2 Kralip 23 - Библия - Пэ Балтитко Романи чиб (Романэс) 2019

¹ Ѓа́да, исын палатунэ́ (последня) лава́ Давидо́скирэ, Есеёскирэ-чхавэ́скирэ, пхэныбэ́н муршэскиро, саво́ сыс чхудо вучэ́с, помакхибнаскирэс Дэвлэскирэс Яковоскирэс и гудлэ́-багаибнаскирэс Израилёстыр:

² Ра́скирэ-Дэвлэ́скиро ду́хо ракирэ́ла дрэ ма́ндэ, и лав Лэ́скиро сыс пэ чиб ма́ндэ.

³ Пхэндя Дэвэ́л Израилёскиро, и ракирдя́ пал ма́ндэ бэ́рга Израилёскири: “Яв хула́са пэ манушэ́ндэ, яв чачуно́, хулаин дара́са (дарьяса) Дэвлэскирьяса.

⁴ И сыр пэ зло́ко (пэ ра́нко), ке́ли дывесёла, сыр джа́ла упрэ́ кхам пэ биоблокэнгиро болыбэ́н, саво́ зяинэла пало́ (после) брышы́нд, сыр барьёла чхар пхувья́тыр,

⁵ ци на адя́кэ исын кхэр миро Дэвлэ́стэ? Пал-дова́ со доракирибэ́н ве́чно чхудя́ Ёв ма́нца, твардо и напарудо. Ци на адя́кэ джа́ла Лэ́стыр саро́ зракхибэ́н миро и саро́ лачхипэ́н миро?

⁶ А налачхэ́ мануша́ явэ́на, сыр вычхурдыно хру́сто сувьенца, саво́ на лэ́на вастэ́са;

⁷ нэ кон чилавэ́ла лэс, одова́ лэ́ла састы́р, ци чхурдыпнытконэ-бустякирэ дэстэса, и яга́са хачкирэна лэс пэ штэ́то.

⁸ Ѓа́да, исын лав муршканэнгирэ Давидо́стэ: Исбосефо Ахаманитянино, шэрало́ тринэндыр; ёв ґаздыя́ пэ́скиро чхурдыпнытко буст пэ охтошэла манушэ́ндэ, и замардя́ лэн пал екх мо́ло.

⁹ Пал лэ́стэ Елиза́ро, чхаво́ Додоскиро, Ахохоскирэ-чхавэ́скиро, тринэ́ муршканэндыр, савэ́ сыс Давидоса, ке́ли ёнэ кошыбнаса выкхардэ Филистимлянэн, савэ́ скэдынэ́пэ пэ марибэ́н.

¹⁰ Израильтя́ни выгинэ́ проти лэ́ндэ, и ёв тэрдия́, и мардя Филистимлянэн кэ дова́, со васт лэ́скиро кхиныя и прилипниндя кэ курта́ла. И дыя́ Рай Дэвэ́л дро дова́ дывэ́с бари збердыма (победа), и мануша́ гинэ́ пал лэ́стэ ваш дова́ екх, соб (кай) тэ обкэдэн мулэн.

¹¹ Пал лэ́стэ Шама, чхаво́ Агеёскиро, Гараритянино. Ке́ли Филистимля́ни скэдынэ́пэ дрэ Фирия, кай сыс фэ́лда, со сыс почхуды дрэ пхув чэчэвицаса, и мануша́ праста́ндынэ Филистимлянэндыр:

¹² тэды ёв тэрдия́ машки́р фэ́лда, и зракхця́ ла, и мулякирдя́ Филистимлянэн. И дыя́ тэды Рай Дэвэ́л бари збердыма (пиризорьякирибэн).

¹³ Трин адалэ́ муршканэ́ трияндэндыр шэралэндыр гинэ́ и загинэ́ дро часо укэдыибнытко кэ Дави́до дрэ ґеба́р (пешчэра) Одоламо, ке́ли бут Филистимля́ни сыс тэрдэ́ пэ Рефаимоскиро до́ло.

¹⁴ Дави́до сыс тэды пэ штэ́то зоралэ́ тынэ́нца, а отрядо Филистимлянэнгиро – дро Вифлее́мо.

¹⁵ И закамдя́ Дави́до тэ пьел, и пхэндя́: “Кон панякирэла ман пане́са Вифлеемоскирэ ґанынгатыр, со сыс пашы́л по́рта?”

