2 Kralip 19 - Библия - Пэ Балтитко Романи чиб (Романэс) 2019

¹ И пхэндлэ́ Иоавоскэ: “Ѓа́да, кра́ли ровэла и тугинэла годла́са (голосинэла) пал Авесаломостэ.

² И обрисия збердыма (победа) долэ́ дывэсэскири дро ровибэн ваш сарэ́ манушэ́нгэ; пал-дова́ со мануша́ шундлэ́ дрэ дова́ дывэ́с и ракирдэ́, сыр кра́ли пиридживэлас пал пэскирэстэ чхавэ́стэ.

³ И выджа́нас тэды мануша́ дрэ фо́ро чораханэ́с, сыр подчорэнапэ мануша́, савэ́ ладжана, савэ́ дрэ марибнаскиро часо рисинэ́ дро нашыбэн.

⁴ А кра́ли зачхакирдя пэ́скиро муй, и зоралэ́с рондя́: “Чхаво́ миро, Авесаломе! Авесаломе, чхаво́ миро, чхаво́ миро!”

⁵ И явдя́ Иоа́во кэ кра́ли дро кхэр, и пхэндя́: “Ту дрэ ладж яндян ададывэ́с сарэ́н дынарье́н тырэ́н, савэ́ зракхнэ́ какана́ тыро́ джиибэ́н и тырэ́ чхавэ́нгиро и чхаенгиро джиибэ́н, и ромненгиро джиибэ́н и тырэ́ наложницэнгиро джиибэ́н;

⁶ ту́кэ исын дро́га одолэ́, конэ́скэ сан дро́го ту и ту́кэ исын на дро́га одолэ́, конэ́скэ сан дро́го ту; пал-дова́ со ту сыкадян ададывэ́с, со нисо́ ваш ту́кэ и халадэ́нгирэ шэралэ́ и дына́рья, мэ джиндём, со, ко́ли Авесало́мо тэ ячэ́лпэ джидо́, а амэ сарэ́ мыям, тэды ту́кэ явэ́ла бы мишто́;

⁷ и адя́кэ ушты́, выджа и ра́кир кэ ило́ тырэ́ писхарьенгиро, пал-дова́ со мэ совлахава Ра́са-Дэвлэ́са, со, ко́ли ту на выджаса, то дрэ дая́ рат на ячэ́лапэ ту́тэ ни екхэ манушэ́с; и дава́ явэ́ла ваш ту́кэ фуеды́р сарэ́ бидэндыр, савэ́ сыс пэ ту́тэ тырэ́ тэрнэ́ бэршэ́ндыр кэ дава́ дывэ́с.”

⁸ И уштыя́ кра́ли и бэстя́ пашы́л по́рта; а сарэ́ манушэ́нгэ пхэндлэ́, со кра́ли сыс бэшто́ пашы́л по́рта. И явнэ́ сарэ́ мануша́ анги́л крали́скиро муй; Израильтя́ни рознашнэпэ пир пэ́скирэ ша́тры.

⁹ И сарэ́ мануша́ дрэ сарэ́ ро́ды (стречы) Израилёскирэ кошнэпэ и ракирдэ́: “Кра́ли зракхця́ амэн амарэ́ вэргэ́нгирэ вастэ́ндыр, и волякирдя (вызволиндя) амэн Филистимлянэнгирэ вастэ́ндыр, а какана́ кокоро́ настя́ далэ́ пхувья́тыр, Авесаломостыр.

¹⁰ Нэ Авесало́мо, савэ́с амэ помакхцям дрэ крали́стэ пэ амэ́ндэ, мыя́ пэ марибэ́н; палсо́ какана́ тумэ́ тырдэна тэ рискирэ́н крали́с?”

¹¹ И кра́ли Дави́до бичхадя́ тэ пхэнэ́н рашангэ Садокоскэ и Авиафароскэ: “Пхэнэ́н Юда́скирэ пхурыдырэнгэ: ‘Со́скэ камэ́на тумэ́ тэ явэ́н палатунэнца, соб (кай) тэ рискирэс крали́с дро лэ́скиро кхэр, тэды сыр лава́ сарэ́ Израилёскирэ догинэ́ кэ кра́ли дро лэ́скиро кхэр?

¹² Тумэ́ сан мирэ́ пша́ла, кокалы́ мирэ́ и мас миро; со́скэ камэ́на тумэ́ тэ явэ́н палатунэнца дро рискирибэн крали́скиро дро лэ́скиро кхэр?

¹³ И Амесаскэ пхэнэ́н: “Ци на сан ту кокало миро и мас миро? Мэк дова́ и дова́ тэ кэрэ́л ма́нца Дэвэ́л, и ишчо (инкэ́) буты́р кэрэ́ла, ко́ли ту на явэ́са халадэ́нгирэ барыдырэ́са, пашы́л ма́ндэ, пэ Иоавоскиро штэ́то, пэ саро́ джиибэ́н!”

