2 Паралипоменоно 32 - Библия - Пэ Балтитко Романи чиб (Романэс) 2019

¹ Пало́ (после) дасавэ́ рэ́нды (де́лы) и дова́ чачипэ́н, сыр ёв отдыя́ пэс, явдя́ Сенахиримо, Асирия́киро кра́ли, гия́ пэ Юдэ́я, и заухтылдя фо́рья зоралэ́ тынэ́нца, и думиндя тэ залэл лэн пэ́скэ.

² Ке́ли Езэки́я дыкхця́, со явдя́ Сенахиримо и скэдыяпэ тэ марэ́лпэ проти Ерусалимо,

³ то скэдыяпэ тхагарье́нца пэскирэнца и халадытконэ пэ́скирэ манушэ́нца тэ зачхувэн пане́скирэ ґанынгорья, савэ́ сыс пал фо́ро; и одолэ́ дынэ́ васт (помогиндлэ) лэ́скэ.

⁴ И скэдынэ́пэ древа́н бут мануша́, и зачхудэ сарэ́ панескирэ ґанынгорья и сы́гно рэ́кица (лэнори́), сави́ тхадыя пир риг, ракири́: “Мэк тэ на латхэ́н Асирия́кирэ кра́лья, савэ́ явнэ́ адари́к, бут пани́.

⁵ И зоралыя ёв, и чхудя́ Езэки́я сари́ ва́нта, сави́ роспхагирдэ́, и ґаздыя́ ла кэ вучарды́ (башни), и яври́ кэрдя́ яви́р ва́нта, и зорьякирдя Мило дро Давидо́скиро фо́ро, и кэрдя́ древа́н бут мардытка и шчы́ты.

⁶ И ёв чхудя́ халадэ́нгирэ барыдырэ́н пэ манушэ́ндэ, и скэдыя́ лэн кэ пэ форуны́ (пло́шча) пашы́л форо́скири по́рта, и ракирдя́ кэ лэ́нгиро ило́, и пхэндя́:

⁷ “Явэ́н зоралэ́ и муршканэ́, на дарэ́н, и на страхадён Асирия́кирэ крали́стыр и адалэндыр, сарэ́ древа́н бутэндэ манушэ́ндыр, савэ́ исын лэ́са; пал-дова́ со амэ́нца явэ́ла бутыдыр, сыр лэ́са:

⁸ лэ́са исын псико́ манушы́тко, а амэ́нца исын Рай Дэвэ́л, амаро́ Дэвэ́л, соб (кай) тэ помогинэл амэ́нгэ и тэ марэ́лпэ пэ амарэ́ марибэна.” И зорьякирдэпэ мануша́ Езэкияскирэ лавэ́ндыр, Юдэя́кирэ-кралискирэнца.

⁹ Пало́ (после) дава́ бичхадя́ Сенахиримо, Асирия́киро кра́ли, пэскирэн дынарье́н дро Ерусалимо, – кокоро́ ёв сыс тэрдо́ проти Лахисо, и сари́ лэ́скири зор лэ́са, – кэ Езэки́я, Юдэя́киро кра́ли, и кэ сарэ́ Юдэи (Юдэя́кирэ), савэ́ сыс дрэ Ерусалимо, тэ пхэнэ́н:

¹⁰ “Адя́кэ ракирэ́ла Сенахиримо, Асирия́киро кра́ли: Пэ со тумэ́ надеинэнапэ и сан бэштэ́ дрэ тва́рдыма дро Ерусалимо?

¹¹ Ци на хохавэла тумэн о Езэки́я, соб (кай) тэ отдэ́л тумэн мэрибна́скэ бокха́тыр и смэгатыр, ракири́: ‘Рай Дэвэ́л, Дэвэ́л амаро́, зракхэ́ла амэн Асирия́кирэ-крали́скирэ вастэ́стыр?’

