2 Паралипоменоно 28 - Библия - Пэ Балтитко Романи чиб (Романэс) 2019

¹ Биш бэрш сыс Ахазоскэ, ке́ли ёв яця́ крали́са, и дэшушов бэрш ёв сыс крали́са дро Ерусалимо; и ёв на кэрдя́ лачхэ́с дрэ Ра́скирэ-Дэвлэ́скирэ якха́, сыр кэрдя́ Дави́до, лэ́скиро дад;

² Ёв гия́ Израилёскирэ-кралье́нгирэ дромэ́нца и адя́кэ-паць кэрдя́ вычхудэ́ статулы Ваалоскэ;

³ и ёв хачкирдя́ дро́га смо́лы пэ Еномоскирэ-чхавэ́нгиро до́ло, и пролыджия пэ́скирэ чхавэ́н пирда́л яг, подрикири манушэ́нгирэ магирипэна, савэ́н вытрадыя́ Рай Дэвэ́л анги́л Израилёскирэ-чхавэ́нгиро муй.

⁴ И янэлас ёв свэ́нта дыибэна́ и хачкирдя́ дро́га смо́лы пэ вучипэна́, и пэ бэ́рги, и тэл кажно ґэнсто кашт.

⁵ И отдыя́ лэс Рай Дэвэ́л, Дэвэ́л лэ́скиро, дрэ Сириянэнгирэ-крали́скирэ васта́, и ёнэ мулякирэндэ лэс, и лынэ́ лэ́стэ древа́н бут пленонэн, и лыджинэ́ лэн дро Дама́ско. Адя́кэ-паць и дрэ Израилёскирэ-крали́скиро васт сыс отдыно́ ёв, и одова́ домардя́ лэ́стэ древа́н бут манушэ́н.

⁶ И домардя́ Факе́ё, Ремалииноскиро чхаво́, Юдэ́н шэл тэ биш тысёнцы дро екх дывэ́с, марибнытконэ́ манушэ́н, пал-дова́ со ёнэ ячкирдэ́ Рас-Дэвлэ́с, пэ́скирэ-дадэнги́рэ Дэвлэ́с.

⁷ О Зихриё [Зихри-ю.о.], зоралюко Ефремлянэндыр, замардя́ Маасеёс, крали́скирэ чхавэ́с, и Азрикамос, саво́ сыс барыдыро́ пэ крали́скири фелатин, и Елканос, явирэ́с манушэ́с пал крали́стэ.

⁸ И лынэ́ Израилёскирэ чхавэ́ дро пле́но пэ́скирэ пшалэ́ндыр, Юдэе́ндыр, дуйшэла́ тысёнцы джувле́н, чхавэ́н и чхае́н; адя́кэ-паць и древа́н бут дорэсыбэ́н скэдынэ́ лэ́ндэ, и отбичхадэ дорэсыбэ́н дрэ Сама́рия.

⁹ Одо́й сыс Ра́скирэ-Дэвлэ́скиро проро́ко; лав лэ́скиро сыс Оде́до. Ёв выгия́ анги́л халадэ́нгиро муй, савэ́ гинэ́ дрэ Сама́рия, и пхэндя́ лэ́нгэ: “Акэ, Рай Дэвэ́л, Дэвэ́л тумарэ́-дадэ́нгиро, дрэ холы́ пэ Юдэ́ндэ, отдыя́ лэн дро тумаро́ васт, и тумэ́ домардэ́ лэн дасавэ́ холя́са, сави́ догия́ кэ болыбэ́н.

¹⁰ И акана́ тумэ́ думинэ́на тэ кэрэ́н дынарье́нца Юдаскирэн и Ерусалимоскирэн чхавэ́н дрэ дынарье́ндэ и дынарицэндэ пэ́скэ. А нау́што (со́скэ) пэ тумэ́ндэ кокорэндэ нанэ банг анги́л Растэ-Дэвлэ́стэ, тумарэ́ Дэвлэ́стэ?

¹¹ И адя́кэ шунэ́н ман и рискирэ́н палэ пленонэн, савэ́н тумэ́ закэдынэ тумарэ́ пшалэ́ндыр; пал-дова́ со холынакири яг исын Ра́скирэ-Дэвлэ́скири пэ тумэ́ндэ.”

¹² И уштынэ́ вари-савэ́ барыдырэндыр Ефремо́скирэ чхавэ́ндыр: Аза́рия, Иегохананоскиро чхаво́, Бере́хия, Мешылемофоскиро чхаво́, и Езэки́я, Шалумоскиро чхаво́, и Амаса́, Хадлаёскиро чхаво́, проти манушэ́ндэ, савэ́ гинэ́ (явнэ́) марибнастыр,

¹³ И пхэндлэ́ лэ́нгэ: “На лыджа́н адари́к пленонэн, пал-дова́ со грэ́хо явэ́ла амэ́нгэ анги́л Растэ-Дэвлэ́стэ. Нау́што тумэ́ думинэ́на тэ дочхувэн кэ тумарэ́ грэ́хи и кэ тумаро́ чорипэ́н? Бари исын банг амари́, и яг холынакири Ра́скирэ-Дэвлэ́скири пэ Израилё.”

