2 Коринфянэнгэ 3 - Библия - Пэ Балтитко Романи чиб (Романэс) 2019

Нэвонэ́-Завето́скирэ Дына́рья (Служы́тели)

¹ Ци нэвэ́стыр амэ ява́са тэ шарас пэс, савэ́ амэ сам? Ци амэ́нгэ трэй допхэныбны́тка (рекоменды́тка) лыла́ кэ тумэ́ ци тумэ́ндыр?

² Тумэ́ сан кокорэ́ сы́рбы амаро́ лыл, зачхиндло́ дро амаро́ ило́, соб (кай) сарэ́ мануша́ тэ уджинэ́н и тэ гинэн дава́ лыл;

³ тумэ́ сыкавэ́на пэс, со тумэ́ сан Христосо́скиро лыл, саво́ амэ бичхадям; дава́ лыл исын чхиндло́ на чэрниласа, а Джидэ́ Дэвлэскирэса Духо́са, и на пэ барунэ́ плиты, а пэ манушы́тка илэ, дрэ савэ́ амэ зоралэ́с патя́са.

⁴ Амэ зоралэ́с патя́са дрэ Дэвлэ́стэ пир Христосо́стэ:

⁵ пал-дова́ со амэ кокорэ́ на могиндям тэ думинас дава́ кокорэ́ пэ́стыр, нэ амаро́ тала́но исын Дэвлэ́стыр;

⁶ Саво́ дыя́ амэ́нгэ тала́но тэ служынас (тэ дынарина́с) роспхэныбна́са Нэвонэ́ Завето́скэ, нэ на маму́й (прямэс), сыр буква ракирэ́ла, а сыр Ду́хо (Фа́но); пал-дова́ со буква Законо́стыр янэ́ла мэрибэ́н, а Ду́хо (Фа́но) дэ́ла джиибэ́н.

⁷ А ко́ли тэ дынаринэ́н (тэ служынэ́н) буквэ́нгэ, савэ́ сыс вычхиндлэ́ пэ барунэ́ плиты, и савэ́ янэ́нас мэрибэ́н, сыс подынэ адя́кэ Дэвлэ́скирэ слава́са, со Израилёскирэ чхавэ́ на могиндлэ́ тэ дыкхэ́н пэ Израилёскиро муй пал Мойза́скирэ-москири яркима, саво́ джа́лас кэ ко́нцо (кэ яго́ро),

⁸ то ци пэ бут буты́р явэ́ла сла́ва Духо́скирэ бутя́тыр!

⁹ Ко́ли тэ дынаринэ́н скэдыибна́скэ сыс славу́тно, тэды дынарибэ́н (служэниё) тэ приджинэл манушэ́н чачунэнца явэ́ла буты́р славу́тно.

¹⁰ Пал-дова́ со сла́ва, со исын какана́, барэды́р долэ́ славатыр и палдава́ ёй исын яркэдыр долэ́ славатыр.

¹¹ Пал-дова́ со, ко́ли дова́, со сыс пэ кротко часо, исын дрэ сла́ва, тэды буты́р дрэ сла́ва дова́, со ячэ́лапэ ве́чнэс.

¹² Палдава́ амэ ракираса муршканэ́с пал дасаво лачхо́ ужакирибэ́н, со исын амэ́ндэ:

¹³ амэ на сам дасавэ́ сыр Мо́йза сыс, кон учхакирдя́ пэ́скиро муй, соб (кай) Израилёскирэ чхавэ́ тэ на дыкхэ́н сыр слава́кири я́ркима мурдёлас.

¹⁴ Нэ лэ́нгири годы́ штылыя, пал-дова́ со кэ ададывэ́с дова́-паць похтан на злэлапэ, ке́ли ёнэ гинэ́на Пхурано́ Завето, пал-дова́ со екх ману́ш, саво́ патя́ла дрэ Христосо́стэ, могинэ́ла тэ злэл дава́ похтан.

¹⁵ Нэ кэ/жы́ко ададывэсатуно дывэ́с, ке́ли ёнэ гинэ́на Мойза́скиро Зако́но, похтан сы́рбы зачхакирэла лэ́нгиро ило́.

¹⁶ Нэ ко́ли вари-кон рисёла кэ Рай Дэвэ́л, тэ́ньчи дова́ похтан (учхакирибэн) пэ шэро́ злэлапэ.

¹⁷ Рай Дэвэ́л исын Ду́хо (Фа́но). Кай исын Ра́скирэ-Дэвлэ́скиро Ду́хо (Фа́но), одо́й исын вольныма.

¹⁸ Нэ амэ сарэ́ откэрдэ муе́нца сы́рбы дро гиндало (зеркало) пиридаса Ра́скирэ-Дэвлэ́скири сла́ва и парудёва́са дрэ Лэ́скири патри́н (о́бразо) екхэ́ слава́тыр дро яви́р пир Ду́хо (Фа́но), Саво́ джа́ла Ра́скирэ-Дэвлэ́скирэ, Духо́стыр.