2 Коринфянэнгэ 6 - Библия - Пэ Балтитко Романи чиб (Романэс) 2019

¹ Сыр амэ кэра́са буты́ кхэтанэ́ Дэвлэ́са, амэ манга́са тумэн тэ на бистрэн пал Дэвлэ́скиро бахталыпэ́н, со тумэ́ прилынэ́ лэс на ивья́ (на напра́снэс):

² и, ґа́да, Дэвэ́л ракирэ́ла: “Ке́ли лачхо́ часо явдя́, мэ шундём тумэн: и ке́ли явдя́ дывэ́с тэ зракхав тумэн, Мэ дыём васт (помогиндём) ту́кэ.” Ѓа́да, исын лачхо́ мардо́ (шту́нда); ґа́да, исын дывэ́с тэ зракхэспэ:

³ амэ на чхуваса бар пэ дром ниекхэ́скэ, соб (кай) нико́н тэ на бангякирэл амари́ буты́;

⁴ нэ дро саро́ амэ сыкаваса пэс сыр Дэвлэ́скирэ бутярнэ́: зорало́ вырикирибэн дро пиридживибэн, дрэ трэ́бима, дро пхарипэ́н;

⁵ ке́ли марэна амэн чупняса, чхувэ́на дро штарибэ́н, ґаздэ́на манушэ́н пэ амэ́ндэ, ке́ли кэра́са буты́ пхарэ́с, би соибнаскиро, бокхалэ́;

⁶ дро жужыпэн, дро джиныбэ́н, дро длэнго вырикирибэн, дро лачхипэ́н пир Свэ́нто Ду́хо (Фа́но), пир чачуны́ пшалы́тко паты́в;

⁷ пир чачипна́скиро лав, Дэвлэ́скирэ зорья́са, чачипна́скирэ мардытконэ́са дро чачо́ и дро зэ́рво (ле́во) васт;

⁸ слава́са и ладжакирибнаса, пир на́лачхо лав и шарибэ́н; амэн гинэ́на пал хоханэ́ манушэ́ндэ, нэ амэ ракираса чачипэ́н;

⁹ амэ сам сы́рбы наджиндлэ и сам джиндлэ́ сарэ́нгэ, сы́рбы мануша́ кэ мэрибэ́н, нэ ґа́да, амэ сам джидэ́; чхувэ́на хась (ка́ра) пэ амэ́ндэ, на ишчо (инкэ́) на мулякирдэ́;

¹⁰ амэ сам сы́рбы смэнтна (скучна), нэ амэ ўса́ды (сак) радынасапэ; амэ сам сы́рбы бо́ги, нэ амэ кэра́са бут манушэ́н барвалэнца; амэ́ндэ нанэ ничы́, нэ адя́кэ-паць амэ́ндэ сы́рбы саро́ исын.

¹¹ Амарэ́ ушта́ ракирэ́на чачипэ́н тумэ́нгэ. Коринфиня́лэ, амаро́ ило́ исын откэрдо.

¹² Амарэ́ рига́тыр амэ сам сарэ́ илэ́стыр кэ тумэ́, а тумэ́ сы́рбы запхандлэ пэ́скиро ило́ амэ́ндыр,

¹³ нэ отлыджанпэ адя́кэ-паць кэ амэ (мэ да́ва ракира́ва сыр чхавэ́нгэ): отпхандэн пэ́скиро ило́ буґлэс, сыр и амэ.

Приракхибэна́ про́ти Идолы

¹⁴ На кэрэ́н буты́ кхэтанэ́ напатяибнаскирэнца; пал-дова́ со саво́ исын кхэтаныпэн машки́р чачипэ́н и грэ́хо? Со исын кхэтанэ́ машки́р дуд (свэ́то) и калыпэ́н?

¹⁵ И саво́ доракирибэ́н исын машки́р Христосо́стэ и Велиаро́стэ? Ци саво́ кхэтаныпэн исын машки́р патяибнаскирэстэ и напатяибнаскирэстэ?

¹⁶ Саво́ кхэтаныпэн исын машки́р Дэвлэ́скири кхангири́ и идолэ́нгирэ – мангипны́тко кхэр? Пал-дова́ со тумэ́ сан кхангири́ джидэ́ Дэвлэ́скири, сыр Дэвэ́л Кокоро́ пхэндя́: “Мэ ява́ва тэ джива́в машки́р лэ́ндэ и Мэ ява́ва тэ псирав машки́р лэ́ндэ. И Мэ ява́ва лэ́нгиро Дэвэ́л, и ёнэ явэ́на Мирэ́ мануша́.”

¹⁷ “Палдава́ мэкэ́н адалэ́ манушэ́н и явэ́н дрэ риг, – ракирэ́ла Рай Дэвэ́л, – и тэ на явэ́л тумэ́ндэ ничы́ кхэтанэ́ нажужэса, и Мэ прилава тумэн;

¹⁸ и Мэ ява́ва ваш тумэ́нгэ и тумэ́ явэ́на мирэ́ чхавэ́ и чхая́, – ракирэ́ла Рай Дэвэ́л Сарэзорья́киро.”