2 Kralip 7 - Библия - Пэ Балтитко Романи чиб (Романэс) 2019

¹ Ке́ли кра́ли дживдя́ дро пэ́скиро кхэр, и Рай Дэвэ́л штылякирдя лэс сарэ́ лэ́скирэ пашатунэ́ вэргэ́ндыр,

² тэды пхэндя́ кра́ли пророкоскэ Нафаноскэ: “Ѓа́да, мэ джива́ва дро кедрытко кхэр, а Ра́скирэ-Дэвлэ́скиро ковчэго исын тэл ша́тра.”

³ И пхэндя́ Нафано крали́скэ: “Саро́, со исын ту́тэ пэ ило́, джа́, кэр; пал-дова́ со Рай Дэвэ́л исын ту́са.”

⁴ Нэ дрэ доя́ рат сыс лав Ра́скирэ-Дэвлэ́скиро кэ Нафано:

⁵ “Джа́, пхэн Мирэ́скэ писхари́скэ Давидо́скэ: ‘А́дякэ ракирэ́ла Рай Дэвэ́л: ци ту кэрэ́са Ма́нгэ кхэр, соб (кай) Мэ тэ явав одо́й,

⁶ ке́ли Мэ на дживдём долэ́ часостыр дро кхэр, сыр вылыджиём Израилёскирэ чхавэ́н Египто́стыр, и кэ дава́ дывэ́с, нэ пиригиём дрэ ша́тра и дрэ ски́ния?

⁷ Кай Мэ на псирдём сарэ́нца Израилёскирэ чхавэ́нца, ци ракирдём Мэ екх лав вари-савэ́скэ родо́стыр, савэ́скэ Мэ выкэдыём тэ ракхэ́л Мирэ́, Израилёскирэ манушэ́н: “Со́скэ на чхувэ́на Ма́нгэ кедрытко кхэр?’”

⁸ И какана́ адя́кэ пхэн Мирэ́ писхари́скэ Давидо́скэ: “А́дякэ ракирэ́ла Рай Дэвэ́л, болыбна́скирэ-янголэ́нгиро: ‘Мэ лыём тут бакрэ́нгирэ стадатыр, соб (кай) ту тэ явэс Мирэ́ Израилёскирэ манушэ́нгирэ шэралэса;

⁹ и Мэ со́мас ту́са усенде (везде), карик на псирдяное ту, и традыём криг сарэ́н тырэ́ вэргэ́н анги́л ту́тэ, и кэрдём лав тыро́ славутнонэса, сыр исын лав славутнонэнгиро пэ пхув.

¹⁰ И Мэ кэра́ва штэ́то ваш Мирэ́ манушэ́нгэ, ваш Израилё, и Мэ чхува́ва пэ пхув лэс, и явэ́ла ёв штылэ́с тэ дживэ́л пэ пэ́скиро штэ́то, и на явэ́ла тэ тугинэлпэ буты́р, и налачхэ́ мануша́ на явэ́на буты́р тэ традэ́н лэс, сыр англэды́р,

¹¹ долэ́ часостыр (цыростыр), сыр Мэ чхудём сэндарьен пэ Мирэ́ Израилёскирэ манушэ́ндэ; и Мэ штылякирава тут сарэ́ тырэ́ вэргэ́ндыр. И Мэ Рай Дэвэ́л дэ́ла лав ту́кэ, со Ёв кэрэ́ла ту́кэ кхэр.

¹² Ке́ли сполнинэнапэ тырэ́ дывэса́, и ту пасёса тырэ́ дадэ́нца, тэды Мэ чхува́ва пало́ (после) ту́тэ тыро́ ро́до, саво́ выджа́ла тырэ́ масэ́ндыр, и зоралякирава лэ́скиро кралипэ́н.

¹³ Ёв кэрэ́ла кхэр ваш Мирэ́ лавэ́скэ, и Мэ чхува́ва лэ́скиро кралипэ́н пэ ве́ко.

¹⁴ Мэ ява́ва лэ́скэ дадэ́са, и ёв явэ́ла Ма́нгэ чхавэ́са; и ко́ли (со) ёв кэрэ́ла грэ́хо, Мэ чхува́ва хась (ка́ра) пэ лэ́стэ муршэнгирэ кхенингоскирэ дэстэса и марибна́са манушытконэ́ чхавэ́ндыр;

¹⁵ нэ тангипэ́н (жалима) Миро Мэ на отлава лэ́стыр, сыр Мэ отлыём Саулостыр, савэ́с Мэ мэкцём анги́л ту́тэ.

