2 Коринфянэнгэ 4 - Библия - Пэ Балтитко Романи чиб (Романэс) 2019

Духо́скири Дро́гима дрэ Ѓлэя́на Пирья́

¹ Ко́ли Дэвэ́л сыкадя́ Пэ́скиро лачхипэ́н кэ амэ и дыя́ дасави́ буты́ амэ́нгэ, тэды амэ на пэраса илэ́са.

² Нэ амэ дурьёваса ґарадэ́ ладжаипнытконэ рэндэ́ндыр, амэ на мэндринаса, на пирикэраса Дэвлэ́скиро лав, а амэ ракираса чачипэ́н и сыкаваса пэс, сыр амэ сам, пэ манушы́тка якха́ анги́л Дэвлэ́стэ.

³ А ко́ли амари́ Ева́нгелия исын гарады, тэды ёй исын ґарады ваш одолэ́нгэ, савэ́ исын хасибны́тка,

⁴ пал-дова́ со лэ́ндэ, напатяибнаскирэндэ, дава́ свэтоскиро хохано́ дэвлоро штылякирдя лэ́нгири годы́, соб (кай) ёнэ тэ на дыкхэ́н дуд (свэ́то) и тэ на ґалён роспхэныбэн пал бахталы́ зан (звесь) пал Христососкири ярко сла́ва, а Христо́со исын Дэвлэ́скири патри́н (о́бразо).

⁵ Пал-дова́ со амэ на роспхэнаса пал пэ́стэ, а пал Христосо́стэ, амарэ́ Растэ-Дэвлэ́стэ, и амэ сам Христосо́скирэ писха́рья.

⁶ Адава́ исын Дэвэ́л, Саво́ пхэндя́: “Тэ зяинэл дуд (свэ́то) цямлыпнастыр”, исын дова́-паць Дэвэ́л, Кон зачхудя дава́ дуд тэ зяинэл дро амаро́ ило́, соб (кай) амэ тэ ґалёвас Дэвлэ́скири ярко сла́ва, сави́ зяинэла Исусо́стыр Христосостыр.

⁷ А дава́ кучипэ́н амэ рикираса дрэ ґлэя́на (глины́тка) пирья, соб (кай) тэ сыкавас зорьякиро барипэ́н, саво́ исын Дэвлэ́стыр, а на амэ́ндыр:

⁸ амэн тасавэна сарэ́ ригэ́ндыр, нэ амэ́нгэ нанэ цясно (танго); амэ кунинасапэ, нэ амэ на пэраса Духо́са;

⁹ амэн традэ́на, нэ амэ на сам бистырдэ; амэн вычхурдэна яври́, нэ амэ на хасёваса.

¹⁰ Амэ дрэ маса́ ўса́ды (сак) лыджа́са Христосо́скиро мэрибэ́н дрэ пэ́стэ, сыр Ису́со мыя́ ваш дова́, соб (кай) тэ явэ́л бицяло́ Исусо́скиро джиибэ́н пир ду́хо (фа́но) дрэ амэ́ндэ.

¹¹ Амэн джидэн ўса́ды (сак) здэна пэ мэрибэ́н пал Христосо́стэ, соб (кай) тэ сыкадёл Христосо́скиро джиибэ́н пир амари́ лоч (плоть), сави́ мэрэ́ла.

¹² Мэрибэ́н, чачэс, кэрэ́ла буты́ дрэ тумэ́ндэ, а джиибэ́н дрэ амэ́ндэ.

¹³ Нэ амэ́ндэ исын дасаво-паць патяибнаскиро ду́хо (фа́но), сыр исын чхиндло́: “Мэ упатяндыём, палдава́ мэ ракирдём” и амэ адя́кэ патя́са, палдава́ амэ адя́кэ-паць и ракираса,

¹⁴ и амэ джина́са, со Одова́, Кон отджидякирдя́ Рас-Дэвлэ́с, Исусо́с Христосо́с, адя́кэ-паць отджидякирэла и амэн пир Исусо́стэ Христосо́стэ и чхувэ́ла амэн тумэ́нца кхэтанэ́ анги́л Пэ́стэ.

¹⁵ Пал-дова́ со саро́ дава́ исын ваш тумаро́ лачхипэ́н ваш дова́, соб (кай) Дэвлэ́скиро бахталыпэ́н, саво́ доджа́ла кэ бут-бут манушы́тка илэ, тэ янэл парикирибэн ваш Дэвлэ́скири сла́ва.

Джиибэ́н пир Патяибэ́н

¹⁶ Палдава́ амэ ние́кхвар на пэраса дро ило́. Нэ хоць амарэ́ маса́ яврестыр хасякирэна зор, то амарэ́-Духоскири андратуны́ паш со дывэ́с зоралёла.

¹⁷ Пал-дова́ со амарэ́ кро́тка и локхэ́ пиридживибэна янэ́на бут-бут барэды́р ве́чно сла́ва,

¹⁸ и амэ думинаса на пал дова́, со исын бицяло́, а пал дова́, со нанэ бицяло́; пал-дова́ со саро́ бицяло́ исын пэ наборо (кротко) часо, а набицяло исын ве́чно.