2 Kralip 17 - Библия - Пэ Балтитко Романи чиб (Романэс) 2019

¹ И пхэндя́ Ахитофелё Авесаломоскэ: “Мэ выкэдава дэшуду́й тысёнцы манушэ́н, и уштава, и джа́ва, дро традыпэн пал Давидо́стэ дрэ дая́ рат;

² и пэрава пэ лэ́стэ, ке́ли ёв явэ́ла кхино и обмэкнэ вастэ́нца, и мэ яна́ва лэс дрэ дар; и сарэ́ мануша́, савэ́ исын лэ́са, рознашэнапэ; и мэ замарава екхэ крали́с

³ и сарэ́н манушэ́н рискира́ва кэ ту; и ке́ли на явэ́ла екхэ́с, конэ́скири ди ту родэса, тэды сарэ́ мануша́ явэ́на дрэ рама́нё (миро).”

⁴ И сыс пир ило́ дава́ лав Авесаломоскэ и сарэ́ Израилёскирэ пхурыдырэнгэ.

⁵ И пхэндя́ Авесало́мо: “Кхарэ́н Хусиёс Архитянинос, шунаса, со ёв пхэнэ́ла.”

⁶ И явдя́ Хусиё кэ Авесало́мо, и пхэндя́ лэ́скэ Авесало́мо, ракири́: “Акэ, со пхэндя́ Ахитофелё, ци пир лэ́скирэ лава́ тэ кэра́с? А ко́ли над, тэды ра́кир ту.”

⁷ И пхэндя́ Хусиё Авесаломоскэ: “На́лачхо годыпэ́н исын дава́ мо́ло, саво́ дыя́ Ахитофелё.”

⁸ И ракирдя́ дурэды́р Хусиё: “Ту джинэ́са пэ́скирэ дадэ́с и лэ́скирэ манушэ́н; ёнэ исын мурша́ бидарипнаскирэ и древа́н пиридживэна, сыр ричыха пэ фэ́лда, савья́тыр отлынэ чхаворэ́н, и дад тыро́ – ману́ш исын марибнаскиро; ёв на тэрдёла тэ ратькирэл манушэ́нца.

⁹ Ѓа́да, какана́ ёв гарадёла дрэ вари-сави́ ґеба́р (пешчэра), ци дро яви́р штэ́то, и ко́ли вари-кон лэ́ндыр пэрэ́ла англэды́р, и шунэ́на, и пхэнэ́на мануша́, ‘Исыс марибэ́н манушэ́нгиро, савэ́ гинэ́ пал Авесаломостэ,’

¹⁰ тэды и кокоро́ мурш бидарипнаскиро, савэ́стэ исын ило́, сыр шчэрэскиро (левоскиро) ило́, пэрэ́ла духо́са; пал-дова́ со сарэ́ Израилёскэ исын джиндло́, сыр муршкано́ исын тыро́ дад и муршканэ́ исын одолэ́ мануша́, савэ́ исын лэ́са.

¹¹ Палдава́ мэ радинава: “Мэк тэ скэдэлпэ кэ ту саро́ Израилё Даностыр кэ Вирса́вия, манушэ́н явэ́ла бут, сыр пра́хо исын пашы́л мо́рё (дэрья́в), и ту кокоро́ джа́са машки́р лэ́ндэ;

¹² и тэды амэ джа́са пэ лэ́стэ, дро саво́ бы штэ́то ёв тэ на явэ́л, и пэраса пэ лэ́стэ, сыр пэрэ́ла пахлын (роса) пэ пхув; и на ячэ́лапэ лэ́стэ ни екхэ манушэ́с сарэ́ндыр, савэ́ явэ́на лэ́са;

¹³ а ко́ли ёв заджа́ла дро вари-саво́ фо́ро, тэды саро́ Израилё янэ́ла кэ дова́ фо́ро шэлэн, и амэ стырдаса лэс дрэ рэка (лэнь), адя́кэ, со на ячэ́лапэ ни екхэ манушэ́с.”

¹⁴ И пхэндя́ Авесало́мо и саро́ Израилё: “Годыпэ́н Хусиёскиро Архитяниноскиро исын фэды́р лавэ́ндыр Ахитофелёскирэстыр.” Адя́кэ Рай Дэвэ́л сэндякирдя тэ розмарэл фэдыршо годыпэ́н Ахитофелёскиро, соб (кай) тэ янэл Ра́скэ-Дэвлэ́скэ би́да пэ Авесаломостэ.”

¹⁵ И пхэндя́ Хусиё Садокоскэ и Авиафароскэ рашангэ: “Адя́кэ и адя́кэ дыя́ годыпэ́н (радиндя) Ахитофелё Авесаломоскэ и Израилёскирэ пхурыдырэнгэ, нэ адя́кэ и адя́кэ дыём годыпэ́н мэ.