¹⁶ И явэ́ла зоралэ́с тэрдо́ тыро́ кхэр и кралипэ́н тыро́ пэ ве́ко анги́л Ма́ндэ, и престоло тыро́ тэрдёла пэ ве́ко.’”

¹⁷ Сарэ́ далэ́ лава́ и саро́ дава́ дыкхибэ́н Нафано пирипхэндя Давидо́скэ.

¹⁸ И гия́ кра́ли Дави́до, и тэрдия́ анги́л Растэ-Дэвлэ́стэ, и пхэндя́: “Кон мэ сом, Раё Дэ́вла, Раё Дэ́вла, и со дасаво кхэр миро, со Ту ман адя́кэ барьякирдян.

¹⁹ И дава́ сыкадыя́ ишчо (инкэ́) на́бут дрэ Тырэ́ якха́, Раё Дэ́вла миро, Раё Дэ́вла; нэ Ту ракирдян ишчо (инкэ́) пал кхэр Тырэ́ дынарискиро дро англыпэ́н. Дава́ исын пир манушы́тко, Раё Дэ́вла миро, Раё Дэ́вла!

²⁰ Со буты́р могинэ́ла тэ пхэнэ́л Ту́кэ Дави́до? Ту джинэ́са писхари́с Тырэ́с, Раё Дэ́вла миро, Раё Дэ́вла!

²¹ Ваш лав Тыро́ и пир ило́ Тыро́ Ту кэрэ́са дава́, сыкави саро́ дава́ Тырэ́ писхари́скэ.

²² Пир саро́ Ту сан баро́, Раё Дэ́вла миро, Раё Дэ́вла! Палдава́ со нанэ Нико́н дасаво-паць, сыр Ту сан, и нанэ Дэвлэ́с, апри́ч Ту́тэ, пир саро́, со амэ шундя́м пэ́скирэ канэнца.

²³ И кон исын равно Дырэ манушэ́нгэ Израилёскэ, екхэ манушэ́нгэ пэ пхув, ваш савэ́нгэ явдя́ Рай Дэвэ́л, соб (кай) тэ зракхэ́л лэс Пэ́скэ дрэ манушэ́ндэ, и тэ прославинэл Пэ́скиро лав, и тэ кэрэ́л баро́ и дарано анги́л Тырэ́ манушэ́ндэ, савэ́н Ту лыян Пэ́скэ Египтянэндыр, традыян криг манушэ́н и лэ́нгирэ дэвлорэ́?

²⁴ И Ту зорьякирдян пал Пэ́стэ Тырэ́ Израилёскирэ манушэ́н, сыр Пэ́скирэ манушэ́н, пэ ве́ко, и Ту, Раё Дэ́вла, яця́н лэ́скирэ Дэвлэ́са.

²⁵ И какана́, Ту, Раё Дэ́вла, сполнин пэ ве́ки лав, саво́ ракирдян Ту пал Тырэ́ писхаристэ, и пал лэ́скиро кхэр, и кэр дова́, со Ту ракирдян.

²⁶ И мэк тэ славинэлпэ лав Тыро́ дрэ ве́ки, соб (кай) тэ ракирэ́н: “Рай Дэвэ́л, болыбна́скирэ-янголэ́нгиро – Дэвэ́л пэ Израилё.” И кхэр писхарискиро, Тырэ́ Давидо́скиро мэк тэ явэ́л зорало́ анги́л Ту́тэ.

²⁷ Адя́кэ сыр Ту, Раё Дэ́вла, болыбна́скирэ-янголэ́нгиро, Дэвэ́л Израилёскиро, отчхакирдян писхари́скэ Тырэ́скэ, ракири́: ‘Кэра́ва ту́кэ кхэр, тэды писха́ри тыро́ отдыя́ пэ́скиро ило́, соб (кай) тэ мангавпэ Ту́кэ дасавэ́ патерьяса (молитваса).

²⁸ И адя́кэ, Раё Дэ́вла миро, Раё Дэ́вла! Ту сан Дэвэ́л, и лава́ Тырэ́ исын на хоханэ́, и Ту дыя́н Тырэ́ писхари́скэ дасаво лачхипэ́н!

²⁹ И какана́ лэпэ и бахтякир Тырэ́-писхарискиро кхэр, соб (кай) ёв тэ явэ́л ве́чно анги́л Ту́тэ; пал-дова́ со Ту, Раё Дэ́вла миро, Раё Дэ́вла, пхэндя́н дава́, и бахтякирибнаса Тырэса ячэ́ла Тырэ́ писхарискиро кхэр бахтякирдо́ дро ве́ко.”