2 Паралипоменоно 36 - Библия - Пэ Балтитко Романи чиб (Романэс) 2019

¹ И лынэ́ мануша́ пэ доя́ пхув Иоахазос, Иосияскирэ чхавэ́с, и чхудэ́ лэс крали́са, пэ штэ́то лэ́скирэ дадэ́скиро, дро Ерусалимо.

² Биш тэ трин бэрш сыс Иоахазоскэ, ке́ли ёв яця́ крали́са, и трин чхона́ сыс ёв крали́са дро Ерусалимо.

³ И злыя́ лэс Египто́скиро кра́ли дро Ерусалимо, и чхудя́ пэ пхув притасады (пеня) шэл тала́нты руп и екх таланто сувнака́й.

⁴ И чхудя́ Египто́скиро кра́ли пэ Юдэ́я и Ерусалимо Елиакимос, лэ́скирэ пшалэ́с, и парудя лэ́скиро лав пэ Иоакимо; а Иоахазос, лэ́скирэ пшалэ́с, лыя́ Нехао и залыджия́ лэс дро Еги́пто.

⁵ Биш тэ пандж бэрш сыс Иоакимоскэ, ке́ли ёв яця́ крали́са, и дэшуекх бэрш ёв сыс крали́са дро Ерусалимо. И кэрдя́ налачхэ́с дрэ якха́ пэ́скирэ Ра́скирэ-Дэвлэ́скирэ.

⁶ Проти лэ́стэ выгия́ Навуходоносо́ро, Вавилоно́скиро кра́ли, и закуиндя лэс састырэнца, соб (кай) тэ лыджа́л лэс дро Вавило́но.

⁷ И паш кхорэндыр Ра́скирэ-Дэвлэ́скирэ Кхэрэскир пирилыджия Навуходоносо́ро дро Вавило́но, и чхудя́ лэн дро пэ́скиро мангипнытко штэ́то дро Вавило́но.

⁸ Яви́р рэ́нды Иоакимоскирэ и лэ́скирэ магирибэна, савэ́ ёв кэрдя́ и савэ́ латхнэ́ дрэ лэ́стэ, исын зачхиндлэ́ дрэ Израилёскирэ и Юдэя́кирэ-кралье́нгири лылвари́. И яця́ крали́са Иехония, лэ́скиро чхаво́, пэ штэ́то лэ́скиро.

⁹ Дэшуохто бэрш сыс Ехонияскэ, ке́ли яця́ ёв крали́са, и трин чхона́ и дэш дывэ́с ёв сыс крали́са дро Ерусалимо. И кэрдя́ ёв налачхэ́с дрэ Ра́скирэ-Дэвлэ́скирэ якха́.

¹⁰ Сыр гия бэрш, бичхадя́ кра́ли Навуходоносо́ро, и припхэндя́ тэ лэн лэс дро Вавило́но кхэтанэ́ дрогонэ́ кхорэнца Ра́скирэ-Дэвлэ́скирэ Кхэрэскир, и яця́ крали́са пэ Юдэе́ндэ и Ерусалимо о Сэдэки́я, лэ́скиро пшал.

¹¹ Биш тэ екх бэрш сыс Сэдэкияскэ, ке́ли яця́ ёв крали́са, и дэшуекх бэрш ёв сыс крали́са дро Ерусалимо.

¹² И кэрдя́ ёв налачхэ́с дрэ пэ́скирэ Ра́скирэ-Дэвлэ́скирэ якха́. Ёв на лыя́ тэ кандэл пророко́с Еремеёс, саво́ ракирдя́ Ра́скирэ-Дэвлэ́скирэ уштэндыр.

¹³ И отгия́ ёв крали́стыр Навуходоносоростыр, саво́ лыя́ лэ́стыр совэ́л Дэвлэ́скирэ лавэ́са, – и кэрдя́ зоралы́ пэ́скири мэн, холякирдя пэ́скиро ило́ кэ дова́, со на рисия́ илэ́са кэ Рай Дэвэ́л, Дэвэ́л Израилёскиро.

¹⁴ Адя́кэ и сарэ́ барыдыра́ пэ рашандэ и пэ манушэ́ндэ кэрдэ́ бут грэ́хи, дыкхи́ пэ сарэ́ магирипэна Наюдытконэ́ нацые́ндыр, и магирдэ́ ёнэ Ра́скирэ-Дэвлэ́скиро Кхэр, саво́ Ёв свэнцындя дро Ерусалимо.

