2 Kralip 3 - Библия - Пэ Балтитко Романи чиб (Романэс) 2019

¹ И сыс ґара́ (длу́гэс) кошыбэ́н машки́р Саулоскиро кхэр и Давидо́скиро кхэр. Дави́до уса́ буты́р и буты́р ячэлас зорало́, а Саулоскиро кхэр буты́р и буты́р бизорьякирэласпэ.

² И бия́ндынэ Давидо́стэ чхавэ́ дро Хевро́но. Англатуно́ лэ́скиро чхаво́ сыс Амноно Ахиноаматыр Изреельтянкатыр,

³ а яви́р лэ́скиро чхаво́ – Далуиа Авигеятыр, сави́ сыс англэды́р Навалоскири ромны́, Кармилитянка; три́то – Авесало́мо, Маахакиро чхаво́, Фалмаёскирэ-чхакиро, Гесуроскирэ-крали́скиро;

⁴ шта́рто – Адония, Агифаскиро чхаво́; па́нджто – Сафатия, Авиталакиро чхаво́;

⁵ шо́вто – Ефераамо Эглатыр, Давидо́скирэ-ромнятыр. Ёнэ бия́ндынэ Давидо́стэ дро Хевро́но.

⁶ Ке́ли сыс кошыбэ́н машки́р кхэр Саулоскиро и кхэр Давидо́скиро, тэды Авени́ро подрикирэлас Саулоскиро кхэр.

⁷ Саулостэ сыс наложница (бисовлахири джувлы́), пир лав Рицпа, Айёскири чхай. И пхэндя́ Евосфеё (Иевосфеё) Авенироскэ: “Со́скэ ту загиян кэ мирэ́-дадэ́скири наложница?”

⁸ Авени́ро древа́н росхолясыя пэ лава́ Евосфеёскирэ и пхэндя́: “Нау́што мэ сом – джуклэскиро шэро́? Мэ проти Юдастэ кэрдём какана́ лачхипэ́н Сауло́скирэ кхэрэ́скэ, тырэ́ дадэ́скэ, лэ́скирэ пшалэ́нгэ и лэ́скирэ малэнгэ (другэнгэ), и мэ на отдыём тут дрэ Давидо́скирэ васта́, а ту какана́ родэса пэ ма́ндэ грэ́хо пирда́л джувля́тэ.

⁹ Дова́ и дова́ мэк тэ кэрэ́л Дэвэ́л Авенироскэ, и ишчо (инкэ́) буты́р кэрэ́ла лэ́скэ! Сыр совлахадя́ Рай Дэвэ́л Давидо́скэ, адя́кэ и мэ кэра́ва лэ́скэ:

¹⁰ Мэ отлава кралипэ́н Сауло́скирэ кхэрэ́стыр, и чхува́ва престоло Давидо́скиро пэ Израилё и пэ Юдастэ, Даностыр кэ Вирсавиё.”

¹¹ И на могиндя́ Евосфеё тэ отпхэнэл Авенироскэ, пал-дова́ со ёв дарандыя лэ́стыр.

¹² И бичхадя́ Авени́ро пэ́стыр манушэ́н кэ Дави́до, тэ пхэнэ́н: “Конэ́скири исын дая́ пхув” и ишчо (инкэ́) тэ пхэнэ́н: “Кэр доракирибэ́н ма́нца, и миро васт явэ́ла ту́са, соб (кай) тэ рискирэс кэ ту сарэ́ Израилёскирэ манушэ́н.”

¹³ И пхэндя́ Дави́до: “Мишто́, мэ кэра́ва доракирибэ́н ту́са, фэ́ни (то́ка) манга́ва мэ тут пал екх, ту на дыкхэ́са муй миро, ко́ли на янэса пэ́са Мелхола, Сауло́скирэ чха, ке́ли ту явэ́са тэ дыкхэспэ ма́нца.”

