2 Коринфянэнгэ 9 - Библия - Пэ Балтитко Романи чиб (Романэс) 2019

Дэ́н васт (Помогинэ́н) Пшалэ́нгэ пир Христосо́стэ

¹ Мэ думинава, со на трэй тэ чхинав пал дынарибэ́н (служэниё) тэ дэн васт свэнтонэнгэ;

² пал-дова́ со мэ джино́м тумаро́ хачкирибэ́н тэ помогинэн (тэ дэн васт), со́са мэ шардём тумэн манушэ́нгэ дрэ Македония, пал дова́, со Ахаия сыс скэдыно́ бэрш палэ и тумаро́ илэ́скиро хачкирибэ́н тэ дэн васт сы́рбы ґаздыя́ бутэ́-манушэ́нгиро ило́.

³ Нэ мэ бичхадём пшалэ́н кэ тумэ́, соб (кай) амаро́ шарибэ́н пал тумэ́ндэ тэ на явэ́л чхучо́ (пусто), соб (кай), сыр мэ пхэндём, тумэ́ тэ явэ́н скэдынэ́,

⁴ а со, ке́ли мануша́ Македониятыр явэ́на ма́нца и дыкхэ́на, со тумэ́ на сан скэдынэ́, саво́ ж ладжаипэ́н явэ́ла амэ́нгэ (на ракири́ пал тумэ́ндэ) пал амаро́ твардо шарибэ́н.

⁵ Палдава́ мэ придуминдём тэ мангав пшалэ́н, соб (кай) ёнэ тэ джа́н англэды́р кэ тумэ́ и тэ докончынэн тэ скэдэ́н ловэ́ ваш бахтякирдо́ да́ро, пал со сыс дыно́ лав, соб (кай) ёв тэ явэ́л бахтякирдо́ да́ро илэ́стыр, а на сы́рбы тырдэна зорья́са.

⁶ Дава́ исын чачипэ́н, со, кон чхувэ́ла гив на́бут, одова́ и кэдэла аплодо на́бут, а кон чхувэ́ла гив бут, одова́ и кэдэла аплодо бут:

⁷ мэк кажно ману́ш тэ дэл ада́кицы, кицы́ исын лэ́скэ пир ило́, а на пир зор; пал-дова́ со Дэвлэ́скэ исын дро́го кодова́ ману́ш, кон дэ́ла радыма́са.

⁸ Палдова́ со Дэвэ́л могинэ́ла тэ бахтякирэ́л тумэн ада́кицы дро саро́, соб (кай) тумэ́ндэ тэ ухтылэл (тэ явэ́л до́си) саро́, со трэй тумэ́нгэ, и упрэдыр далэ́стыр, соб (кай) тумэ́ тэ явэ́н скэдынэ́ пэ кажно лачхо́ рэ́ндо:

⁹ сыр исын чхиндло́: “Ёв роздыя саро́, дыя́ богэнгэ, Лэ́скиро чачипэ́н явэ́ла пэ сарэ́ бэрша́.”

¹⁰ И Дэвэ́л, Саво́ дэ́ла зя́рки тэ чхувэ́н дрэ пхув и маро́ тэ хан, дэ́ла тумэ́нгэ саро́ и барьякирэ́ла саро́ и явэ́ла барвало́ аплодо тумарэ́ чачипнастыр:

¹¹ Дэвэ́л кэрэ́ла тумэн барвалэ́ илэ́нца пэ сарэ́ лачхэ́ рэ́нды, со бут мануша́ явэ́на тэ парикирэ́н Дэвлэ́скэ пал тумарэ́ да́ры, савэ́ ёнэ дорэсэ́на (долэна) амэ́ндыр.

¹² Пал-дова́ со дасаво лачхо́ дынарибэ́н на со фэ́ни помогинэла свэнтонэнгэ дрэ лэ́нгири трэ́бима, нэ ишчо (инкэ́) бутэды́р выкхарэла лэ́ндыр баро́ парикирибэн Дэвлэ́скэ;

¹³ и ёнэ славинэна Дэвлэ́с, дыкхи́ пэ дасаво лачхо́ дынарибэ́н, пал-дова́ со, сыр тумэ́ приджинэна, адя́кэ-паць и тумэ́ кэрэ́на сарэ́ илэ́стыр пир Христососкири бахталы́ зан (звесь); и пал тумарэ́ илы́тка да́ры лэ́нгэ и явирэ́нгэ,

¹⁴ и ёнэ дрэ пэ́скирэ патерья (молитвы) Дэвлэ́скэ тырдэнапэ илэ́са кэ тумэ́ пал барвало́ Дэвлэ́скиро бахталыпэ́н, саво́ Ёв сыкадя́ пир тумэ́ндэ.

¹⁵ Парикираса Дэвлэ́скэ сарэ́ годятыр и илэ́стыр пал Лэ́скиро тала́но, саво́ нашты́ тэ выпхэнас.