2 Паралипоменоно 19 - Библия - Пэ Балтитко Романи чиб (Романэс) 2019

¹ И рисия́ кану́то (цэло) Иосафа́то, Юдэя́киро кра́ли дро пэ́скиро кхэр дро Ерусалимо.

² И выгия́ гил лэ́скэ Ииу́ё, Ананияскиро чхаво́, магико, и пхэндя́ крали́скэ Иосафатоскэ: “Ци трэиндя́ ту́кэ тэ дэс васт (помогинэс) надывлытконэнгэ и тэ сыкавэс ла́ска манушэ́нгэ, савэ́ бидыкхэна Рас-Дэвлэ́с? Палдава́ пэ ту́тэ холы́ Ра́стыр-Дэвлэ́стыр.

³ Нэ и лачхипэ́н латхно дрэ ту́тэ, пал-дова́ со ту пхагирдян вычхиндлэ́ муя́ пэ Юдэякири пхув и отлыджиян пэ́скиро ило́ кэ дова́, соб (кай) тэ латхэс Дэвлэ́с.

⁴ И дживдя́ Иосафа́то кэ Ерусалимо. И нэвэ́с лыя́ ёв тэ обджал манушэ́н пэскирэн Вирсавиятыр кэ Ефремо́скири бэ́рга, и обрискирдя годы́ (бэрша́) лэ́нгири кэ Рай-Дэвэ́л, Дэвэ́л лэ́нгирэ-дадэ́нгиро.

⁵ И чхудя́ сэндарье́н пэ пхув пир сарэ́ Юдэя́кирэ фо́рья зоралэ́ тынэ́нца, дро кажно фо́ро,

⁶ и пхэндя́ сэндарье́нгэ: “Дыкхэ́н, со тумэ́ кэрэ́на, тумэ́ кэрэ́на на сэ́ндо манушы́тко, нэ сэ́ндо Ра́скирэ-Дэвлэ́скиро; и Ёв явэ́ла тумэ́нца дро рэ́ндо сэндоскиро.

⁷ И адя́кэ мэк тэ явэ́л дар Ра́скирэ-Дэвлэ́скири пэ тумэ́ндэ: кэрэ́н, обдумины (обдыкхи); пал-дова́ со нанэ Растэ-Дэвлэ́стэ, Дэвлэ́стэ амарэстэ, ни начачипэ́н, ни дуемуиткима, ни соб (кай) тэ прилэ́н да́ры.

⁸ И дро Ерусалимо яндя́ Иосафа́то вари-савэ́н Левитэндыр и рашандыр и шэралэн пэ стрэ́чы пир Израилё – кэ Ра́скирэ-Дэвлэ́скиро сэ́ндо и кэ пхарипэна. И рисинэ́ кэ Ерусалимо.

⁹ И дыя́ лэ́нгэ упхэныбэ́н, ракири́: “Адя́кэ кэрэ́н дара́са (дарьяса) Ра́стыр-Дэвлэ́стыр, чачипна́са и жужэ́ илэ́са:

¹⁰ дро кажно спрэчно рэ́ндо, саво́ явэ́ла кэ тумэ́ тумарэ́ пшалэ́ндыр, савэ́ дживэ́на дро пэ́скирэ фо́рья, ци пал ратэскиро прочхуибэн, ци пал Зако́но, припхэныбэна́, упхэныбэна́, и припхэныбэна́, сыклякирэ́н лэн, соб (кай) ёнэ тэ на кэрэ́н нисаво́ фуипэ́н анги́л Растэ-Дэвлэ́стэ, и тэ на явэ́л бы холы́ Лэ́скири пэ тумэ́ндэ и пэ пшалэ́ндэ тумарэндэ; адя́кэ кэрэ́н, – и тумэ́ на кэрэ́на грэ́хо.

¹¹ И ґа́да, Амария, саво́ исын англатуно́ раша́й, пэ тумэ́ндэ дро кажно рэ́ндо Ра́скирэ-Дэвлэ́скиро, а Зевадия, Исмаилоскиро чхаво́, Юда́скирэ-кхэрэ́скиро тхага́ри (князё), дро кажно крали́скиро рэ́ндо, и дыкхибнарьенца явэ́на Леви́ты анги́л тумэ́ндэ. Явэ́н муршканэ́ и кэрэ́н, и явэ́ла Рай Дэвэ́л лачхипна́са.”