2 Паралипоменоно 30 - Библия - Пэ Балтитко Романи чиб (Романэс) 2019

¹ И бичхадя́ Езэки́я пэ сари́ Израилёскири и Юдэякири пхув, и чхиндя́ лыла́ кэ Ефре́мо и Мана́сия, соб (кай) ёнэ тэ явэ́н дрэ Ра́скирэ-Дэвлэ́скиро Кхэр дро Ерусалимо, тэ кэрэ́н Патради́ Ра́скэ-Дэвлэ́скэ, Израилёскирэ Дэвлэ́скэ.

² И обракирдэ кра́ли, и лэ́скирэ тхага́рья, и саро́ скэдыибэ́н дро Ерусалимо – тэ кэрэ́н Патради́ пэ яви́р чхон;

³ Пал-дова́ со ёнэ на могиндлэ́ тэ кэрэ́н ла дро ла́киро дывэ́с, пал-дова́ со рашая́ ишчо (инкэ́) на высвэнцындлэпэ, ци бут лэн трэй, и мануша́ на скэдынэ́пэ дро Ерусалимо.

⁴ И сыс дава́ пир ило́ крали́скэ и сарэ́ скэдыибнаскэ.

⁵ И скэдынэ́пэ тэ дэн тэ джинэ́н дро саро́ Израилё, Вирсавиятыр кэ Дано, соб (кай) тэ джа́н дро Ерусалимо тэ свэнкинэн Патради́ Ра́скэ-Дэвлэ́скэ, Израилёскирэ Дэвлэ́скэ, пал-дова́ со ґара́ на свэнкиндлэ ла, сыр исын зачхиндло́.

⁶ И гинэ́ [праста́ндынэ-ю.о.] мануша́ лылэнца крали́стыр и лэ́скирэ тхагарье́ндыр пэ сари́ Израилёскири пхув и Юдэякири, и дро крали́скиро упхэныбэ́н ракирдэ́: “Чхавэ́ Израилёскирэ! Рисён кэ Рай Дэвэ́л, Дэвэ́л Авраамо́скиро, Исаакоскиро и Израилёскиро, и Ёв рисёла кэ мануша́, савэ́ ячнэ́пэ, и савэ́ зракхнэпэ тумэ́ндэ вастэ́стыр Асирия́кирэ кралье́ндыр.

⁷ И на явэ́н адасавэ́, сыр тумарэ́ дада́ и тумарэ́ пша́ла, савэ́ на пир Зако́но кэрдэ́ анги́л Растэ-Дэвлэ́стэ, пэ́скирэ дадэнги́рэ Дэвлэ́стэ; и Ёв отдыя́ лэн пэ хасибэ́н, сыр тумэ́ дыкхэ́на.

⁸ Акана́ на явэ́н пхарэ́-шэритка, сыр тумарэ́ дада́, кандэ́н Рас-Дэвлэ́с и явэ́н дрэ Лэ́скири Кхангири́, сави́ Ёв обсвэнцындя пэ ве́ко; и дынаринэ́н (служынэн) Ра́скэ-Дэвлэ́скэ, тумарэ́ Дэвлэ́скэ, и Ёв отрискирэла тумэ́ндыр Пэ́скирэ-холякири яг.

⁹ Ке́ли тумэ́ рисёна илэ́са кэ Рай Дэвэ́л, тэды тумарэ́ пшалэ́н и тумарэ́ чхавэ́н явэ́на тэ тангинэн (тэ жалинэн) мануша́, савэ́ лынэ́ лэн дро пле́но, и рисёна пэ дая́ пхув; пал-дова́ со лачхо́ и лачхэ́-илытко исын Рай Дэвэ́л, Дэвэ́л тумаро́, и на отрискирэла муй тумэ́ндыр, ко́ли тумэ́ рисёна илэ́са кэ Ёв.”

¹⁰ И псирдэ́ мануша́ форо́стыр дро фо́ро пэ пхув Ефремо́скири и Манасияскири и кэ Завулоноскири; нэ лэ́ндыр сандлэпэ и кэрдэ́ напатывалэс (здикиндлэпэ).

¹¹ Усае́кх вари-савэ́ Асироскирэ, Манасия́скирэ и Завулоноскирэ родо́стыр кандынэ́ лэн и явнэ́ дро Ерусалимо.

¹² И пэ Юдэе́ндэ сыс Дэвлэ́скиро васт, дыи́ лэ́нгэ екх ило́, соб (кай) тэ кэрэ́н пир упхэныбэ́н крали́скиро и тхагарье́нгиро, пир Ра́скирэ-Дэвлэ́скиро лав.

¹³ И скэдынэ́пэ дро Ерусалимо древа́н бут мануша́ тэ свэнкинэн свэ́нко опреснокэнгиро, пэ яви́р чхон, – скэдыибэ́н древа́н баро́.

