2 Паралипоменоно 11 - Библия - Пэ Балтитко Романи чиб (Романэс) 2019

¹ И явдя́ Ровоа́мо дро Ерусалимо, и кхардя́ Юда́скирэ и Вениаминаскирэ кхэрэ́стыр шэл охтодэша́ тысёнцы фэдыршонэ халадэ́н, соб (кай) тэ марэ́нпэ Израилёса и тэ рискирэ́н кралипэ́н Ровоамоскэ.

² И сыс Ра́скирэ-Дэвлэ́скиро лав кэ Саме́ё, саво́ сыс Дэвлэ́скиро ману́ш, и сыс пхэндло́:

³ “Пхэн Ровоамоскэ, Соломоно́скирэ чхавэ́скэ, Юдэя́кирэ крали́скэ, и сарэ́ Израилёскэ дрэ Юда́скиро и Вениаминоскиро родыцо́скэ:

⁴ адя́кэ ракирэ́ла Рай Дэвэ́л: “На псирэ́н и на кэрэ́н марибэ́н тумарэ́ пшалэ́нца; рисён сва́ко (кажно) дро пэ́скиро кхэр, пал-дова́ со Мэ кэрдём дава́.” Ёнэ шундлэ́ Ра́скирэ-Дэвлэ́скирэ лава́ и рисинэ́ гиибнастыр проти Еровоамостэ.

⁵ Ровоа́мо дживдя́ кэ Ерусалимо; ёв облыджия фо́рья дрэ Юдэ́я вантэнца.

⁶ Ёв кэрдя́ зоралэды́р Вифлее́мо, и Ефамо, и Фекоя,

⁷ и Вефцуро, и Сохо, и Одоламо,

⁸ и Ге́фо, и Маре́шо, и Зифо,

⁹ и Адораимо, и Лахисо, и Азека,

¹⁰ и Цора, и Аиалоно, и Хевро́но, савэ́ сыс дрэ Юда́скиро и Вениаминоскиро ро́дыцо.

¹¹ И кэрдя́ ёв далэ́ тва́рдыми (кре́пости), и чхудя́ дрэ лэ́ндэ барыдырэ́н пэ ракхибэн ваш маро́ и вэшытко дзэт и мол.

¹² И дыя́ ёв дро кажно фо́ро шчы́ты и чхурдыибнытка бустя́ (коп΄и), и кэрдя́ лэн древа́н зоралэ́. И ячнэ́пэ пал лэ́стэ Ю΄да и Вениамино.

¹³ И рашая́, и Леви́ты, савэ́ сыс пир сари́ Израилёскири пхув, скэдынэ́пэ кэ ёв сарэ́ ригэ́ндыр,

¹⁴ пал-дова́ со ячкирдэ́ Леви́ты пэ́скирэ пашы́л-форитка кхэра́ и пэ́скирэ маёнки, и явнэ́ дрэ Юдэ́я и дро Ерусалимо; адя́кэ сыр ячкирдя́ лэн Еровоа́мо и лэ́скирэ чхавэ́ Ра́скирэ-Дэвлэ́скирэ рашаибнастыр

¹⁵ и чхудя́ ёв пэ́стэ жрецэн пэ вучипэна́, и кэ бузнэ (козлы), и кэ тэрнэ́ гурува, савэ́ ёв кэрдя́.

¹⁶ А пал лэ́ндэ сарэ́н Израилёскирэ родыцэндыр, савэ́ отдынэ́ ило́ пэ́скиро, соб (кай) тэ латхэс Рас-Дэвлэ́с, Дэвлэ́с Израилёскирэс, савэ́ явэ́нас дро Ерусалимо, соб (кай) тэ янэс свэ́нто дыибэ́н пэ́скирэ Ра́скэ-Дэвлэ́скэ, дадэнги́рэ Дэвлэ́скэ.

¹⁷ И кэрдэ́ ёнэ зоралэды́р Юда́скиро кралипэ́н, и подрикирэнас Ровоамос, Соломоно́скирэ чхавэ́с, трин бэрш, пал-дова́ со ёнэ псирдэ́ дромэ́са Давидоскирэса и Соломоноскирэса дрэ далэ́ трин бэрш.

¹⁸ И лыя́ пэ́скэ Ровоа́мо дрэ ромня́тэ (палоро́м) Махалафа, чха Еримофоскирья, Давидо́скирэ-чхавэ́скирэ, и Авихаиля, Елиавоскирья чха, Есеёскирэ-чхавэскирья,

¹⁹ и ёй бияндя́ лэ́скэ чхавэ́н: Иеусос, и Шэмарияс, и Загамос.

²⁰ Пало́ (после) ла́тэ ёв лыя́ Мааха, Авесаломоскирья чха, и ёй бияндя́ лэ́скэ Авияс, и Атаёс, и Зизос и Шэломифос.

²¹ И камдя́ Ровоа́мо Мааха, Авесаломоскирья чха, буты́р сарэ́ндыр ромне́ндыр и наложницэндыр пэскирэндыр, пал-дова́ со сыс лэ́стэ дэшуохто ромня́ и шовдэша́ наложницы, и лэ́стыр бия́ндынэ биш тэ охто́ чхавэ́ и шовдэша́ чхая́.

²² И чхудя́ Ровоа́мо Авияс, Маахаякирэ чхавэ́с, шэралэса и тхагариса (князёса) пэ лэ́скирэ пшалэ́ндэ; пал-дова́ со ёв камдя́ тэ чхувэ́л лэс крали́са.

²³ И кэрдя́ ёв годьварэс, и бичхадя́ сарэ́н пэскирэн чхавэ́н пир сарэ́ Юда́скирэ и Вениамино́скирэ пхувья́, дрэ сарэ́ фо́рья зоралэ́ тынэ́нца, и дыя́ лэ́нгэ плэскирибэн баро́, и ёв латхя́ бут ромнен ваш лэ́нгэ.