¹⁴ И бандякирдя ёв ило́ сарэ́ Юдэя́кирэ манушэ́н, сыр екхэ-манушэ́скиро; и бичхадэ́ ёнэ кэ кра́ли тэ пхэнэ́н: “Рисёв ту и сарэ́ тырэ́ дына́рья.”

¹⁵ И рисия́ кра́ли, и явдя́ кэ Иорда́но, а Юдэя́кирэ мануша́ явнэ́ дро Галга́ло, соб (кай) тэ пирилэн крали́с и тэ пирилыджан крали́с пирда́л Иорда́но.

¹⁶ И гия́ сыгэс Семеё, Гераскиро чхаво́, Вениамитянино Бахуриматыр, и гия́ Юдэякирэнца гил (пэ стреч) крали́скэ Давидо́скэ,

¹⁷ и тысёнцо манушэ́н Вениамитянэндыр сыс лэ́са, и Сива, Сауло́скирэ-кхэрэ́скиро дына́ри, дэшупанджэ пэ́скирэ чхавэ́нца и бишэ́ пэ́скирэ писхарье́нца; и пиригинэ́ ёнэ Иорда́но анги́л крали́скиро муй.

¹⁸ Ке́ли пириправиндлэ судно (па́рма), соб (кай) тэ пирилыджас крали́скиро кхэр и тэ дынарина́с лэ́скэ, тэды Семеё, Гераскиро чхаво́, пыя́ анги́л крали́стэ, сыр фэ́ни (то́ка) ёв пиригия Иорда́но,

¹⁹ и пхэндя́ крали́скэ: “На чхув ма́нгэ, хула́ё миро, дро грэ́хо, со мэ кэрдём, и на пририпир дова́, саво́ кэрдя́ грэ́хо писха́ри тыро́ дрэ дова́ дывэ́с, ке́ли хула́й миро, кра́ли, выгия́ Ерусалимо́стыр, и на рикир доя́ холы́, кра́лё, пэ ило́ пэ́скиро;

²⁰ пал-дава́ со джинэ́ла тыро́ писха́ри, со кэрдя́ грэ́хо, и ґа́да, какана́ мэ явдём англатуно́ (пэ́рво) сарэ́ Иосифо́скирэ кхэрэ́стыр, соб (кай) тэ выджав гил (пэ стреч) хула́скэ мирэ́скэ крали́скэ.”

²¹ И отпхэндя́ Авеса, Саруяскиро чхаво́, и пхэндя́: “Нау́што Семеё на мэрэ́ла пал дава́, со ёв костя Ра́скирэ-Дэвлэ́скирэ помакхибнаскирэс?

²² И пхэндя́ Дави́до: “Со ма́нгэ и тумэ́нгэ, Саруяскирэ чхавэ́, со тумэ́ какана́ кэрэ́напэ вэргэнца (наветникэнца). Ци какана́ тэ мулякирэс вари-конэ́с дро Израилё? Ци на дыкха́ва мэ, со какана́ мэ – кра́ли пэ Израилё?”

²³ И пхэндя́ кра́ли Семеёскэ: “Ту на мэрэ́са.” И совлахадя́ лэ́скэ кра́ли.

²⁴ И Мефивосфеё, Ионавоскиро чхаво́, Сауло́скирэ-чхавэ́скиро, выгия́ гил (пэ стрэч) крали́скэ. Ёв на мордя пэ́скирэ ґэра́, на обчхиндя чхора пэ́скирэ (брода), и на мордя и́ди пэ́скирэ долэ́ дывэсэ́стыр, сыр выгия́ кра́ли кэ дывэ́с, ке́ли ёв рисия́ раманёса (миро́са).

²⁵ Ке́ли ёв выгия́ Ерусалимо́стыр гил (пэ стреч) крали́скэ, кра́ли пхэндя́ лэ́скэ: “Со́скэ ту Мефивосфеё, на ги́ян ма́нца?”

²⁶ Одова́ отпхэндя́: “Хула́ё, ми́ро кра́ли! Дына́ри миро хохадя ман; пал-дова́ со мэ, писха́ри тыро́, ракирдём: ‘Мэ да́ва андрэ́ пэ́скэ осло́с и бэшава пэ лэ́стэ, и традава крали́са’; одякэ сыр писха́ри тыро́ исын лангало.

²⁷ А ёв обракирдя тырэ́ писхари́с анги́л хуластэ мирэстэ, крали́стэ. Нэ хула́й миро, кра́ли, сыр Дэвлэ́скиро Янго́ло; кэр, со ту́кэ исын лачхо́;

²⁸ хоць саро́ мирэ́-дадэ́скиро кхэр исын банго́ сыс отдыно́ мэрибна́скэ анги́л хуластэ, мирэ́ крали́стэ, нэ ту чхудя́н тырэ́ писхари́с машки́р одолэ́н манушэ́ндэ тэ хас пал тыро́ сками́нд; саво́ ма́ндэ исын право тэ тангинавпэ ишчо (инкэ́) анги́л крали́стэ?”