¹⁴ И уштынэ́, и вычхурдынэ алта́ри, савэ́ сыс дро Ерусалимо; и саро́, пэ со хачкирдэ́ дро́га смо́лы идолэ́нгэ, роспхагирдэ́ и чхурдынэ́ лэн дро Кедроноскири сы́гно рэ́кица (лэнори́).

¹⁵ И зачхиндлэ́ патрадитконэс бакрорэс пэ дэшуштарто дывэ́с явирэ-чхонэ́скиро. Рашая́ и Леви́ты заладжандынэ, высвэнцындлэпэ и яндлэ́ цэ́ло схачкирибэ́н дро Ра́скирэ-Дэвлэ́скиро Кхэр.

¹⁶ И тэрдинэ́ пэ пэ́скиро штэ́то пэ упхэныбэ́н пэ́скиро, пир Зако́но Мойза́скиро, Дэвлэ́скирэ-манушаскиро. Рашая́ чхувэ́нас ратэ́са алта́рё, лыи лэс Левитэ́нгирэ вастэ́ндыр.

¹⁷ Адя́кэ сыр бут сыс пэ скэдыибэ́н дасавэн, савэ́ на высвэнцындлэпэ, то пал нажужэндэ, Леви́ты зачхинэнас патрадитконэс бакрорэс, соб (кай) тэ высвэнцынэн лэн ваш Ра́скэ-Дэвлэ́скэ.

¹⁸ Бут манушэ́ндыр, барэды́р паш родыцо́стыр Ефремоскирэстыр и Манасияскирэстыр, Исахароскирэстыр и Завулоноскирэстыр на жужакирдэпэ; усае́кх ёнэ ханэ́ Патради́, на пир упхэныбэ́н.

¹⁹ Нэ Езэки́я мангдя́пэ пал лэ́ндэ, ракири́: “Раё Дэ́вла! Мэк тэ отмэкэ́л пэ грэ́хо кажнонэ́скэ, кон чхудя́ пэ́скиро ило́ кэ дова́ соб (кай) тэ латхэ́н Рас-Дэвлэ́с, Дэвлэ́с, пэ́скирэ дадэнги́рэ Дэвлэ́с, мэк и би свэнтонэ́ жужакирибнаскиро!”

²⁰ И шундя́ Рай Дэвэ́л Езэкияс, и отмэкця́ грэ́хо манушэ́нгэ.

²¹ И свэнкиндлэ чхавэ́ Израилёскирэ, савэ́ сыс дро Ерусалимо, свэ́нко опреснокэнгиро эфта́ дывэса́, барэ́ радыма́са; кажно дывэ́с Леви́ты и рашая́ славиндлэ Рас-Дэвлэ́с пэ струме́нты, савэ́ кэрдэ́ тэ шарэ́н Рас-Дэвлэ́с.

²² И ракирдя́ Езэки́я пир ило́ сарэ́нгэ Левитэ́нгэ, савэ́ миштэ́с галёнас дро дынарибэ́н (служыныбэн) Ра́скэ-Дэвлэ́скэ. И ханэ́ свэнкитка эфта́ дывэса́, и янэ́нас мирна свэ́нта дыибэна́ Ра́скэ-Дэвлэ́скэ и шардэ Рас-Дэвлэ́с, Дэвлэ́с пэ́скирэ дадэнгирэс.

²³ И скэдыяпэ саро́ скэдыибэ́н тэ свэнкинэл яви́р эфта́ дывэса́ и пролыджинэ далэ́ эфта́ дывэ́с дрэ ра́дыма;

²⁴ Пал-дова́ со Езэки́я, Юдэя́киро кра́ли, чхудя́ ваш манушэ́нгэ, савэ́ скэдынэ́пэ, тысёнцо гуруворэ́н и дэш тысёнцы тыкнэ́ кхэритконэ́ мурдалэ́н, и барэ́ раё чхудэ́ ваш манушэ́нгэ, савэ́ скэдынэ́пэ, тысёнцо гуруворэ́н и дэш тысёнцы тыкнэ́ кхэритконэ́ мурдалэ́н; и бут рашая́ высвэнцындлэпэ.

²⁵ И радындлэпэ сарэ́ мануша́, савэ́ скэдынэ́пэ Юдэндыр, и рашая́, и Леви́ты, и сарэ́ скэдынэ́ мануша́, савэ́ явнэ́ Израилёстыр, и мануша́, савэ́ явнэ́ явирэ ригэ́ндыр, яви́ Израильсконэ пхувья́тыр и савэ́ дживдэ́ кэ Юдэ́я.

²⁶ И сыс бари ра́дыма дро Ерусалимо, пал-дова́ со Соломоно́скирэ дывэсэ́ндыр, Давидо́скирэ чхавэ́скирэ, Израилёскирэ крали́скирэ, на сыс дасаво дро Ерусалимо.

²⁷ И уштынэ́ рашая́ и Леви́ты, и бахтякирдэ манушэ́н; и сыс шундлы лэ́нгири зан, и загия́ лэ́нгири па́тери (моли́тва) дрэ свэ́нто Кхэр Лэ́скиро пэ болыбэ́н.