2 Паралипоменоно 31 - Библия - Пэ Балтитко Романи чиб (Романэс) 2019

¹ И пэ ко́нцо (яго́ро) сарэ́ далэскэ, гинэ́ сарэ́ Израильтя́ни, савэ́ одо́й сыс, дрэ Юдэя́кирэ фо́рья, и розмардэ статулы, чингирдэ тэлэ́ свэнцона вэша́, и роспхагирдэ́ вучипэна́ и алта́ри пэ сари́ Юдэ́я и пэ пхув Вениаминоскири, Ефремо́скири и Манасияскири, пэ ко́нцо (яго́ро). И пало́ дова́ рисинэ́ сарэ́ Израилёскирэ чхавэ́, кажно дро пэ́скиро хулаибэн, дрэ пэ́скирэ фо́рья.

² И чхудя́ Езэки́я змены раша́нгирэ и Левитэ́нгирэ, пэ лэ́нгиро росчхуибэн, кажнонэс пашы́л пэ́скиро рэ́ндо, раша́нгиро ци Левитэнгиро, пашы́л цэ́ло схачкирибэ́н и пашы́л мирна свэ́нта дыибэна́ Ра́скэ-Дэвлэ́скэ, ваш служыныбэн, ваш шарибэ́н и славиныбэн, пашы́л Ра́скирэ-Дэвлэ́скири Кхэрэ́скири по́рта.

³ И отдыя́ кра́ли пэ́скири паш барвалыпнастыр пэ цэ́ло схачкирибэ́н; пэ злокоскиро и бэльвэлякиро цэ́ло схачкирибэ́н, и пэ цэ́ло схачкирибэ́н дрэ са́ваты и дрэ нэво́ чхон, и пэ свэ́нки, сыр исын зачхиндло́ дрэ Ра́скирэ-Дэвлэ́скиро Зако́но.

⁴ И буты́р: припхэндя́ ёв манушэ́нгэ, савэ́ дживэ́на кэ Ерусалимо, тэ дэн лэ́нгири бажын (плэскирибэн) тэ рикирэ́н раша́н и Левитэ́н, соб (кай) ёнэ тэ явэ́н дро зорало́ ду́хо (фа́но) пир Ра́скирэ-Дэвлэ́скиро Зако́но.

⁵ Ке́ли сыс пхэндло́ зоралэ́с манушэ́нгэ дава́ упхэныбэ́н, тэды яндлэ́ Израилёскирэ чхавэ́ древа́н бут англатунэ́ пло́ды марэстыр, моля́тыр (виностыр), и ксилэстыр, и авгинэстыр, и кажно со бария пэ фэ́лда; и дэшэнгирья сарэ́стыр яндлэ́ древа́н бут.

⁶ И Израильтя́ни и Юдэя́кирэ, савэ́ дживэ́на дрэ Юдэя́кирэ фо́рья, адя́кэ-паць яндлэ́ дэшэнгирья (десятины) барэ́ и тыкнэ́ мурдалэ́ндыр (ското́стыр) и дэшэнгирья свэнтонэ́ яныбнастыр, саво́ сыс посвэнцындло Ра́скэ-Дэвлэ́скэ, лэ́нгирэ Дэвлэ́скэ; и счхудэ лэн дрэ груды.

⁷ Пэ три́то чхон лынэ́ тэ чхувэ́н груды, и дро эфта́то чхон мэкнэ́.

⁸ И явнэ́ Езэки́я и тхага́рья, и дыкхнэ́ груды, и парикирдэ Ра́скэ-Дэвлэ́скэ и Лэ́скирэ Израилёскирэ манушэ́нгэ.

⁹ И пхуцяпэ Езэки́я рашандыр и Левитэндыр пал далэ́ груды.

¹⁰ И отпхэндя́ лэ́скэ Аза́рия, англатуно́ раша́й, Садоскирэ кхэрэ́стыр, и пхэндя́: “Долэ́ дывэсэ́стыр, сыр лынэ́ тэ янэ́н яныбэ́н дро Ра́скирэ-Дэвлэ́скиро Кхэр, то амэ хаям чалэ́с, и бут яця́пэ; пал-дова́ со Рай Дэвэ́л бахтякирдя́ Пэ́скирэ манушэ́н. Далэ́стыр, со яця́пэ, сыс древа́н бут.”