²⁹ И пхэндя́ лэ́скэ кра́ли: “Кэ со ту ракирэ́са саро́ дава́? Мэ пхэндём, соб (кай) ту и Сива тэ росчхувэн пэ пир машки́р пэ́стэ фэ́лды.”

³⁰ Нэ Мефивосфеё отпхэндя́ крали́скэ: “Мэк ёв тэ лэл аж саро́, пало́ (после) дова́, сыр хула́й миро, кра́ли, раманёса (миро́са) рисия́ дро пэ́скиро кхэр.”

³¹ И Верзелиё Галаадитянино явдя́ Роглиматыр, и пиригия крали́са Иорда́но, соб (кай) тэ лыджа́л лэс пал Иорда́но.

³² О Верзелиё сыс древа́н пхуро́, бэрша́ охтодэша́. Ёв дэ́лас саро́ крали́скэ, ке́ли одова́ сыс дро Маханаимо, пал-дова́ со сыс ману́ш барвало́.

³³ И пхэндя́ кра́ли Верзелиёскэ: “Яв ма́нца, и мэ ява́ва тэ чаравав тут дро Ерусалимо.”

³⁴ Нэ Верзелиё отпхэндя́ крали́скэ: “Ци длу́гэс (ґара́) ма́нгэ яця́пэ тэ джива́в, соб (кай) тэ джав крали́са дро Ерусалимо?

³⁵ Ма́нгэ какана́ охтодэша́ бэрш; ци роскэдава мэ лачхипэ́н фуипнастыр? Ци джинэ́ла писха́ри тыро́ смако дрэ дова́, со мэ ява́ва тэ хав, и со мэ ява́ва тэ пья́в? И ци ява́ва мэ дро зор тэ шунав зан багаибнаскирэнгири и багаибнаркэнкири? Со́скэ писхари́скэ тырэ́скэ тэ явэ́л дро пхарипэ́н хула́скэ, мирэ́скэ крали́скэ?

³⁶ Ишчо на́бут проджа́ла писха́ри тыро́ крали́са пал Иорда́но; пал со крали́скэ тэ барьякирэл ман дасавэ́ лачхипна́са?

³⁷ Дозволин (дэ во́ля) писхари́скэ тырэ́скэ тэ рисёл, соб (кай) мэ тэ мэрав дро пэ́скиро фо́ро, пашы́л мирэ́-дадэ́скири копли́ца и мирэ́-дакири. Нэ ґа́да, дына́ри тыро́, миро чхаво́, Кимгамо, мэк тэ джал хула́са мирэса, крали́са, и кэр лэ́са, сыр ту́кэ исын лачхо́.”

³⁸ И пхэндя́ кра́ли: “Мэк тэ джал ма́нца Кимгамо, и мэ кэра́ва ваш лэ́скэ, со ту́кэ исын лачхо́; и саро́, со бы ту тэ на закамэс ма́ндыр, мэ кэра́ва ваш ту́кэ.”

³⁹ И пиригинэ́ сарэ́ мануша́ Иорда́но, и кра́ли адя́кэ-паць. И чамудя кра́ли Верзелиёс, и бахтякирдя́ лэс, и ёв рисия́ пэ штэ́то пэ́скиро.

⁴⁰ И гия́ кра́ли дро Галга́ло, гия́ лэ́са и Кимгамо; и сарэ́ Юда́скирэ мануша́ лыджинэ крали́с, и паш Израилескірэ мануша́.

⁴¹ И ґа́да, сарэ́ Израильтя́ни явнэ́ кэ кра́ли и пхэндэ крали́скэ: “Со́скэ пша́ла амарэ́, Юда́скирэ мурша́, мэкнэ́ тут, и лыджинэ крали́с, и лэ́скиро кхэр, и сарэ́н манушэ́н Давидоскирэн лэ́са пирда́л Иорда́но?

⁴² И отпхэндлэ́ сарэ́ Юда́скирэ мурша́ Израильтянэнгэ: пал-дова́ со кра́ли исын сэмэ́нца амэ́нгэ; пирда́л со тумэ́нгэ тэ холясон пэ дава́? Нау́што амэ вари-со хаям крали́стэ, ци долыям (дорэсцям) лэ́стыр почасту́нки (подарки)?”

⁴³ И отпхэндлэ́ Израильтя́ни Юда́скирэ муршэнгэ, и пхэндлэ́: “Амэ сам дэш паша́ крали́стэ, адя́кэ-паць и Давидо́стэ амэ буты́р, сыр тумэ́ сан; палсо́ тумэ́ тэлякирдэ амэн? Ци на амэ́нгэ отлыджаласпэ англатуно́ лав пал дова́, соб (кай) тэ рискирас амарэ́ крали́с? Нэ лав Юда́скирэ муршэнгиро сыс зоралэды́р, сыр лав Израильтянэнгиро.