2 Паралипоменоно 1 - Библия - Пэ Балтитко Романи чиб (Романэс) 2019

¹ И яця́ зоралэды́р Соломо́но, Давидо́скиро чхаво́, дрэ кралипэ́н пэ́скиро; и Рай Дэвэ́л, Дэвэ́л лэ́скиро, сыс лэ́са, и ґаздыя́ лэс вучэ́с.

² И припхэндя́ Соломо́но тэ скэдэ́нпэ сарэ́ Израилёскэ: барыдырэ́нгэ пэ тысёнцы, и барыдырэ́нгэ пэ шэла́, и сэндарьенгэ, и сарэ́нгэ, кон сыс барыдыро́ пир саро́ Израилё – родэнгирэ (стрэчэнгирэ) шэралэнгэ.

³ И гинэ́ Соломо́но и саро́ скэдыибэ́н лэ́са пэ вучипэ́н, со сыс дро Гавао́но; пал-дова́ со одо́й сыс Дэвлэ́скири скэдыибна́скири ски́ния, сави́ кэрдя́ Мо́йза (Моисеё), Ра́скирэ-Дэвлэ́скиро писха́ри, пэ чхучи́ пхув.

⁴ Ковчэго Дэвлэ́скиро яндя́ Дави́до Кириафиаримостыр [Кири́аф-Яримостыр-ю.о.] пэ штэ́то, саво́ приготовиндя ваш лэ́скэ Дави́до, кэрдя́ ваш Лэ́скэ ски́ния дро Ерусалимо.

⁵ А харкуно (медно) алта́рё, саво́ кэрдя́ Веселеило, Урияскиро чхаво́, Ораскирэ-чхавэ́скиро, яця́пэ одо́й, анги́л Ра́скирэ-Дэвлэ́скири ски́ния, и дэ́нас паты́в одо́й Лэ́скэ Соломо́но скэдыибнаса.

⁶ И одо́й анги́л муй Ра́скирэ-Дэвлэ́скиро, пэ харкуно алта́рё, саво́ сыс анги́л скэдыибна́скири ски́ния, ґаздыя́ Соломо́но тысёнцо цэ́ло схачкирибэ́н.

⁷ Дрэ доя́ рат сыкадыя́ Дэвэ́л Соломоно́скэ и пхэндя́ лэ́скэ: “Манг, со Ма́нгэ тэ дав ту́кэ?”

⁸ И пхэндя́ Соломо́но Дэвлэ́скэ: “Ту кэрдя́н Давидо́скэ, мирэ́ дадэ́скэ, баро́ лачхипэ́н и чхудя́н ман крали́са пэ штэ́то лэ́скиро.

⁹ Мэк тэ кэрэ́лпэ кэ ко́нцо/яго́ро (тэ сполнинэ́лпэ), Раё Дэ́вла, лав Тыро́ кэ Дави́до, миро дад. Адя́кэ сыр Ту чхудя́н ман крали́са пэ бутэ́ манушэ́ндэ, савэ́ исын сыр пра́хо пхувья́киро,

¹⁰ то тэды акана́ дэ ма́нгэ годы́ и джиныбэ́н, соб (кай) мэ тэ джина́в анги́л адалэ́ манушэ́ндэ, сыр тэ выджав и тэ заджав; пал-дова́ со, кон могинэ́ла тэ хулаинэ́л (тэ сэндякирэ́л) чачунэ́с далэ́ Тырэ́ бутэ́ манушэ́нца?”

¹¹ И пхэндя́ Дэвэ́л Соломоно́скэ: “Пал-дова́, со дава́ сыс пэ тыро́ ило́, и ту на мангдян ни барвалыпэ́н, ни фелатин и ни сла́ва, и ни ди вэргэ́нгирэ тырэнгирэ, и адя́кэ-паць ту на мангдян пэ́скэ бут дывэса́, а мангдян пэ́скэ годы́ и джиныбэ́н, соб (кай) тэ хулаинэс (тэ сэндякирэс) чачунэ́с Мирэ́ манушэ́нца, пэ савэ́ндэ Мэ чхудём крали́са тут,

¹² годы́ и джиныбэ́н дэ́лапэ ту́кэ, а барвалыпэ́н, и фелатиня, и сла́ва Мэ да́ва ту́кэ дасавэ́, ровня савэ́нгэ на сыс кралье́ндэ англэды́р ту́тыр, и на явэ́ла пало́ (после) ту́тэ.”

¹³ И явдя́ Соломо́но вучипна́стыр, со сыс дро Гавао́но, скэдыибнаскирэ скиниятыр дро Ерусалимо; и сыс ёв крали́са пэ Израилё.

¹⁴ И скэдыя́ Соломо́но марибны́тка вурдына́ и манушэ́н, савэ́ сыс уклистэ́ пэ грэ́ндэ; и сыс лэ́стэ тысёнцо штаршэла́ вурдына́ и дэшуду́й тысёнцы мануша́, савэ́ сыс уклистэ́ пэ грэ́ндэ; и ёв росчхудя́ лэн тэ дживэ́н дрэ вурдэнытка фо́рья и пашы́л крали́стэ дро Ерусалимо.

¹⁵ И кэрдя́ кра́ли руп и сувнака́й дро Ерусалимо пир дасави́-паць тими́н, сыр просто бар, а кедры, сыр лэн бут, кэрдя́ дасави́-паць тими́н сыр сикоморэнгэ, савэ́ исын пэ тэлатунэ́ штэ́ты.

¹⁶ Грэн Соломоно́скэ янэ́нас Египто́стыр Куватыр: ку́пцы (тылга́рья) кральенгирэ Куватыр кинэнас лэн пал ловэ́.

¹⁷ Марибны́тко вурдэ́н сыс дорэсно и яндло сыс Египто́стыр пал шовшэла́ шэ́кели руп, а грай пал шэл тэ пандждэша́. Адя́кэ-паць ёнэ пэ́скирэ вастэ́нца янэ́нас дава́ сарэ́ кралье́нгэ Хетеенгирэнгэ и кралье́нгэ Арамеенгирэнгэ.