¹¹ И припхэндя́ Езэки́я тэ кэрэ́н скэдынэ́ шту́бы пашы́л Ра́скирэ-Дэвлэ́скиро Кхэр. И кэрдэ́ адя́кэ.

¹² И пирилыджинэ одори́к яныбэ́н, и дэшэнгирья, и отдынэ́ миштыпэна сарэ́ чачипна́са. И сыс барыдырэ́са пэ лэ́ндэ Хонания, Левито, и Симе́ё, лэ́скиро пшал, явирэса.

¹³ А Иехиило, и Азазия, и Нахафо, и Асаило, и Иеримофо, и Иозавадо, и Елиэло, и Исмахия, и Махафо и Бенания сыс дыкхибнарье́нца тэл васт Хонанияскиро и Симеёскиро, лэ́скирэ пшалэскиро, пир упхэныбэ́н крали́скиро Езэкия́скиро и Азариёскиро, саво́ сыс барыдыро́ пэ Ра́скирэ-Дэвлэ́скиро Кхэр.

¹⁴ Коре́, Имнаскиро чхаво́, Левито, ракхибнари пэ по́рта пэ васточно риг, сыс пашы́л яныбэна́ илэ́стыр Дэвлэ́скэ, тэ выдэл дова́, со сыс яндло Ра́скэ-Дэвлэ́скэ и фэдыршонэ посвэнцындлэ вешчэндыр.

¹⁵ И тэл лэ́скиро васт сыс Едено, и Миниамино, и Иешуа, и Шэмаия, и Амария, и Шэхания дрэ свэнцыбнаскирэ фо́рья, соб (кай) чачунэ́с тэ роздэн пэ́скирэ пшалэ́нгэ паша́, сыр барэскэ, адя́кэ и тыкнэскэ.

¹⁶ Апри́ч лэ́нгиро пиригиныбэ́н (пиричхиныбэн), сарэ́н муршэндыр тринэ́ бэршэ́ндыр и буты́р, сарэ́нгэ, кон псирдя́ дро Ра́скирэ-Дэвлэ́скиро Кхэр ваш кажнонэ́ дывэсэскиро рэ́ндо, ваш лэ́нгиро дынарибэ́н (служыныбэн), пэ лэ́нгирэ бутя́ и пэ лэ́нгирэ отделы (зме́ны).

¹⁷ И рашангэ, савэ́н залыджинэ дро пиричхиныбэн, пир лэ́нгирэ стрэ́чы (поколе́нии), и Левитэ́нгэ бишэ́ бэршэ́ндыр и буты́р, пэ лэ́нгирэ бутя́, и пэ лэ́нгирэ отделы (зме́ны).

¹⁸ И манушэ́нгэ, савэ́н залыджинэ дро пиричхиныбэн сарэ́ лэнгирэнца тыкнэ́ чхаворэнца, лэ́нгирэ ромне́нца, и лэ́нгирэ чхавэ́нца, и лэ́нгирэ чхае́нца, – сарэ́ скэдыибнаскэ; пал-дова́ со ёнэ сарэ́ чачипна́са отдынэ́ пэс пэ свэ́нто дынарибэ́н (служыныбэн), сыр рашая́.

¹⁹ И ваш чхавэ́нгэ Аароноскирэнгэ, рашангэ дрэ гава́, со сыс трусця́л фо́рья лэ́нгирэ, пашы́л кажно фо́ро чхудэ́ сыс мурша́ пир лав, соб (кай) тэ роздэн паша́ пхувья́кирэ сарэ́ муршэнгэ, рашангэ и сарэ́нгэ, кон сыс залыджино дро пиричхиныбэн Левитэндэ.

²⁰ Ѓа́да, со кэрдя́ Езэки́я пэ сари́ Юдэ́я, – и ёв кэрдя́ лачхипэ́н, и чачипэ́н, и патяибэ́н анги́л Растэ-Дэвлэ́стэ, пэ́скирэ Дэвлэ́стэ.

²¹ И дрэ саро́, со ёв кэрдя́ тэ дынаринэ́н (тэ служынэн) Дэвлэ́скирэ Кхэрэ́скэ и тэ ракхэ́н Зако́но и припхэныбэ́н и, думиндя пал пэ́скирэ Дэвлэ́стэ, ёв кэрдя́ сарэ́ пэ́скирэ илэ́стыр и лэ́стэ сыс бахт.