¹⁵ И бичхадя́ кэ ёнэ Рай Дэвэ́л, Дэвэ́л лэ́нгирэ-дадэ́нгиро, Пэ́скирэ бичхаибнаскирэн тася́рлэс пэ зло́ко (пэ ра́нко), пал-дова́ со Ёв тангиндя Пэскирэн манушэ́н и Пэ́скиро Кхэр.

¹⁶ Нэ ёнэ сандлэпэ напатывалэс (здикиндлэпэ) Дэвлэ́скирэ бичхаибнаскирэндыр, и на шундлэ́ Лэ́нгирэ лава́, и кошнэпэ пэ Лэ́скирэ пророкэ́ндэ, пака згия Ра́скирэ-Дэвлэ́скири холы́ пэ Лэ́скирэ манушэ́ндэ адя́кэ, со на сыс лэ́скэ зракхибэ́н.

¹⁷ И Ёв яндя́ пэ лэ́ндэ Халдеенгирэ крали́с, – и одова́ мулякирдя́ тэрнэ́ манушэ́н лэ́нгирэ куртала́са дрэ лэ́нгиро свэнтыныбнаскиро кхэр, и на потангиндя ни тэрнэ́ чхавэ́с, ни патываля чха, ни пхурэс, ни богос: саро́ отдыя́ Дэвэ́л дрэ лэ́скиро васт.

¹⁸ И сарэ́ Дэвлэ́скирэ Кхэрэскирэ кхорэ́ (сасу́ды) барэ́ и тыкнэ́, и кучипэна Ра́скирэ-Дэвлэ́скирэ Кхэрэскирэ, и барвалыпэ́н лэ́скирэ крали́скиро и тхагарьенгиро (князенгиро), саро́ ёв яндя́ дро Вавило́но.

¹⁹ И хачкирдэ́ ёнэ Дэвлэ́скиро Кхэр, и роспхагирдэ́ Ерусалимо́скири ва́нта; и сарэ́ лэ́скирэ фэлатиня́ схачкирдэ́ яга́са, и сарэ́ дро́га кхорэ́ лэ́скирэ домардэ́.

²⁰ И пирилыджия ёв манушэ́н, савэ́ ячнэ́пэ джидэ́ куртала́тыр дро Вавило́но; и сыс ёнэ лэ́скирэ дынарье́нца и лэ́скирэ чхавэнгирэнца, кэ Персиякирэ-крали́скиро кралипэ́н.

²¹ Анги́л дова́, соб (кай) тэ сполнинэн Ра́скирэ-Дэвлэ́скиро лав, саво́ сыс пхэндло́ Еремеёскирэ уштэ́нца, сыр пхув отсвэнкиндя пэ́скирэ са́ваты (суботы). Дрэ сарэ́ чхучэ́ дывэса́ ёй ракхця́ са́вато кэ сполниныбэн эфтадэша́ бэрш.

²² И дро англатуно́ (пэ́рво) бэрш Кираскиро, Персиякирэ крали́скиро, соб (кай) тэ сполнинэн Ра́скирэ-Дэвлэ́скиро лав, саво́ пхэндлэ́ Еремеёскирэ ушта́, Рай Дэвэ́л ґаздыя́ ду́хо (фа́но) Кираскиро, Персиякирэ крали́скиро, и ёв припхэндя́ тэ дэн тэ джинэ́н пир саро́ пэ́скиро кралипэ́н, лавэ́нца и чхиныбнаса, и тэ пхэнэ́н:

²³ “Адя́кэ ракирэ́ла о Кира, Персиякиро кра́ли: ‘Сарэ́ кралипэна́ пэ пхув дыя́ ма́нгэ Рай Дэвэ́л, болыбна́скиро Дэвэ́л; и Ёв припхэндя́ ма́нгэ тэ кэра́в Лэ́скэ Кхэр дро Ерусалимо, со исын дрэ Юдэ́я. Кон исын тумэ́ндыр-сарэ́ Лэ́скирэ манушэ́ндыр, мэк тэ явэ́л лэ́скиро Рай Дэвэ́л, Дэвэ́л лэ́са, и мэк ёв одори́к тэ джал.’”