2 Kralip 1 - Библия - Пэ Балтитко Романи чиб (Романэс) 2019

¹ Сыр Са́уло мыя́, ке́ли Дави́до рисия́, пало́ (после) дова́, ке́ли ёв домардя́ Амаликитянэн и сыс дро Секелаго дуй дывэса́,

² то ґа́да, пэ три́то дывэ́с явдя́ ману́ш Сауло́скирэ станостыр; и́дя пэ лэ́стэ сыс роскушны и пра́хо сыс пэ лэ́скиро шэро́. Явдя́ ёв кэ Дави́до, и пыя́ пэ пхув и поклониндяпэ лэ́скэ.

³ И пхэндя́ лэ́скэ Дави́до: “Каты́р ту явдя́н?” И пхэндя́ одова́: “Мэ настём Израилёскирэ станостыр (лодэстыр).”

⁴ И пхэндя́ лэ́скэ Дави́до: “Со кэрдя́пэ, роспхэн ма́нгэ?” И одова́ пхэндя́: “Мануша́ нашнэ́ марибнаскирэ штэто́стыр, и бут манушэ́н замардэ́, и Са́уло, и лэ́скиро чхаво́ Ионафа́но мынэ́?”

⁵ И пхэндя́ Дави́до тэрнэ́ манушэ́скэ (тэрнэ́-бэршэнгирэскэ), саво́ роспхэнэлас лэ́скэ: “Сыр ту джинэ́са, со Са́уло и лэ́скиро чхаво́ Ионафа́но мынэ́?”

⁶ И пхэндя́ адава́ тэрно́ ману́ш, саво́ роспхэнэлас лэ́скэ: “Ма́нгэ выгия́ тэ явав пэ Гелвуякири бэ́рга, и ґа́да, Са́уло пыя́ пэ пэ́скири чхурдыпнытко буст (коп΄ё), а марибны́тка вурдына́ и мануша́ уклистэ́ пэ грэ́ндэ дотрадэнас лэс.”

⁷ Тэды ёв рисия́ палэ, то дыкхця́ ман, и кхардя́ ман.

⁸ И мэ пхэндём: “Ѓа́да, мэ сом. Ёв пхэндя́ ма́нгэ: “Кон ту сан?” И мэ пхэндём лэ́скэ: “Мэ – Амаликитянино.”

⁹ Тэды ёв пхэндя́ ма́нгэ: “Яв пашэдыр кэ мэ, и замар ман, пал-дова́ со мэрибнаскири мэнька облыя ман, ди миро уса́ ишчо (инкэ́) дрэ ма́ндэ.”

¹⁰ И мэ подгиём кэ ёв и замардём лэс, пал-дова́ со мэ джиндём, со ёв на явэ́ла джидо́ пало́ (после) пэ́скирэ пэрибэн; и лыём мэ вя́нка, сави́ сыс пэ лэ́скиро шэро́, и браслето (коро), саво́ сыс пэ лэ́скиро васт и яндём лэн кэ миро хула́й адари́к.”

¹¹ Тэды сухтылдя Дави́до пэ́скирэ и́ди, и роскустя лэн, адя́кэ-паць и сарэ́ мануша́ кэрдэ́, савэ́ сыс лэ́са,

¹² и тугиндлэ годла́са (голосиндлэ) и рондлэ́, и постындлэ кэ бэльвэ́ль пал Саулостэ, и пал лэ́скирэ чхавэ́стэ Ионафаностэ, и пал Ра́скирэ-Дэвлэ́скирэ манушэ́ндэ, и пал Израилёскиро кхэр, со ёнэ мынэ́ куртала́тыр.

¹³ И пхэндя́ Дави́до тэрнэ́-баршэнгирэскэ, саво́ роспхэндя́ лэ́скэ: “Каты́р ту сан? И пхэндя́ ёв: “Мэ сом чхаво́ Амаликитяниноскиро, саво́ явдя́ явирэ рига́тыр.”

¹⁴ Тэды Дави́до пхэндя́ лэ́скэ: “Сыр ту на поддарандыян тэ ґаздэс васт, соб (кай) тэ замарэс Ра́скирэ-Дэвлэ́скирэ помакхибнаскирэс?”

¹⁵ И кхардя́ Дави́до екхэ́с тэрнэ́-бэршэнгирэс, и пхэндя́ лэ́скэ: “Яв пашы́л, мулякир лэс.”

¹⁶ И дова́ замардя́ лэс, и ёв мыя́. И пхэндя́ кэ ёв Дави́до: “Рат тыро́ исын пэ шэро́ тыро́, пал-дова́ со тырэ́ ушта́ допхэндлэ пэ ту́тэ, ке́ли ту ракирдян: ‘Мэ замардём Ра́скирэ-Дэвлэ́скирэ помакхибнаскирэс.’”

¹⁷ И оброндя Дави́до Саулос и лэ́скирэ чхавэ́с Ионафанос далэ́ ровибнытконэ гиляса,

¹⁸ и пхэндя́ тэ высыклякирэн Юда́скирэ чхавэ́н лука (роибнытко) гилы́, сыр сыс зачхиндло́ дрэ Лылвари́ Чачунэскири, и пхэндя́:

¹⁹ “Шукарипэ́н тыро́, о Израилё, домардо пэ тырэ́ вучипна! Сыр пынэ́ зоралэ́!

²⁰ На роспхэнэ́н дрэ Гефа, на ракирэ́н зоралэ́с (на объявинэн) пэ вули́цы (га́сы) Аскалоноскирэ, соб (кай) тэ на радынэ́нпэ Филистимлянэнгирэ чхая́, соб (кай) тэ на радынэ́нпэ зоралэ́с наобчхиндлэнгирэ чхая́.

²¹ Бэ́рги Гелвуякирэ! Мэк тэ на зджал ни роса (пахлын), ни брышы́нд пэ тумэ́ндэ, и, мэк тэ на явэ́л пэ тумэ́ндэ фэ́лды баритконэнца (плодэнца), пал-дова́ со одо́й чхурдыно́ шчы́то зоралэнгиро Саулоскиро, шчы́то, сыр бы ёв тэ на явэ́л помакхно елеёса.

²² Би ратэскиро раненэндыр, би тукоскиро (чэкэноскиро) зоралэнгирэ Ионафаноскиро лу́ко на рисия́ палэ, и Саулоскири курта́ла на рисия́ чхучи́ (пусто).

²³ Са́уло и Ионафа́но, савэ́ сыкадэ паты́в екх екхэ́скэ и дживдэ́ сыр пша́ла дро пэ́скиро джиибэ́н, и ёнэ на розячнэпэ дро мэрибэ́н пэ́скиро; сыгныдыр орлэндыр (кидэндыр), зоралыдыр шчэрэндыр (левэндыр) ёнэ сыс.

²⁴ Чхаялэ Израилёскирэ! Ровэ́н пал Саулостэ, саво́ уридя тумэн дрэ багряница шукарьякирибнаса и дорэсэлас пэ тумарэ́ и́ди сувнакунэ́ укэдыибэна.

²⁵ Сыр зоралэ́ пынэ́ пэ марибэ́н! Замардо сыс Ионафа́но пэ пэ́скирэ вучипна.

²⁶ Пиридживава мэ пал ту́тэ, миро пшал Ионафа́но; ту и са́нас древа́н дро́го ваш ма́нгэ; паты́в тыро́ кэ мэ сыс ваш ма́нгэ барэды́р джувлякирэ камибнастыр.

²⁷ Сыр зоралэ́ пынэ́, сыр хасия́ марибнаскиро марды́тко (оружыё)!