¹⁴ И отбичхадя Дави́до пэ́скирэ манушэ́н кэ Евосфеё, Саулоскиро чхаво́ тэ пхэнэ́н: “Отдэ́ мирья ромня́ Мелхола, савья́ мэ дорэсцём пал шэл Филистимлянэнгирэ обчхиныбэна пэ яго́ро (краё).”

¹⁵ И бичхадя́ Евосфеё, и лыя́ ла ромэстыр, Фалтиёстыр, Лаишоскирэ чхавэстыр.

¹⁶ Гия́ ла́са и ла́киро ром, и ровибнаса пролыджия ла кэ Бахурима; нэ Авени́ро пхэндя́ лэ́скэ: “Рисёв палэ.” И ёв рисия́.

¹⁷ И рисия́ лавэ́са Авени́ро кэ Израилёскирэ пхурыдыра́, ракири́: “И тася́, и три́то дывэ́с тумэ́ камлэ́, соб (кай) Дави́до тэ явэ́л крали́са пэ тумэ́ндэ,

¹⁸ какана́ кэрэ́н дава́, пал-дова́ со Рай Дэвэ́л пхэндя́ Давидо́скэ: “Вастэ́са Мирэ́ писхарискирэса Давидоскирэса Мэ зракха́ва Мирэ́ манушэ́н, Израилё, вастэ́стыр Филистимлянэнгирэстыр и сарэ́ лэ́скирэ вэргэ́нгирэ вастэ́стыр.”

¹⁹ Дова́-паць ракирдя́ Авени́ро и Вениамитянэнгэ. И гия́ Авени́ро дро Хевро́но, соб (кай) тэ пирипхэнэл Давидо́скэ саро́, со камлэ́ Израилё и Вениаминоскиро кхэр.

²⁰ И явдя́ Авени́ро кэ Дави́до дрэ Хевро́но и лэ́са биш мануша́, и кэрдя́ Дави́до баро́ сками́нд ваш Авенироскэ и манушэ́нгэ, савэ́ сыс лэ́са.

²¹ И пхэндя́ Авени́ро Давидо́скэ: “Мэ уштава, и джа́ва, и мэ скэда́ва кэ хула́й, миро кра́лё, сарэ́ Израилёскирэ манушэ́н, и ёнэ заджа́на дро завето доракирибэ́н ту́са, и ту явэ́са крали́са пэ сарэ́ндэ, сыр камэ́ла тыро́ ди.” И отмэкця́ Дави́до Авенирос, и ёв гия́ раманёса (миро́са).

²² И ґа́да, Давидо́скирэ дына́рья Иоавоса явнэ́ дромэ́стыр, и яндлэ́ пэ́са бут дорэсыбэ́н (добыча); нэ Авенирос на сыс Давидоса дро Хевро́но, пал-дова́ со Дави́до отмэкця́ лэс, и ёв гия́ раманёса.

²³ Ке́ли Иоа́во и сарэ́ халадэ́, савэ́ псирдэ́ лэ́са, явнэ́, тэды Иоавоскэ роспхэндлэ́: “Сыс Авени́ро, Нироскиро чхаво́, кэ кра́ли, и одова́ отмэкця́ лэс, и ёв гия́ раманёса (миро́са).”

²⁴ И явдя́ Иоа́во кэ кра́ли, и пхэндя́: “Со ту кэрдя́н? Ѓа́да, сыс кэ ту Авени́ро; со́скэ ту отмэкцян лэс, и ёв гия́ криг?

²⁵ Ту джинэ́са Авенирос, Нировоскирэс чхавэ́с: ёв сыс яви тэ хохавэ́л тут, тэ доджинэлпэ выгиибэн тыро́ и загиибэ́н тыро́, и тэ розґалёл саро́, со ту кэрэ́са.”

²⁶ И выгия́ Иоа́во Давидостыр, и бичхадя́ пэ́скирэ манушэ́н пала́л пал Авениростэ; и рискирдэ́ ёнэ лэс Сироскирэ ґанынгатыр, би Давидо́скирэ джиныбнаскиро.

