2 Kralip 4 - Библия - Пэ Балтитко Романи чиб (Романэс) 2019

¹ И шундя́ Иевосфеё, Саулоскиро чхаво́, со мыя́ Авени́ро дро Хевро́но, и обмэкнэпэ лэ́скирэ васта́, и саро́ Израилё страхадыя.

² Иевосфеёстэ, Сауло́скирэ чхавэ́стэ, сыс дуй халадэ́нгирэ барыдыра́; лав екхэскиро – Баана, и лав явирэскиро – Рихаво, Беерофяниноскирэ-Ремоноскирэ чхавэ́, Вениамино́скирэ родо́стыр, пал-дова́ со и Беерофо отлыджаласпэ кэ Вениамино.

³ И нашнэ́ Беерофяни дрэ Гифаима, и ячнэ́пэ одо́й манушэ́нца явирэ рига́тыр кэ дава́ дывэ́с.

⁴ Ионафаностэ, Сауло́скирэ чхавэ́стэ, сыс лангало чхаво́. Пандж бэрш сыс лэ́скэ, ке́ли явдя́ зан (звесь) пал Саулостэ и Ионафаностэ Изреелёстыр, и нянька лэ́скири, лыи лэс, настя́. И ке́ли ёй сы́гэс праста́ндыя, тэды ёв пыя́ и кэрдя́пэ лангалэса. Лав лэ́скиро сыс Мемфивосфеё.

⁵ И гинэ́ Беерофяниноскирэ-Ремоноскирэ чхавэ́, Рихаво и Баана, и явнэ́ дро дывэсэскиро баро́ хачкирибэ́н кэ Евосфеёскиро кхэр; а ёв сыс суто́ дрэ паш дывэ́с.

⁶ Рихаво и Баана, лэ́скиро пшал, загинэ́ андрэ́ дро кхэр, сы́рбы ваш дова́, соб (кай) тэ лэн парно́ гив; и чхиндлэ́ лэс дро пэр, и нашнэ́.

⁷ Ке́ли ёнэ загинэ́ дро кхэр, Иевосфеё сыс пашто́ пэ пэ́скиро чхуибэ́н, дрэ соибнытко пэ́скири шту́ба; и ёнэ замардэ́ лэс, и мулякирдэ́ лэс, и отчхингирдэ лэ́скиро шэро́, и лынэ́ лэ́скиро шэро́ пэ́са, и гинэ́ чхучэ́ дромэ́са сари́ рат;

⁸ и яндлэ́ шэро́ Иевосфеёскиро кэ Дави́до дро Хевро́но, и пхэндэ крали́скэ: “Ѓа́да, исын Иевосфеёскиро шэро́, Сауло́скирэ чхавэ́скиро, тырэ́ вэргоскиро, саво́ родыя тыро́ ди; какана́ Рай Дэвэ́л отдыя́ пал мирэ́ хуластэ, крали́стэ, Сауло́скэ и лэ́скирэ родо́скэ.”

⁹ И отпхэндя́ Дави́до Рихавоскэ и Баанаскэ, лэ́скирэ пшалэ́скэ, Беерофяниноскирэ-Ремоноскирэ чхавэ́нгэ, и пхэндя́ лэ́нгэ: “Тэ явэ́л джидо́ Рай Дэвэ́л, саво́ зракхця́ миро ди кажнонэ́ бидатыр!

¹⁰ Ко́ли долэс, кон яндя́ ма́нгэ зан (звесь), пхэни́: “Ѓа́да, мыя́ Са́уло”, и кон гиндя пэс, со ёв яндя́ лачхи́ звесь, то мэ ухтылдём и замардём лэс дро Секелаго, заме́ст дова́, соб (кай) тэ дав лэ́скэ мазу́ри (награда),

¹¹ тэды какана́, кеды налачхэ́ мануша́ замардэ́ манушэ́с, саво́ исын набанго дро лэ́скиро кхэр пэ лэ́скиро чхуибэ́н, нау́што мэ на зродава лэ́скиро рат тумарэ́ вастэ́стыр и на традава тумэн пхувья́тыр?”

¹² И припхэндя́ Дави́до дынарье́нгэ, и замардэ́ лэн, и отчхингирдэ лэ́нгэ васта́ и ґэра́, и убладэ лэн пашы́л вэндэри (прудо) дро Хевро́но. А шэро́ Евосфеёскиро лынэ́ и гарадэ́ дрэ копли́ца Авенироскири, дро Хевро́но.