2 Паралипоменоно 35 - Библия - Пэ Балтитко Романи чиб (Романэс) 2019

¹ И кэрдя́ Иосия дро Ерусалимо Патради́ Ра́скэ-Дэвлэ́скэ, и зачхиндлэ́ патрадитконэс бакрорэс пэ дэшуштарто дывэ́с, англатунэ́-чхонэ́скиро.

² И чхудя́ ёв раша́н пэ лэ́нгирэ штэ́ты, и дыя́ ду́хо (фа́но) лэ́нгэ тэ дынаринэ́н дро Ра́скирэ-Дэвлэ́скиро Кхэр.

³ И пхэндя́ Левитэ́нгэ, савэ́ сыклякирдэ́ сарэ́н Израильтянэ́н, савэ́ сыс высвэнцындлэ Ра́скэ-Дэвлэ́скэ: “Чхувэ́н свэ́нто ковчэго дрэ Кхангири́, сави́ кэрдя́ Соломо́но, Давидо́скиро чхаво́, Израилёскиро кра́ли; нанэ тумэ́нгэ трэ́бима тэ лыджа́н лэс пэ псикэ́; дынаринэ́н акана́ Ра́скэ-Дэвлэ́скэ, Дэвлэ́скэ амарэскэ, и Лэ́скирэ манушэ́нгэ Израилёскирэнгэ.

⁴ Тэрдён пир тумарэ́ стрэ́чы (поколе́нии), пир зме́ны тумарэ́, сыр упхэндя Дави́до, Израилёскиро кра́ли, и сыр зачхиндя́ Соломо́но, лэ́скиро чхаво́;

⁵ И тэрдён пэ свэ́нто штэ́то, пир стрэчэнгиро росчхуибэн (дадэ́нгирэ титулы) тумарэ́ пшалэ́ндэ, манушэ́нгирэ чхавэ́ндэ, и пир дова́, сыр Леви́ты росчхудэ пэс пэ стрэ́чы.

⁶ И зачхинэн патрадитконэс бакрорэс, и высвэнцынэнпэ, и приготовинэн лэс ваш тумарэ́ пшалэ́нгэ, кэрэ́н саро́ Ра́скирэ-Дэвлэ́скирэ лавэ́са пир Мойзастэ.

⁷ И дыя́ Иосия дро дыибэ́н сарэ́нгэ манушэ́нгирэ чхавэ́нгэ, савэ́ сыс одо́й, тыкнэ́ кхэритконэ́ мурдалэ́ндыр бакрорэ́н и бузнэн (козлэн) тэрнэн, саро́ ваш свэ́нто яныбэ́н Дэвлэ́скэ патрадитко, саро́ трия́нда тысёнцы, и трин тысёнцы гурувэ́н. Дава́ сыс крали́скирэ миштыпна́стыр.

⁸ И лэ́скирэ тхага́рья (кня́зи) илэ́стыр дынэ́ дро дыибэ́н манушэ́нгэ, рашангэ и Левитэ́нгэ. Хелкия́, и Заха́рия и Иехиило, савэ́ исыс барыдырэ́нца дро Дэвлэ́скиро Кхэр, дынэ́ рашангэ ваш патрадитко свэ́нто яныбэ́н Дэвлэ́скэ дуй тысёнцы шовшэла́ бакрен, бакрорэ́н и бузнэн (козлэн) и триншэла́ гурувэ́н;

⁹ И Хонаеия и Шемаия́, и Нафанаи́ло, лэ́скирэ пша́ла, и Хашавия́, и Иеиэло, и Иозава́до, барыдыра́ Левитэ́нгирэ, дынэ́ Левитэ́нгэ патрадитко ваш свэ́нто яныбэ́н Дэвлэ́скэ бакрен пандж тысёнцы, и панджшэла́ тэрнэ́ гурувэ́н.

¹⁰ Адя́кэ кэрдо́ сыс дынарибэ́н (служба). И тэрдинэ́ рашая́ пэ пэ́скиро штэ́то и Леви́ты пэ пэ́скирэ зме́ны пир крали́скиро упхэныбэ́н.

¹¹ И зачхиндлэ́ патрадитконэ бакрорэс. И чхувэ́нас рашая́ ратэ́са, лыи́ лэс Левитэ́нгирэ вастэ́ндыр, а Леви́ты злынэ цы́па.

¹² И росчхудэ ёнэ дова́, со сыс припхэндло ваш саро́ схачкирибэ́н, соб (кай) тэ роздэн дова́ пир отде́лы дрэ стрэ́чы манушэ́нгирэ чхавэ́ндэ, тэ янэ́н Ра́скэ-Дэвлэ́скэ, сыр исын зачхиндло́ дрэ Мойзаскири лылвари́. Дова́-паць кэрдэ́ и гурувэнца.

¹³ И пэкнэ патрадитконэ бакрорэс пэ яг, пир упхэныбэ́н; и свэ́нта яныбэна́ кэрадэ дрэ пирья, какавя (котлы) и мыски (каструли), и сы́гэс роздынэ сарэ́ манушэ́нгэ;

¹⁴ А тэ́ньчи (после) кэрдэ́ ваш пэ́скэ и ваш рашангэ: пал-дова́ со рашая́, Аароно́скирэ чхавэ́ сыс залынэ (залымэ) яныбнаса цэлонэ́ схачкирибнастыр кэ рат; палдава́ и кэрадэ Леви́ты ваш пэ́скэ и ваш рашангэ, Аароно́скирэ чхавэ́нгэ.

