2 Паралипоменоно 5 - Библия - Пэ Балтитко Романи чиб (Романэс) 2019

¹ И закончындяпэ сари́ буты́, сави́ кэрдя́ Соломо́но ваш Ра́скирэ-Дэвлэ́скиро Кхэр. И яндя́ Соломо́но да́ры, со отдыя́ Дави́до, лэ́скиро дад; и руп, и сувнака́й, и сарэ́ струме́нты отдыя́ дрэ Дэвлэ́скирэ-Кхэрэскирэ пираля́.

² Тэды скэдыя́ Соломо́но Израилёскирэ пхурыдырэн и сарэ́н шэралэн пэ ро́дыцы, барыдырэ́н Израилёскирэн пэ чхавэ́нгирэ стрэ́чы, дро Ерусалимо, соб (кай) тэ лыджа́н пэ яви́р штэ́то Дэвлэ́скирэ-завето́скиро ковчэго Давидо́скирэ форо́стыр, Сионо́стыр.

³ И скэдынэ́пэ кэ кра́ли сарэ́ Израильтя́ни пэ свэ́нко, пэ эфта́то чхон.

⁴ И явнэ́ сарэ́ Израилёскирэ пхурыдыра́. Леви́ты лынэ́ ковчэго;

⁵ и лыджинэ́ ковчэго, и скэдыибна́скири ски́ния, и сарэ́ свэ́нта кхорэ́, савэ́ сыс дрэ ски́ния, лыджинэ́ лэн рашая́ и Леви́ты.

⁶ Кра́ли Соломо́но и сарэ́ Израилёскирэ мануша́, савэ́ скэдынэ́пэ кэ ёв анги́л ковчэго, янэ́нас свэ́нта дыибэна́ Ра́скэ-Дэвлэ́скэ бакрэ́ндыр и гурувэндыр, савэ́н сыс нашты́ тэ згинэс и тэ уджинэс, пал-дова́ со лэн сыс древа́н бут.

⁷ И яндлэ́ рашая́ Ра́скирэ-Дэвлэ́скирэ завето́скиро ковчэго пэ лэ́скиро штэ́то, дрэ Кхангирья́киро давиро – дрэ Свэ́нто-свэнтонэнгиро, тэл пхака́ (крылы) херувимэнгирэ.

⁸ И херувимы росчхудэ пхака́ пэ ковчэгоскиро штэ́то и баландиня́ (шосты) лэ́скирэ упра́л.

⁹ И вытырдынэ пэ баландиня́ (шосты) ковчэгоскирэ адя́кэ, со яго́ры (краи́) баладине́нгиро сыс бицялэ анги́л давиро, нэ на сыкадынэ яври́, и ёнэ одо́й кэ дава́ дывэ́с.

¹⁰ На сыс дро ковчэго ничы́ апри́ч дуй скрижа́ли (таблицы), савэ́ чхудя́ Мо́йза пэ Хориво, ке́ли Рай Дэвэ́л кэрдя́ заве́то Израилёскирэ чхавэ́нца, пир лэ́нгиро выгиибэн Египто́стыр.

¹¹ Ке́ли рашая́ выгинэ́ свэнтонэ́ штэто́стыр, пал-дова́ со сарэ́ рашая́, савэ́ сыс одо́й, высвэнцындлэпэ, би дыкхибнаскиро пэ отде́лы, савэ́ндыр сыс ёнэ;

¹² и Леви́ты-багаибнарья, – савэ́ сыс Асафо, Эмано, Идифуно, и лэ́нгирэ чхавэ́, и лэ́нгирэ пша́ла, – уридэ́ дро парно́ похтан, цымбалэнца, и лутэнца, и арфэнца сыс тэрдэ́ пэ васточно риг алтарёскири, и лэ́нца сыс шэл тэ биш рашая́, трубиндлэ рогэ́нца,

¹³ и сыс, сыр екх трубиндлэ и багандлэ, выдыи екхэ заня́са кэ шарибэ́н и кэ парикирибэн Ра́скэ-Дэвлэ́скэ; и, ке́ли загреминдя зан рогэнгири, и цымбалэнгири, и багаибнытконэ-струментэнгири, и шардэ Рас-Дэвлэ́с, и багандлэ: “Ёв исын лачхо́, пал-дова́ со дро ве́ко тангипэ́н Лэ́скиро”, тэды Кхэр, Ра́скирэ-Дэвлэ́скиро Кхэр пхэрдякирдя́ о́блоко,

¹⁴ и на могиндлэ́ рашая́ тэ тэрдён пэ дынарибэ́н (служба) пирда́л о́блоко; пал-дова́ со сла́ва Ра́скирэ-Дэвлэ́скири пхэрдякирдя́ Дэвлэ́скиро Кхэр.