¹⁶ И какана́ бичхавэн сыгнэдыр, и пхэнэ́н Давидо́скэ адя́кэ: ‘На ячпэ дрэ дая́ рат пэ лошчы́на пэ чхучи́ пхув, нэ сыгнэдыр пириджа, соб (кай) тэ на хасёл крали́скэ и сарэ́ манушэ́нгэ, савэ́ исын лэ́са.’”

¹⁷ Ионафа́но и Ахимаасо сыс тэрдэ́ пашы́л панескири ґанынгори Рогелё. И гия́ дына́рица, и роспхэндя́ лэ́нгэ, а ёнэ гинэ́ и роспхэндлэ́ крали́скэ Давидо́скэ; пал-дова́ со ёнэ на могиндлэ́ тэ сыкадён дро фо́ро.

¹⁸ И дыкхця́ лэн тэрно́ ману́ш, и пиридыя Авесаломоскэ; нэ ёнэ дуйджинэ́ сы́гэс гинэ́, и явнэ́ дрэ Бахурима, дрэ кхэр екхэ-манушэ́скиро, савэ́стэ пэ грэ́да (дво́ро) сыс ґаны́нг, и змэкнэпэ одори́к.

¹⁹ И джувлы́ лыя́ и росчхудя́ пэ брэ́го (устье) ґанынгакиро цэ́рга, и чхудя́ пэ лэ́стэ кхурмя (крупы) адя́кэ, со на сыс нисо́ бицяло́.

²⁰ И явнэ́ Авесаломоскирэ писха́рья кэ джувлы́ дро кхэр, и пхэндлэ́: “Кай исын Ахимаасо и Ионафа́но?” И пхэндя́ лэ́нгэ джувлы́: “Ёнэ пиригинэ́ рэка (лэнь).” И родынэ ёнэ, и на латхнэ́, и рисинэ́ дро Ерусалимо.

²¹ Ке́ли ёнэ гинэ́ криг, то одолэ́ выгинэ́ ґанынгатыр, гинэ́ и роспхэндлэ́ крали́скэ Давидо́скэ, и пхэндлэ́ Давидо́скэ: “Уштэ́н и сы́гэс пириджан пани́; пал-дова́ со адя́кэ и адя́кэ дыя́ годыпэ́н пал тумэ́ндэ Ахитофелё.”

²² И уштыя́ Дави́до и сарэ́ мануша́, савэ́ сыс лэ́са, и пиригинэ́ Иорда́но; кэ зло́ко на яця́пэ ни екхэ́с манушэ́с, саво́ тэ на пириджал бы Иорда́но.

²³ И дыкхця́ Ахитофелё, со на кэрдя́пэ (сполниндяпэ) лэ́скиро годыпэ́н (совето), и дыя́ андрэ́ осло́с, и скэдыяпэ, и гия́ дрэ пэ́скиро кхэр, дрэ пэ́скиро фо́ро, и кэрдя́ ра́да (годыпэ́н) пэ́скирэ кхэрэ́скэ, и убладыя, и мыя́, и сыс гарадо́ дрэ копли́ца пэ́скирэ дадэ́скири.

²⁴ И явдя́ Дави́до дро Маханаимо, а Авесало́мо пиригия Иорда́но, кокоро́ и саро́ Израилё лэ́са.

²⁵ Авесало́мо чхудя́ Амесаёс, заме́ст Иоавостэ, пэ халадэ́ндэ. Амесаё сыс чхаво́ екхэ манушэ́скиро, пир лав Иеферо Изреелёстыр, саво́ загия́ кэ Авигея, Наасоскири чхай, Саруяскирэ пхэнякэ, Иоавоскирэ дакири.

²⁶ И Израилё Авесаломоса тэрдия́ стано́са (лодэса) пэ Галаадоскири пхув.

²⁷ Ке́ли Дави́до явдя́ дро Манаханаимо, то тэды Сови, Наасоскиро чхаво́, Амонитоскирэ Равватыр, и Махиро, Аминилоскиро чхаво́, Лодаваростыр, и Верзелиё Галаадитянино Роглимостыр,

²⁸ ёнэ яндлэ́ чхуибэна, чарэ́ и глэяна кхорэ́, и парно́ гив (пшэница), и гэрсто (ячменё), и яржо́, и пшэно, и нукло (бобо), и чэчэвица, и пэкнэ зя́рки,

²⁹ и авги́н (мэда), и ксил, и бакрэ́н, и сыро (кирал) гурумнытко, яндлэ́ Давидо́скэ и манушэ́нгэ, савэ́ сыс лэ́са тэ хан; пал-дова́ со ракирэ́на ёнэ, мануша́ сыс бокхалэ́ и кхиныи, и вырикирдэ смэга (жажда) пэ чхучи́ пхув.