¹⁵ И багаибнарья, Асафоскирэ чхавэ́, ячнэ́пэ пэ пэ́скирэ штэ́ты, пир упхэныбэ́н Давидо́скиро, и Асафоскиро, и Еманоскиро и Идифуноскиро, крали́скирэ магикоскиро, и ракхибна́рья пашы́л по́рта: на ваш со сыс лэ́нгэ тэ отджан пэ́скирэ дынарибнастыр, адя́кэ сыр лэ́нгирэ пша́ла кэрадэ ваш лэ́нгэ.

¹⁶ Адя́кэ сыс кэрдо́ саро́ дынарибэ́н Ра́скэ-Дэвлэ́скэ дрэ дова́ дывэ́с, соб (кай) тэ свэнкинэн Патради́ и тэ янэ́н цэ́ло схачкирибэ́н пэ Ра́скирэ-Дэвлэ́скиро алта́рё, пал Иосияскирэ крали́скиро упхэныбэ́н.

¹⁷ И свэнкиндлэ Израилёскирэ чхавэ́, савэ́ сыс одо́й, Патради́ дрэ дова́ часо (цы́ро) и свэ́нко опрэснокэнгиро дрэ эфта́ дывэса́.

¹⁸ И на свэнкиндлэ дасави́ Патради́ Израилёстэ пророкоскирэ-Самуилоскирэ дывэсэ́ндыр; и сарэ́ Израилёскирэ кралье́ндыр ние́кх на справиндя дасави́ Патради́, сави́ кэрдя́ Иосия, и рашая́, и Леви́ты, и сарэ́ Юдэя́кирэ, и Израильтя́ни, савэ́ сыс одо́й, и Ерусалимо́скирэ мануша́.

¹⁹ Дрэ дэшуохтото бэрш Иосия́скиро, сыр ёв сыс кра́ли, свэнкиндлэ дая́ Патради́.

²⁰ Пало́ (после) саро́ дава́, со кэрдя́ Иосия дро Дэвлэ́скиро Кхэр, гия́ Нехар, Египто́скиро кра́ли, пэ марибэ́н кэ Кархемисо пэ Евфрато; и Иосия выгия́ гил (пэ стреч) лэ́скэ.

²¹ И гил бичхадя́ кэ ёв Нехао манушэ́н тэ пхэнэ́н: “Со ма́нгэ и ту́кэ, Юдэя́киро кра́лё? На проти ту́тэ акана́ джа́ва мэ, нэ одори́к, кай ма́ндэ марибэ́н. И Дэвэ́л припхэндя́ ма́нгэ тэ сыгнякирав; на яв проти Дэвлэ́стэ, Саво́ исын ма́нца, соб (кай) Ёв тэ на хасякирэ́л тут.”

²² Нэ Иосия на отгия́ лэ́стыр, а скэдыяпэ, соб (кай) тэ марэ́лпэ лэ́са, и на шундя́ Нехаоскирэ лава́ Дэвлэ́скирэ мо́стыр, и выгия́ пэ марибэ́н, пэ лошчы́на Мегидо.

²³ И дынэ́ карье́ лукэ́ндыр дрэ крали́стэ Иосиястэ; и пхэндя́ кра́ли пэ́скирэ дынарье́нгэ: “Лыджа́н ман, пал-дова́ со мэ пхарэ́с чхиндло́.”

²⁴ И злынэ лэс дына́рья лэ́скирэ марибнытконэ́ вурдэнэстыр, и чхудэ́ тэ бэшэ́л лэс дрэ яви́р вурдэ́н, саво́ сыс лэ́стэ, и лыджинэ́ лэс дро Ерусалимо. И мыя́ ёв, и сыс гарадо́ дрэ пэ́скирэ дадэнги́рэ коплицы. И сарэ́ Юдэя́кирэ и Ерусалимо оброндлэ Иосияс.

²⁵ Оброндя Иосияс и Ереме́ё дрэ роибнаскири гилы́; и ракирдэ́ сарэ́ багаибнарья и багаибнарицы пал Иосиястэ дрэ роибнытка пэ́скирэ гиля́, савэ́ исын джиндлэ́ кэ дава́ дывэ́с, и пиридынэ лэн дро багаибэн Израилёскэ; и ґа́да, ёнэ исын зачхиндлэ́ дрэ лылвари́, роибнытконэ-гиленгири.

²⁶ Яви́р рэ́нды Иосияскирэ и лачхипэ́н лэ́скиро, зджанапэ долэса, со исын зачхиндло́ дро Ра́скирэ-Дэвлэ́скиро Зако́но,

²⁷ И рэ́нды лэ́скирэ, англатунэ́ и палатунэ́ (последня), исын зачхиндлэ́ дрэ Израилёскирэ и Юдэя́кирэ-кралье́нгири лылвари́.