¹⁴ И ячкирдэ́ халадэ́ пленонэн и дорэсыбэ́н халадэ́нгирэ барыдырэ́нгэ и сарэ́ скэдыибнаскэ.

¹⁵ И уштынэ́ мурша́, упхэндлэ пир лав, и лынэ́ пленонэн, и сарэ́н лэ́ндыр нангэн, и уридэ́ лэн дорэсыбнастыр, – и уридэ́ лэ́нгирэ ґэра́, и чалякирдэ лэн, и панякирдэ лэн, и помакхнэ лэн елеёса, и чхудэ́ пэ ослэндэ сарэ́н, савэ́ сыс бизорья́кирэ лэ́ндыр, и бичхадэ́ лэн дро Ерихо́но, фо́ро пальмэнгиро; кэ лэ́нгирэ пша́ла, и рисинэ́ дрэ Сама́рия.

¹⁶ Дрэ долэ́ дывэса́ бичхадя́ кра́ли Аха́зо кэ Асирия́киро кра́ли, соб (кай) ёнэ тэ дэн васт (тэ помогинэн) лэ́скэ.

¹⁷ Пал-дова́ со Идумеяни и ишчо (инкэ́) явэ́нас, и бутэн домардэ́ дрэ Юдэ́я, и лынэ́ дрэ пле́но;

¹⁸ и Филистимля́ни розгинэпэ пир фо́рья пэ тэлатуны округа и паш-дывэ́с Юдэе́нгиро, и лынэ́ Вефсамисо и Аиалоно, и Гедерофо, и Сохо и фо́рья, савэ́ сыс тэл лэ́скири зор, и Фимна, и фо́рья, савэ́ сыс тэл лэ́скири зор, и Гимзо и фо́рья, савэ́ сыс тэл лэ́скири зор, и лынэ́ тэ дживэ́н одо́й.

¹⁹ Адя́кэ чхудя́ тэлэ́ Рай Дэвэ́л Юдэ́я пал Ахазостэ, Юдэя́кирэ крали́стэ, пал-дова́ со ёв лыджия дро блэ́ндо Юдэ́я и пхарэ́с кэрдя́ грэ́хо анги́л Растэ-Дэвлэ́стэ.

²⁰ И явдя́ кэ ёв Феглафеласаро, Асирия́киро кра́ли; нэ ёв сыс дро пхарипэ́н лэ́скэ, заме́ст дова́, соб (кай) тэ помогинэл лэ́скэ;

²¹ пал-дова́ со Аха́зо лыя́ барвалыпэ́н Ра́скирэ-Дэвлэ́скирэ Кхэрэскир и крали́скирэ кхэрэ́стыр и тхагарье́ндыр, и отдыя́ Асирия́кирэ крали́скэ; нэ одова́ на помогиндя лэ́скэ.

²² И дрэ пхарэ́ ваш пэ́скэ дывэса́ ёв усае́кх кэрдя́ на пир Зако́но анги́л Растэ-Дэвлэ́стэ, ёв – кра́ли Аха́зо.

²³ И янэлас ёв свэ́нта дыибэна́ Дамасконэ дэвлорэ́нгэ, думины, со ёнэ дукхадэ лэс, и ракирдя́: “Дэвэла́ Сириякирэ-кралье́нгирэ помогинэна лэ́нгэ: яна́ва мэ свэ́нто дыибэ́н лэ́нгэ, и ёнэ помогинэна ма́нгэ.” Нэ ёнэ сыс пэ хасибэ́н лэ́скэ и сарэ́ Израилёскэ.

²⁴ И скэдыя́ Аха́зо кхорэ́ (сасу́ды) Дэвлэ́скирэ Кхэрэскир, и роспхагирдя́ пэ котэра́ кхорэ́ Дэвлэ́скирэ Кхэрэскир запхандя Ра́скирэ-Дэвлэ́скирэ Кхэрэскирэ вудара́, и кэрдя́ пэ́скэ алта́ри пир сарэ́ вэ́нглы дрэ Ерусалимо;

²⁵ И пир сарэ́ Юда́скирэ фо́рья ёв кэрдя́ вучипэна́ тэ кадинэн явирэ дэвлорэ́нгэ, и холякирдя Рас-Дэвлэ́с, пэ́скирэ-дадэнгирэс Дэвлэ́с.

²⁶ Яви́р лэ́скирэ рэ́нды (де́лы) и сарэ́ лэ́скирэ кэрибэна, англатунэ́ и палатунэ́ (последня), исын зачхиндлэ́ дрэ Юдэя́кирэ и Израилёскирэ-кралье́нгири лылвари́.

²⁷ И пасия́ ве́чнэс Аха́зо пэ́скирэ дадэ́нца, и гарадэ́ лэс дрэ фо́ро, дро Ерусалимо; нэ на лыджинэ́ лэс дрэ коплицы Израилёскирэ-кралье́нгирэ. И яця́ крали́са Езэки́я, лэ́скиро чхаво́, пэ штэ́то лэ́скиро.