2 Паралипоменоно 3 - Библия - Пэ Балтитко Романи чиб (Романэс) 2019

¹ И лыя́ Соломо́но тэ кэрэ́л Ра́скирэ-Дэвлэ́скиро Кхэр дро Еруса-лимо, пэ бэ́рга Мориа, сави́ сыс упхэндлы Давидо́скэ, лэ́скирэ дадэ́скэ, пэ штэ́то, саво́ приготовиндя Дави́до, пэ Орнаскирэ-Иевусеяниноскири шу́рна.

² Лыя́ ёв тэ кэрэ́л пэ яви́р дывэ́с явирэ чхонэ́скиро, дро шта́рто бэрш пэ́скирэ кралипнаскиро.

³ И акэ, подмуровка, сави́ чхудя́ Соломо́но, ке́ли кэрэ́нас Ра́скирэ-Дэвлэ́скиро Кхэр: длэнгипэ́н лэ́скиро сыс шовдэша́ куня́, пир доя́ ме́ра, а буґлыпэ́н биш куня́;

⁴ и трэ́мо, саво́ сыс анги́л кхэр, длэнгипна́са, пир кхэрэ́скиро буґлыпэ́н, сыс дрэ биш куня́, а вучипна́са дрэ шэл тэ биш. И обчхудя́ лэс андрэ́ жужэ́ сувнака́са.

⁵ Англуно кхэр обсудя ёв кипарисытконэ вэшэса и обчхудя́ лэс фэдыршонэ сувнака́са, и кэрдя́ пэ лэ́стэ пальмы и зандирорья́ (цэпочки).

⁶ И обчхудя́ Кхэр дрогонэ́ барэ́нца ваш шукарипэ́н; сувнака́й сыс Парваимостыр.

⁷ И учхакирдя́ Кхэр, брэвны, проги, и ва́нты лэ́скирэ, и вудара́ лэ́скирэ сувнака́са, и вычхиндя пэ ва́нты херувимы.

⁸ И кэрдя́ ёв Свэ́нто-свэнтонэнгиро: длэнгипэ́н лэ́скиро, пир буґлыпэ́н кхэрэ́скиро, сыс дрэ биш куня́, и буґлыпэ́н лэ́скиро дрэ биш куня́, и лэ́скиро буґлыпэ́н дрэ биш куня́; и учхакирдя́ лэс фэдыршонэ сувнака́са, пэ шовшэла́ тала́нты.

⁹ Дрэ гвозды (карфина) пхарипэн (весо) вага сыс пэ пандждэша́ шэ́кели сувнака́й. Залы адя́кэ-паць ёв учхакирдя́ сувнака́са.

¹⁰ И кэрдя́ ёв дрэ Свэ́нто-свэнтонэнгиро дуй херувимы вычхиндытконэ бутя́тыр, и учхакирдя́ лэн сувнака́са.

¹¹ Пхака́ (крылы) херувимэнгирэ сыс длэнгипна́са дрэ биш куня́. Екх пхак дрэ пандж куня́ дорэсэ́ла кэ Кхэрэ́скири ва́нта, а яви́р пхак дрэ пандж куня́ зджалапэ пхакаса явирэ херувимоскирьяса;

¹² дасави́-паць сыс и пхак явирэ херувимоскиро дрэ пандж куня́ и дорэсэ́ла кхэрэ́скирэ ва́нты, а яви́р пхак дрэ пандж куня́ зджалапэ пхакаса явирэ херувимоскирэса.

¹³ Пхака́ далэ́ херувимэнгирэ сыс розмэкнэ пэ биш куня́; и ёнэ сыс тэрдэ́ пэ пэ́скирэ ґэра́, пэ́скирэ муе́нца кэ Кхангири́.

¹⁴ И кэрдя́ ёв полого яхонтытконэ, пурпуронэ, и ярконэ-лолэ́ тханэстыр/матер΄алостыр (похтанэстыр) и вылыджия́ пэ лэ́стэ херувимы.

¹⁵ И кэрдя́ ёв анги́л Кхангири́ дуй сты́лбы, длэнгипна́са пир трия́нда пандж куня́, и капитэль упра́л кажно сыс дрэ пандж куня́.

¹⁶ И кэрдя́ зандирорья (цэпочки), сыр дрэ свэ́нто штэ́то, и чхудя́ упрэ́ пэ сты́лбы, и кэрдя́ шэл гранатытка пхаба́, и чхудя́ лэн пэ зандирорья.

¹⁷ И чхудя́ сты́лбы анги́л Кхангири́, екх пэ чачи́ (право) риг, яви́р пэ зэ́рво (ле́во) риг и дыя́ лав чачунэскэ Иахино (Яхино), а зэрвонэскэ лав Воазо.