²⁷ Ке́ли Авени́ро рисия́ дрэ Хевро́но, тэды Иоа́во отлыджия лэс андрэ́ по́рта (вра́ты), сы́рбы ваш дова́, соб (кай) тэ ракирэ́л лэ́са екх пэ екх, и ёв одо́й чхиндя́ лэс дро пэр. И мыя́ Авени́ро пал Асаилоскиро рат, Иоавоскирэ пшалэскиро.

²⁸ И шундя́ коригэды́р (позжэ) Дави́до пал дава́, и пхэндя́: “Мэ на сом банго́ и кралипэ́н миро дро ве́ко анги́л Растэ-Дэвлэ́стэ пал Авенироскиро рат, Нироскирэ чхавэ́скиро;

²⁹ мэк тэ пэрэ́л ёв пэ Иоавоскиро шэро́ и пэ саро́ лэ́скирэ-дадэ́скиро кхэр; мэк никели тэ на ячэ́лпэ Иоавоскиро кхэр би одолэскиро, саво́, ци саво́ обрикирэлапэ пэ дэсто́, ці, саво́ пэрэ́ла куртала́тыр, ци савэ́стэ нанэ маро́.

³⁰ Иоа́во и лэ́скиро пшал Авеса замардэ́ Авенирос, пал-дова́ со ёв замардя́ лэ́нгирэ пшалэ́с Асаилос дро марибэ́н пашы́л Гавао́но.

³¹ И пхэндя́ Дави́до Иоавоскэ и сарэ́ манушэ́нгэ, савэ́ сыс лэ́са: “Роскушэн тумарэ́ и́ди, и урьенпэ дрэ калыпэ́н, и ровэ́н пал Авениростэ.” И кра́ли Дави́до гия́ пал лэ́скиро мулыкано (гробо).

³² Ке́ли гарадэ́ Авенирос дрэ Хевро́но, то тэды кра́ли зоралэ́с рондя́ пал Авенироскиро мулыкано, рондлэ́ и сарэ́ мануша́.

³³ И оброндя кра́ли Авенирос, ракири́: “Ци дылынэ́ мэрибнаса тэ мэрэ́л Авенироскэ?”

³⁴ Васта́ тырэ́ на сыс спхандлэ, и ґэра́ тырэ́ на сыс дрэ састыра́, и ту мыян, сыр мэрэ́на розмарьибнарьендыр.” И сарэ́ мануша́ лынэ́ буты́р тэ ровэ́н пал лэ́стэ.

³⁵ И явнэ́ сарэ́ мануша́ тэ сыкавэ́н тэ дэн Давидо́скэ маро́, ке́ли сыс дывэ́с; нэ Дави́до совлахадя́, ракири́: “Дова́ и дова́ мэк тэ кэрэ́л ма́нца Рай Дэвэ́л, и ишчо (инкэ́) буты́р кэрэ́ла, ко́ли мэ кэ кхамэскиро загиибэ́н хава маро́ ци вари-со.”

³⁶ И сарэ́ мануша́ уджиндлэ́ дава́, и пир ило́ сыс лэ́нгэ дава́, сыр и саро́, со кэрдя́ кра́ли, яця́ пир ило́ сарэ́ манушэ́нгэ.

³⁷ И уджиндлэ́ сарэ́ мануша́ и саро́ Израилё дро дова́ дывэ́с, со на крали́стыр выгия́ Авенироскиро мэрибэ́н, Нироскирэ чхавэ́скиро.

³⁸ И пхэндя́ кра́ли пэ́скирэ дынарье́нгэ: “Ци джинэ́на тумэ́, со дро дава́ дывэ́с дрэ Израилё мыя́ шэрало́ и баро́ мурш?”

³⁹ Мэ какана́ ишчо (инкэ́) бизорья́киро, мэк мэ(хоць) и сом помакхно пэ кралипэ́н, а адалэ́ мануша́, Саруяскирэ чхавэ́, зоралэды́р ма́ндыр; мэк тэ дэл Рай Дэвэ́л манушэ́скэ, саво́ кэрэ́ла фуипэ́н пир лэ́скиро фуипэ́н!”