломо́но кэрдя́ Кхэр Ра́скирэ-Дэвлэ́скиро и пэ́скиро кхэр,

² и обкэрдя Соломо́но и фо́рья, савэ́ дыя́ Соломоно́скэ Хирамо, и чхудя́ тэ дживэ́н дрэ лэ́ндэ Израилёскирэ чхавэ́н,

³ гия́ Соломо́но пэ Емаф-Сува, и лыя́ лэс.

⁴ И кэрдя́ ёв Фадморо пэ чхучи́ пхув, и сарэ́ фо́рья ваш запасы, савэ́ кэрдя́ дро Емафо.

⁵ Ёв обкэрдя Вефороно упратуно и Вефороно тэлатуно, фо́рья зоралэ́ вантэнца, вударэнца и шыберэнца (запорэнца),

⁶ и Ваалафо и сарэ́ фо́рья ваш запасы, савэ́ сыс Соломоностэ, и сарэ́ фо́рья ваш марибны́тка вурдэна́, и фо́рья ваш грэнгэ, и саро́, со камдя́ Соломо́но тэ кэрэ́л дро Ерусалимо, и пэ Лива́но, и пэ сари́ пхув, сави́ сыс лэ́стэ.

⁷ Сарэ́ мануша́, савэ́ ячнэ́пэ Хетее́ндыр, и Аморее́ндыр, и Ферезее́ндыр, и Евее́ндыр, и Евусее́ндыр, савэ́ сыс на Израилёскирэ чхавэ́ндыр,

⁸ чхавэ́н лэнгирэн, савэ́ ячнэ́пэ пало́ (после) лэ́ндэ пэ пхув, савэ́н на мулякирдэ́ Израилёскирэ чхавэ́, – кэрдя́ Соломо́но бутярнэнца кэ/жы́ко дава́ дывэ́с.

⁹ Израилёскирэ чхавэ́н на кэрдя́ Соломо́но бутярнэнца пир пэ́скирэ рэ́нды, нэ ёнэ сыс халадэ́, и барыдыра́ лэ́скирэ пэ ракхибнарьендэ, и шэралэ́ пэ лэ́скирэ марибны́тка вурдэна́ и пэ лэ́скирэ манушэ́ндэ, савэ́ сыс уклистэ́ пэ грэ́ндэ.

¹⁰ И сыс шэралэ́ пэ барыдырэндэ крали́стэ Соломоностэ, савэ́ хулаиндлэ манушэ́нца, дуйшэла́ пандждэша́.

¹¹ А чха фараоноскирья пирилыджия Соломо́но Давидо́скирэ форо́стыр дро кхэр, саво́ кэрдя́ ваш ла́кэ; пал-дова́ со, ракирдя́ ёв, нашты́ тэ дживэ́л джувлы́ ма́ндэ дро кхэр Давидо́скиро, Израилёскирэ-крали́скиро, пал-дова́ со свэ́нто ёв, штэ́то, адя́кэ, сыр загия́ дрэ лэ́стэ ковчэго Дэвлэ́скиро.

¹² Тэды лыя́ тэ чхувэ́л Соломо́но цэ́ло схачкирибэ́н Ра́скэ-Дэвлэ́скэ пэ алта́рё Ра́скирэ-Дэвлэ́скиро, саво́ ёв кэрдя́ анги́л трэ́мо (притворо),

¹³ соб (кай) пир упхэныбэ́н кажно дывэ́с тэ янэс цэ́ло схачкирибэ́н, пир Мойза́скиро припхэныбэ́н, дро са́вато (субо́та), и дро нэво́-чхон, и дрэ свэ́нки трин мо́лы дро бэрш: дрэ свэ́нко опресноки, и дрэ свэ́нко эфтуно, и дрэ свэ́нко кушчэнгиро (будэнгиро).

¹⁴ И чхудя́ ёв, пир Давидо́скиро припхэныбэ́н, пэ́скирэ-дадэ́скиро, змены, (отде́лы) раша́нгирэ пир лэ́нгиро дынарибэ́н, и Левитэ́н пир лэ́нгирэ стрэги, соб (кай) ёнэ славиндлэ и парикирдэ пашы́л рашандэ пир упхэныбэ́н кажнонэ́-дывэсэскиро, и ракхибнарье́н пэ по́рта пир лэ́нгирэ зме́ны, кэ кажно по́рта, пал-дова́ со дасаво сыс припхэныбэ́н Давидо́скиро, Дэвлэ́скирэ Манушэ́скиро.

¹⁵ И, соб (кай) ёнэ тэ на отджан крали́скирэ упхэныбнастыр пал рашандэ и Левитэндэ ни дрэ со, ни пал кучипэна.

¹⁶ Адя́кэ кэрды сыс сари́ буты́ Соломоно́скирэ дывэсэ́стыр, ке́ли лынэ́ тэ кэрэ́н Ра́скирэ-Дэвлэ́скиро Кхэр кэ саро́ кэрибэн лэ́скиро – кхэрэ́скиро Ра́скирэ-Дэвлэ́скиро.

¹⁷ Тэды гия́ Соломо́но дрэ Ецыон-Гаве́ро и дрэ Елафо, саво́ сыс пэ морёскиро (дэрьявэ́скиро) брэ́го, пэ Идумеенгири пхув.

¹⁸ И бичхадя́ лэ́скэ Хирамо пирда́л пэ́скирэ дынарье́ндэ па́рмы (корабли) и бутярнэн, савэ́ джиндлэ́ мо́рё (дэрья́в), и гинэ́ ёнэ Соломоно́скирэ дынарье́нца дро Офиро, и яндлэ́ одотхы́р штаршэла́ пандждэша́ тала́нты сувнака́й, и яндлэ́ крали́скэ Соломоно́скэ.