2 Коринфянэнгэ 5 - Библия - Пэ Балтитко Романи чиб (Романэс) 2019

¹ Пал-дова́ со амэ джина́са, со, ке́ли дая́ ша́тра – со исын амаро́ кхэр пэ пхув, пхадёла, то Дэвэ́л дэ́ла кхэр дро Болыбна́скиро Раё тэ джива́с амэ́нгэ, дава́ кхэр исын ве́чно, и на мануша́ чхудэ́ лэс.

² Палдава́ амэ, чачэс, пхарэ́с даса ґондя́ (уздыхинаса) дро дава́ Кхэр пэ пхув, пал-дова́ со амэ древа́н камаса тэ дорэсас (тэ долас) кхэр Болыбна́скирэ Раёстыр, соб (кай) сы́рбы тэ урьявас лэс пэ пэ́стэ;

³ ко́ли амэ, чачэс, урьяваса лэн, тэды амэ на ява́са нангэ.

⁴ Палдова́ со, ке́ли амэ дживаса дрэ дая́ пхувитко ша́тра, амэ даса ґондя́ (уздыхинаса) пхарипнастыр; дава́ на значынэ́ла, со амэ камаса тэ выджас пэ во́ля амарэ́ чачунэ́ масэ́ндыр, нэ амэ камаса, соб (кай) тэ явэ́л болыбна́скири фо́рма пэ амэ́ндэ, соб (кай) амарэ́ маса́, савэ́ исын хасибны́тка, тэ парудён дро ве́чно джиибны́тко пало́ (после) отджидякирибэн.

⁵ Дава́ Дэвэ́л, Кон скэдыя́ амэн ваш дава́ парудыибэн и дыя́ адя́кэ-паць амэ́нгэ Пэ́скиро Ду́хо (Фа́но) сыр сымады́ (залого).

⁶ Палдава́ амэ ўса́ды (сак) зоралэ́с патя́са и амэ джина́са, со пака амэ сам кхэрэ́ дрэ чачунэ́ маса́, амэ сам дур Ра́скирэ-Дэвлэ́скирэ Кхэрэ́стыр,

⁷ пал-дова́ со амэ дживаса пир патяибэ́н, а на пир дова́, со амэ дыкхаса,

⁸ и амэ зоралэ́с патя́са и амэ фэды́р камасас тэ мэкас амаро́ кхэр ваш маса́ и тэ явас кхэрэ́ Дэвлэ́са.

⁹ Пал дава́ амэ древа́н камасас тэ кэра́с дова́, со исын лачхо́ Дэвлэ́скэ, ци, ке́ли амэ сам дро амаро́ кхэр ада́й, ци, сыр амэ ява́са одо́й.

¹⁰ Пал-дова́ со амэ́нгэ сарэ́нгэ трэй тэ сыкавас пэс анги́л Христосо́скиро сэндари́тко штэ́то, соб (кай) амэ могинаса тэ дорэсас (тэ долас) пал дова́, со амэ кэрдя́м пал пэ́скиро джиибэ́н дрэ маса́: лачхипэ́н ци фуипэ́н.

Тэ Кутякира́с (Тэ Патывакира́с) Дэвлэ́с пир Исусо́стэ

¹¹ Палдава́, сыр амэ джина́са, со дава́ значынэ́ла тэ дарас Дэвлэ́стыр, то амэ патякира́са явирэ манушэ́н дро дава́ чачипэ́н; Дэвэ́л джинэ́ла амэн сарэ́са, и ма́ндэ исын лачхо́ ужакирибэ́н, со и тумэ́ джинэ́на саро́ пал амэ́ндэ.

¹² Амэ на шараса пэс нэвэ́стыр анги́л тумэ́ндэ, нэ амэ да́са саштыпэ́н (возможность) тумэ́нгэ тэ шарэ́н амэн, соб (кай) тумэ́ могинэ́нас тэ отпхэнэн одолэ́нгэ, кон шарэлапэ саво́ манушытконэ́ явритунэ́ лачхипна́са, а на лэ́скирэ характероса.

¹³ Ко́ли амэ сам сы́рбы бигодякирэ, дава́ исын ваш дова́, соб (кай) тэ славинас Дэвлэ́с, а ко́ли амэ сам дрэ пэ́скири годы́, дава́ исын ваш тумэ́нгэ.

¹⁴ Пал-дова́ со Христососкири ла́ска пропатякирэла амэн, савэ́ приджинэна дава́, со; ко́ли Екх мыя́ пал сарэ́ндэ, тэды сарэ́ мынэ́ ваш пхурано́ джиибэ́н;

¹⁵ Ёв мыя́ пал сарэ́ндэ, соб (кай) джидэ́ мануша́ тэ на дживэ́н ваш пэ́скэ, нэ ваш Лэ́скэ, Кон мыя́ пал лэ́ндэ и отджидыя́ ваш лэ́нгиро лачхипэ́н.

¹⁶ Палдава́ какана́ амэ на сэндинас манушэ́н пир далэ́-свэтоскиро манушы́тко; а ко́ли амэ и сэндиндям Христосо́с, сыр сарэ́ сэндинэна, тэды амэ буты́р на кэра́са адя́кэ.

¹⁷ Палдава́, кон исын дро екхипэ́н Христосо́са, кодова́ ячэ́лапэ сы́рбы нэво́ ману́ш: пхурано́ ду́хо (фа́но) лэ́стыр гия́, нэво́ загия́:

¹⁸ саро́ дава́ исын Дэвлэ́стыр, Саво́ змириндя (кэрдя́ рахманонэ́нца) амэн Пэ́са пир Христосо́стэ и дыя́ задыибэн амэ́нгэ тэ примиринас явирэ́н:

¹⁹ пал-дова́ со Дэвэ́л пир Христосо́стэ примириндя свэ́то Пэ́са и примангдя лэ́нгирэ грэ́хи, и Ёв чхудя́ дро амаро́ ило́ лав, соб (кай) амэ тэ ячас Лэ́скэ рахманонэ манушэ́нца.

²⁰ И амэ сам бичхадэ́ мануша́ Христосостыр сы́рбы Дэвэ́л ракирэ́ла Лэ́скиро лав пир амэ́ндэ, и амэ мангаса ваш Христосо́стэ: ячэ́нпэ рахмана (явэ́н кхэтанэ́) Дэвлэ́са.

²¹ Пэ Христосо́стэ, Савэ́стэ на сыс грэ́хо, Дэвэ́л чхудя́ сарэ́ амарэ́ грэ́хи сыр свэ́нто отдыибэ́н, соб (кай) амэ тэ ячаспэ чачунэнца анги́л Дэвлэ́стэ пир Христосо́стэ.