2 Паралипоменоно 15 - Библия - Пэ Балтитко Романи чиб (Романэс) 2019

¹ Тэды пэ Азариястэ, Одедоскирэ чхавэ́стэ, гия́ тэлэ́ Дэвлэ́скиро Ду́хо (Фа́но),

² и выгия́ ёв гил (пэ стреч) Асаскэ и пхэндя́ лэ́скэ: “Шун ман, Аса́ и саро́ Ю΄да и Вениамино: тэ явэ́л Дэвэ́л тумэ́нца, ке́ли тумэ́ явэ́на Лэ́са; и ко́ли явэ́на тэ родэ́н Лэс, тумэ́ латхэ́на Лэс; ко́ли ячкирэна Лэс, то и Ёв ячкирэ́ла тумэн.

³ Бут дывэса́ Израилё сыс би чачунэскиро Дэвлэ́скиро и би рашаскиро, саво́ сыклякирэлас, и би законоскиро;

⁴ нэ ке́ли ёв рисёла годя́са дро пхарипэ́н пэ́скиро кэ Рай Дэвэ́л, Дэвэ́л Израилёскиро, и латхэ́ла Лэс, Ёв дэ́ла лэ́нгэ тэ латхэ́н Пэс.

⁵ Дрэ долэ́ дывэса́ на явэ́ла рама́нё (миро) ни выгиибнытконэскэ, ни загиибнытконэскэ, пал-дова́ со баро́ пиридживипэн явэ́ла сарэ́ пхувья́кирэ манушэ́ндэ.

⁶ Мануша́ явэ́на тэ марэ́нпэ манушэ́нца, и фо́ро фороса, пал-дова́ со Дэвэ́л янэ́ла лэн дрэ ту́га разнонэ бидэнца.

⁷ Нэ тумэ́ зоралён, и мэк тэ на ячэн бизорья́кирэ тумарэ́ васта́, пал-дова́ со исын награда (мазу́ри) пал тумарэ́ рэ́нды.”

⁸ Ке́ли шундя́ Аса́ далэ́ лава́ и ангилпхэныбэ́н (пророчыныбэн) Одедоскирэ-пророкоскирэ чхавэ́скирэ, тэды лыя́ пэс дрэ васта́ и вычхурдыя наюды́тка магирибэна сарэ́ пхувья́тыр Юдаскирьятыр и Вениаминоскирьятыр и форьндыр, савэ́ ёв лыя́ пэ Ефремо́скири бэ́рга, и нэвякирдя Ра́скирэ-Дэвлэ́скиро алта́рё, саво́ сыс анги́л трэ́мо Ра́скирэ-Дэвлэ́скиро.

⁹ И скэдыя́ сарэ́н манушэ́н Юдастыр и Вениаминостыр и манушэ́н, савэ́ дживдэ́ лэ́са, савэ́ пиригинэ́ Ефремостыр и Манасиястыр и Симеоностыр; пал-дова́ со бут Израилёстыр пиригинэ́ кэ ёв, ке́ли дыкхнэ́, со Рай Дэвэ́л, Дэвэ́л лэ́скиро, сыс лэ́са.

¹⁰ И скэдынэ́пэ дро Ерусалимо пэ три́то чхон, дрэ дэшупанджто бэрш, сыр Аса́ лыя́ тэ кралинэ́л;

¹¹ и яндлэ́ дро дова́ дывэ́с свэ́нто дыибэ́н Ра́скэ-Дэвлэ́скэ дорэсыбнастыр, саво́ яндлэ́, барэ́ кхэритконэ́ мурдалэ́ндыр эфташэла́ и тыкнэ́ эфта́ тысёнцы;

¹² и загинэ́ дро заве́то, соб (кай) тэ латхэс пэ́скирэ Рас-Дэвлэ́с, дадэнги́рэ Дэвлэ́с, сарэ́ пэ́скирэ илэ́стыр и сарэ́ пэ́скирэ де́стыр;

¹³ а кажно (сва́ко), кон на лэ́ла тэ родэ́л Рас-Дэвлэ́с, Израилёскирэ Дэвлэ́с, банго́ явэ́ла тэ мэрэ́л, ци тыкно́ ёв, ци баро́, ци мурш, ци джувлы́.

¹⁴ И совлахадэ Ра́скэ-Дэвлэ́скэ зоралэ́ заня́са (глосаса) и годлыпнаса, и пашы́л зан рогэнгири и горноскири.

¹⁵ И радындлэпэ сарэ́ Юдэя́кирэ мануша́ далэ́ совлахакэ, пал-дова́ со сарэ́ пэ́скирэ илэ́стыр и сарэ́ камибнаса латхнэ́ Лэс, и Ёв дыя́ лэ́нгэ тэ латхэ́н Пэс. И дыя́ лэ́нгэ Рай Дэвэ́л рама́нё (миро) сарэ́ ригэ́ндыр.

¹⁶ И Маахатыр, пэ́скирэ датыр, кра́ли Аса́, отлыя кралипнаскиро барипэ́н пал дова́, со ёй кэрдя́ идоло ваш дэмбитко вэшоро. И росчингирдя Аса́ идоло ла́киро, и чингирдя лэс пэ котэра́, и хачкирдя́ пэ Кедроноскиро до́ло.

¹⁷ На дыкхи́, со вучипына на сыс отпарудэ дро Израилё, нэ ило́ Аса́скиро сыс сарэ́са отдыно́ Ра́скэ-Дэвлэ́скэ дрэ сарэ́ лэ́скирэ дывэса́.

¹⁸ И яндя́ ёв обсвэнцындлэ кхорэ́ (сасу́ды) лэ́скирэ дадэ́скирэ и лэ́скирэ предме́ты, савэ́ ёв посвенцындя ваш Дэвлэ́скиро Кхэр, руп, и сувнака́й, и кхорэ́.

¹⁹ И на сыс марибэ́н кэ трия́нда па́нджто бэрш дро Аса́скиро кралипэ́н.