¹² Ци на дава́ Езэки́я роспхагирдя́ Лэ́скирэ вучипэна́ и Лэ́скирэ алта́ри, и пхэндя́ Юда́скэ и Ерусалимоскэ: “Анги́л екх алта́рё клонинэнпэ (кэрэ́н шэрэ́са), и пэ лэ́стэ хачкирэ́н дро́га смо́лы?

¹³ Нау́што тумэ́ на джинэ́на, со кэрдём мэ и мирэ́ дада́ сарэ́ манушэ́нца пэ пхув? Ци могиндлэ́ дэвэла́, пхувья́кирэ-манушэ́нгирэ, тэ зракхэн пхув пэ́скири мирэ́ вастэ́стыр?

¹⁴ Кон сарэ́ дэвлэндыр манушэнгирэндыр, савэ́ пхагирдэ́ мирэ́ дада́, могиндлэ́ тэ зракхэн пэ́скирэ манушэ́н мирэ́ вастэ́стыр? Сыр могинэ́ла тумаро́ Дэвэ́л тэ зракхэ́л тумэн мирэ́ вастэ́стыр?

¹⁵ И акана́, мэк тэ на хохавэ́л тумэн Езэки́я и тэ на отчхурдэл тумэн адя́кэ; и тумэ́ на патя́н лэ́скэ. Ко́ли исын на дрэ зор сыс ни екх дэвэл, ни екхэ манушэ́нгиро и кралипнаскиро тэ зракхэ́л пэ́скирэ манушэ́н мирэ́ вастэ́стыр и мирэ́-дадэнги́рэ вастэ́стыр, тэды и тумаро́ Дэвэ́л на зракхэ́ла тумэн мирэ́ вастэ́стыр.”

¹⁶ И ишчо (инкэ́) бут ракирдэ́ лэ́скирэ писха́рья проти Растэ-Дэвлэ́стэ, Дэвлэ́стэ и проти Езэкиястэ, Лэ́скирэ писхаристэ.

¹⁷ И лыла́ чхиндя́ ёв, дрэ савэ́ костя Рас-Дэвлэ́с, Израилёскирэ Дэвлэ́с, и ракирдя́ проти Лэ́стэ дасавэ́ лава́: “Адя́кэ-паць сыр пхувье́нгирэ-манушэ́нгирэ дэвэла́ на зракхнэ́ пэскирэн манушэ́н мирэ́ вастэ́стыр, адя́кэ-паць Дэвэ́л Езэкия́скиро на зракхэ́ла Пэ́скирэ манушэ́н мирэ́ вастэ́стыр.”

¹⁸ И дынэ́ го́дла зоралэ́ заня́са (глосаса) пэ Юды́тко чиб кэ Ерусалимо́скирэ мануша́, савэ́ сыс пэ ва́нта, соб (кай) тэ страхакирэн лэн, и тэ трашавэн лэн, и тэ лэн фо́ро.

¹⁹ И ракирдэ́ пал Дэвлэ́стэ Ерусалимоскирэстэ, сыр пал манушэ́нгирэ дэвлорэн пэ пхув, савэ́н кэрдэ́ манушэ́нгирэ васта́.

²⁰ И мангдя́пэ кра́ли Езэки́я и Исаё, Амососкиро чхаво́, проро́ко, и задынэ го́дла кэ болыбэ́н.

²¹ И бичхадя́ Рай Дэвэ́л Янголо́с, и ёв вымардя сарэ́н муршканэн, и шэралэс барыдырэскирэс, и барыдырэ́н пэ халадэ́ндэ Асирия́кирэ крали́скирэ. И рисия́ ёв ладжаса пэ пэ́скири пхув; и, ке́ли явдя́ дро кхэр пэ́скирэ Дэвлэ́скиро, то чхавэ́, савэ́ выгинэ́ лэ́скирэ масэ́ндыр, пхусадэ́ лэс одо́й куртала́са.

²² Адя́кэ зракхця́ Рай Дэвэ́л Езэкияс и Ерусалимо́скирэ манушэ́н Сенахиримоскирэ вастэ́стыр, Асирия́кирэ крали́скирэ, и сарэнгирэ вастэ́стыр; и ракхця́ лэн сарэ́стыр.