¹⁶ Тэды трин адалэ́ муршканэ́ мануша́ промардэпэ пирда́л Филистимлянэнгиро ста́но (лод), и пхэрдэ́ пани́ Вифлеемоскирэ ґанынгатыр, со сыс пашы́л по́рта, и лынэ́ и яндлэ́ Давидо́скэ. Нэ ёв на закамдя́ тэ пьел лэс и вычхудя́ лэс дрэ сла́ва Ра́скэ-Дэвлэ́скэ,

¹⁷ и пхэндя́: “Зра́кх ман, Дэ́вла, соб (кай) мэ тэ кэра́в дава́! Ци дава́ исын на рат адалэ́ манушэ́нгиро, савэ́ псирдэ́ дара́са (дарьяса) пал пэ́скиро джиибэ́н?’ И на закамдя́ лэс тэ пьел. Ѓа́да, со кэрдэ́ далэ́ трин муршарья!

¹⁸ И Авеса, Иоавоскиро пшал, Саруяскиро чхаво́, сыс тринэндыр шэралэса; ёв замардя́ пэ́скирэ чхурдыибнытконэ бустяса триншэла́ манушэ́н и сыс дрэ сла́ва одолэ́ тринэндэ.

¹⁹ Тринэндыр ёв сыс патывалэдыр и сыс барыдырэ́са, нэ одолэ́ тринэнца на ровниндяпэ.

²⁰ О Ванея, Иодаёскиро чхаво́, муршари, баро́ пир рэ́нды, Кавцэилостыр; ёв мулякирдя́ дуе́н Ариилоскирэ Моавитсконэ чхавэ́н; ёв гия́ и замардя́ шчэрэс (левос) дро рово (хохо́й) дро ивитко часо;

²¹ и ёв замардя́ екхэ Египтянинос, шэралэ́ манушэ́с; дро Египтяниноскиро васт сыс чхурдыибнытко буст, а ёв гия́ кэ ёв каштэса, и отлыя чхурдыпнытко буст Египтяниноскирэ вастэ́стыр, и домардя́ лэс лэ́скирэ бустяса:

²² ґа́да, со кэрдя́ Ванея, Иодаёскиро чхаво́, и ёв сыс дрэ сла́ва тринэ́ муршканэ́ манушэ́ндэ;

²³ ёв сыс славутнэдыр трияндэндыр, нэ одолэнца тринэнца на ровниндяпэ. И чхудя́ лэс Дави́до пашатунэса фандариса (сполнитилёса) пэ пэ́скирэ припхэныбэна́.

²⁴ Асаило, Иоавоскиро пшал – сыс машки́р адалэ́ трия́нда манушэ́ндэ; Елхано, Додоскиро чхаво́, Вифлеемостыр,

²⁵ Шама Хародитянино, Елико Хародитянино,

²⁶ Херецо Палтитянино, Иро, Икешаскиро чхаво́, Фекоитянино,

²⁷ Евиезеро Анафофянино, Мебунаё Хушатянино,

²⁸ Цалмоно Ахохитянино, Магараё Нетофатитянино,

²⁹ Хелево, Бааноскиро чхаво́, Нетофатитянино, Итаё, Рибаёскиро чхаво́ Гиватыр Вениамино́скирэ чхавэ́ндыр,

³⁰ Ванея Пирафонянино, Идаё Нахле-Гаашостыр,

³¹ Ави-Албоно Арбатитянино, Азмавето Бархамитянино,

³² Елияхба Шаалбонянино; Яшэноскирэ чхавэ́ндыр, Ионафа́но,

³³ Шама Гараритянино, Ахиамо, Шарароскиро чхаво́, Араритянино,

³⁴ Елифелето, Ахасбаёскиро чхаво́, Магахатоскирэ-чхавэ́скирэ, Елиамо, Ахитофелёскиро чхаво́, Гилонянино,

³⁵ Хецраё Кармилитянино, Паараё Арбитянино,

³⁶ Игало, Нафаноскиро чхаво́, Цобатыр, Бани Гадитянино,

³⁷ Цэлеко Амонитянино, Нахараё Беротянино, ману́ш, саво́ лыджалас марды́тко (оружыё) Иоавоскиро, Саруяскирэ чхавэскири,

³⁸ Иро Итритянино, Гаребо Итритянино,

³⁹ Уриё Хетеянино. Сарэ́ сыс триндэша (трия́нда) эфта́.