2 Паралипоменоно 14 - Библия - Пэ Балтитко Романи чиб (Романэс) 2019

¹ И пасия́ ве́чнэс Авия́ пэ́скирэ дадэ́нца, и ґарадэ́ лэс дро Давидо́скиро фо́ро. И яця́ крали́са Аса́, лэ́скиро чхаво́, пэ лэ́скиро штэ́то. Дрэ лэ́скирэ дывэса́ откиныя пхув дэш бэрш.

² И кэрдя́ Аса́ лачхипэ́н и чачипэ́н дрэ Ра́скирэ-Дэвлэ́скирэ, пэ́скирэ Дэвлэ́скирэ якха́:

³ и пхагирдя́ ёв алта́ри напэскирэ явирэ-дэвлорэнгирэ и вучипэна́, и розмардя́ статулы, и вычингирдя обсвэнцындлэ вэша́;

⁴ и припхэндя́ Юдэе́нгэ тэ родэ́н Рас-Дэвлэ́с, пэ́скирэ-дадэнги́рэ Дэвлэ́с, и тэ сполнинэн Лэ́скиро зако́но и припхэныбэна́;

⁵ и ёв отпарудя (на прилыя́) дрэ сарэ́ Юдэе́нгирэ фо́рья вучипэна́ и статулы кхамэскэ. И штыл сыс пашы́л лэ́стэ дро кралипэ́н.

⁶ И кэрдя́ ёв фо́рья зоралэ́ тынэ́нца дрэ Юдэ́я, пал-дова́ со штыл сыс пэ пхув, и на сыс лэ́стэ марибэ́н дрэ долэ́ бэрша́, адя́кэ сыр Рай Дэвэ́л дыя́ рама́нё лэ́скэ.

⁷ И пхэндя́ ёв Юдэе́нгэ: “Кэра́са амэ далэ́ фо́рья и облыджаса лэн вантэнца вучарденца (башне́нца), портэнца и шыберэнца (запорэнца); пхув исын амари́, пал-дова́ со, амэ латхям Лэс, – и Ёв дыя́ амэ́нгэ рама́нё сарэ́ ригэ́ндыр.” И лынэ́ тэ кэрэ́н, и сыс бахт лэ́ндэ.

⁸ И сыс Асастэ халадэнгири зор: гинэ́ пэ марибэ́н шчытэнца и чхурдыбнытконэ бустяса (коп΄ёса) Юда́скирэ родыцо́стыр трин шэла́ тысёнцы, и Вениамино́скирэ родыцо́стыр, савэ́ гинэ́ шчытэнца и, савэ́ мардэ́ лукэндыр дуй шэла́ охтодэша́ тысёнцы, муршканэ́ мануша́.

⁹ И выгия́ пэ лэ́ндэ Зараё Ефиоплянино халадыбнаса дрэ тысёнцо тысёнцы и тринэ́ шэлэнца марибнытконэ́ вурдынэнца, и догия́ кэ Маре́ша.

¹⁰ И выгия́ Аса́ проти лэ́стэ, и тэрдинэ́ пэ марибэ́н пэ до́ло Цэфато, пашы́л Маре́ша.

¹¹ И кхардя́ зоралэ́с Аса́ кэ Рай Дэвэ́л, пэ́скиро Дэвэ́л, и пхэндя́: “Раё Дэ́вла! Ци на дрэ Тыри́ зор тэ помогинэс зоралэскэ, ци бизорьякирэскэ? Помогин амэ́нгэ, Раё Дэ́вла, Дэвэ́л амаро́: пал-дова́ со амэ Ту́тыр ужакираса лачхипэ́н, и дрэ Тыро́ лав выгиям амэ проти далэ́ бутэндэ манушэ́ндэ. Раё Дэ́вла! Ту сан амаро́ Дэвэ́л: мэк тэ на пиризорьякирэл Тут ману́ш.”

¹² И мулякирдя́ Рай Дэвэ́л Ефиоплянэн анги́л муй Аса́скиро и анги́л муй Юда́скиро, и праста́ндынэ криг Ефиопляни.

¹³ И традыя́ лэн Аса́ и мануша́, савэ́ сыс лэ́са, кэ Гераро, и пынэ́ Ефиопляни адя́кэ, со лэ́ндэ никонэ́с на яця́пэ джидэндыр, пал-дова́ со ёнэ сыс домардэ́ анги́л Растэ-Дэвлэ́стэ и анги́л Лэ́скиро халадыбэ́н. И лынэ́ дорэсыбэ́н древа́н бут.

¹⁴ И роспхагирдэ́ сарэ́ фо́рья трусця́л (вокруг) Гераро, пал-дова́ со пыя́ пэ лэ́ндэ дар Ра́стыр-Дэвлэ́стыр; и рочордэ ёнэ сарэ́ фо́рья, и вылыджинэ́ лэ́ндыр древа́н бут чордо.

¹⁵ Адя́кэ-паць и чхупнарьенгирэ (пастухэнгирэ) ша́тры росчордэ, и традынэ пэ́са бут кхэритконэ́ мурдалэ́н (ското), тыкно́ ското и верблюдэн, и рисинэ́ дро Ерусалимо.