²³ Тэды бут мануша́ янэ́нас Ра́скэ-Дэвлэ́скэ дро Ерусалимо и дро́га почасту́нки Езэкияскэ, Юдэя́кирэ крали́скэ. И ёв пхутия пало́ (после) дава́ дрэ якха́ сарэ́ манушэ́нгирэ.

²⁴ Дрэ долэ́ дывэса́ занасвалыя Езэки́я кэ мэрибэ́н. И помангдяпэ Ра́скэ-Дэвлэ́скэ; и Ёв шундя́ лэс, и дыя́ лэ́скэ ґерты́к (знаме́ниё).

²⁵ Нэ на отдыя́ Езэки́я пал кэрдо́ лэ́скэ лачхипэ́н; пал-дова́ со запхутия лэ́скиро ило́. И сыс пэ лэ́стэ Дэвлэ́скири холы́, и пэ Юдэ́я, и пэ Ерусалимо.

²⁶ Нэ, сыр чхудя́ пэс тэлэды́р Езэки́я дро пхутькирибэ́н пэ́скирэ и лэ́скиро, – кокоро́ и мануша́ Ерусалимо́скирэ, то на явдя́ пэ лэ́ндэ Ра́скирэ-Дэвлэ́скири холы́ дрэ Езэкияскирэ дывэса́.

²⁷ И сыс Езэкиястэ барвалыпэ́н древа́н бут и сла́ва; и ёв кэрдя́ пэ́стэ пираля́ ваш руп, и ваш сувнака́й, и ваш дро́га бара́, и ваш ароматытка чарья́ (парфуны) и шчы́ты, и ваш кажна дро́га кхорэ́ (сасу́ды).

²⁸ И проста пираля́ ваш дова́, со барьёла пэ пхув, ваш маро́, ваш мол и ваш ксил, и шталы ваш кажно кхэри́тко мурда́л, и гражы (дворы) ваш лэ́нгэ.

²⁹ И фо́рья кэрдя́ пэ́скэ. И ста́ды тыкнэ́ и барэ́ кхэритконэ́ мурдалэ́ндыр сыс лэ́стэ древа́н бут; пал-дова́ со дыя́ лэ́скэ Дэвэ́л древа́н баро́ миштыпэ́н.

³⁰ Ёв, Езэки́я, зачхудя упратуно Геоноскиро пане́скиро тхадыпэн и пролыджия лэн тэлэ́ кэ за́падно (пал-пани́тка) риг Давидо́скирэ-форо́скири. И кэрдя́ миштэ́с Езэки́я дрэ кажно пэ́скиро рэ́ндо.

³¹ Екх со ваш Вавилоно́скирэ-кралье́нгирэн послэнгэ савэ́н бичхавэнас кэ ёв тэ пхучэнпэ пал ґерты́к, сави́ сыс пэ пхув, ячкирдя́ лэс Дэвэ́л, соб (кай) тэ спробинэл лэс и тэ отчхакирэл саро́, со лэ́стэ сыс пэ ило́.

³² Яви́р Езэкияскирэ бутя́ и лэ́скирэ лачхэ́ рэ́нды зачхиндлэ́ дрэ Исаёскиро дыкхибэ́н, Амосо́скирэ чхавэ́скиро, пророкоскиро, и дрэ Юдэя́кирэ и Израилёскирэ-кралье́нгири лылвари́.

³³ И пасия́ пэ ве́ко Езэки́я пэ́скирэ дадэ́нца, и гарадэ́ лэс упрэ́ пэ Давидо́скирэ-чхавэ́нгирэ коплицы; и паты́в дынэ́ лэ́скэ, пало́ (после) лэ́скиро мэрибэ́н, сарэ́ Юдэя́кирэ и Ерусалимо́скирэ мануша́. И яця́ крали́са Мана́сия, лэ́скиро чхаво́, пэ штэ́то лэ́скиро.